Read chopi Genesisi 32 Bible Online

Genesisi 32 - chopi bible

Genesisi 32

¹Jakobe a to phaxa mhamba txitimwi ka mmango, e dhana va ka kwawe ve ta dya sakudya. Vona va dyite, va txi otela kona mmangoniyo. Jakobe ngako a di tekile nzila yakwe, tingelozi ta Txizimu ti to tshangana nayo.

²Mbimo yi Jakobe a nga ti wona a ti khene: “Ndide dibutho da Txizimu!” Wukhalo wuwa a to wu raya ditina daku[81] i Mahanayime.

³Jakobe a to ruma mitumi yakwe, e yi thangetisa masoni kwakwe, yi txi ya ka mwanawe Esawu, ditikoni ka Seyiri, ditikoni ka Edhomi.

⁴A to va leleta, a txi khene: “Mi na ya womba ka Esawu, mkomwangu, mi txi khanu: Txithumi txako Jakobe, a womba tiya: Ni zumbile m'tini ka Labhani kota muwuyi, kala kuwa.

⁵Ni ti ya mana tihomu ni timbongola, tinvuta ni sithumi sa vavamna ni sa vavasikati. Ni rumela mhaka yiya ku ta bika kwako mkomwangu Esawu, kasiku ni txi mana wumbilu masoni kwako.”

⁶Mitumi yi to wuya ka Jakobe yi ta womba tiya: “Hi hokile ka mkomwako Esawu. Se nene wata, wa kuhingeta, ana ni 400 wa vavamna.”

⁷Sekoko Jakobe a to tala ngu kuthava ni kukarateka. Ti di ngeto, a to abanisa vathu va a nga ti navo, tinvuta ni tihomu, ni makamelu ku txi maneka mitxawa yimbidi.

⁸Nguko ene a ti ti khene: “Ngako Esawu a txi hoka ka mtxawa wumwewo a txi wu heta, wumwani mtxawa wu na huluka.”

⁹Jakobe a to khene kambe: Txizimu txa tate wangu Abrahamu, Txizimu txa tate wangu Isaake, awe MKOMA, u nga ni gela u txi khawe: “Tshumela u tsula ditikoni kwanu, amu u nga velekelwa kona, ni na kuxayisa ta tinene.”

¹⁰Ani kha ni nga ni fanelo yo mahelwa wotshe wuxinji, ni wotshe wunene awu u nga va nawo kwangu, ani txithumi txako. Ani ni ti kova ni mtxheketelo dwe, mbimo yi ni nga txhatuka mnambo wuwa wa Jordhani, se konkuwa ni na ni mitxawa yimbidi.

¹¹Na ku kombela, ni lamulele manzani ka mkomwangu Esawu, nguko na m'thava, ati to a nga thuka a txi ta e ta hi daya, ani ni vamame, ni vanana.

¹² Awe ngawe, u nga womba u txi khawe: “U na ni xayisa ta tinene, u txi maha ti to liveleko langu li txi tala nga mtxhefa wa mafu a lineneni, awu wu si kotekiko kubalwa.”

¹³Jakobe a to otela wusiku wule ka wona wukhalowo, ka sotshe si a nga ti naso, a to sawula sokari, kasi kuya luva ngu sona ka mkomwakwe Esawu;

¹⁴200 wa tiphongo, ni magumi mambidi a vamabhongwe, 200 wa tinvuta, ni magumi mambidi a tihamba;

¹⁵magumi mararu a makamelu a mikati, ni vanana va ona, mune wa magumi a tihomu ta vamakati, ni madhuna a digumi, magumi mambidi a timbongola ta mikati, ni digumi da timbongola ta vamatune.

¹⁶Ene a to abanisa sifuyo siya ngu mitxhambi, e si ningela ka sithumi sakwe, a txi gela sithumi, a txi khene: “Thangelani masoni kwangu, mi dhawukisa mtxhambi ni mtxhambi, ku txi va ni wukhalo hagari ka yona.”

¹⁷Ka wule a nga ti thangete masoni, a mgete ku khene: “Ngako mkomwangu Esawu a txi kumana, e ku wotisa ku khene: U lumba mani kani? U ya hani kani? Sifuyo si si ku masoni kwako si lumba mani kani?”

¹⁸Sekoko u na khawe: “Nza Jakobe txithumi txako, njiningo txi a rumelako ka Esawu, mkomwangu; nene wata msana kwathu.”

¹⁹Ene a to leletisa toneto ka wa wumbidi ni ka wa wuraru, ni ka votshe avale va nga ti tsimbila ngu msana ka mitxhambi a txi womba ka mmweyo ni mmweyo wawe, a txi khene: “Ngu tona tiya mi no womba ka Esawu, ngako mi txi manana nayo.”

²⁰Mi na m'gela ku khanu: “Jakobe txithumi txako, ene apune wata msana kwathu.” Jakobe a ti khene: “Ni na mthuthisa ngu txiningo txi ni txi thangetisako; se ngu msana, ni na hoka ni txi ya ti kombisa kwakwe, mwendo a na ni amukela.”

²¹Ngu tona eto, Jakobe a to thangetisa txiningo masoni, se e otela wusiku wule ha wugoveloni.

²²Ka wonewo wusiku, ene a to wuka e teka vasikati vakwe va vambidi, sithumi sakwe sa simbidi, ni vanana vakwe va digumi ni mmweyo, e tshawunyeta mlonga wa mnambo wa Jabhoke.

²³Jakobe a to va thangetisa ve tshawunyeta mlonga, e maha ti to ve tshawunyeta ni sotshe asi va nga ti naso.

²⁴ Se Jakobe a to sala ekha. Ku to humelela m'thu wokari a txi ta lwa nayo, kala kuza ku txi gwimba wuronga.

²⁵Nga ti m'thu wule a nga wona ti to kha mxuli Jakobe ngu kupfinyana nayo, a to mpeka ha digunyunguni ka nyonga, se nyonga ya Jakobe yi to hambaneka mbimo yi a nga txi lwa nayo.

²⁶Ene a wombile, a txi khene: “Ni leke ni txi tsula, nguko wuronga wu gwimbile.” Aniko Jakobe a mxamute, a txi khene: “Ani kha ni na mbi kuleka ngako u si ni katekisi.”

²⁷Ene a to mu wotisa, a txi khene: “Ngawe mani ditina dako kani?” Se Jakobe a xamute, a txi khene: “Ngani Jakobe.”

²⁸ Sekoko ene a to khene: “Khu na mbiswa u txi dhanwa to u Jakobe, aniko u na dhanwa ku u Israyeli, nguko u lwite ni Txizimu ni vathu, kambe u xute.”

²⁹ Jakobe a muwotisile, a txi khene: “Na ku kombela ni gele ditina dako.” Aniko ene a to mxamula, a txi khene: “Ngu kutxani u txi ni wotisa ditina dangu kani?” Se a to mkatekisa kona hale.

³⁰Wukhalo wuwa Jakobe a to wu raya ditina daku[82] i Peniyeli, nguko ene a ti khene: “Ani ni wonani ni Txizimu, khohe ni khohe, aniko ni ngadi ni hanya.”

³¹Ngako ditambo di txi huma, Jakobe a manekile a di tshawunyetile Peniyeli, kambe a txi khwita ngu mhaka ya nyonga yakwe.

³²Ngu mhaka yeto, va ka Israyeli kha va dyi msiha wa ha nyongani, wu ku ngu ha ka digunyungu, kala nyamsi, nguko ngu kona ha msihani ka nyonga Txizimu txi nga dayisa Jakobe.