Read chopi Genesisi 33 Bible Online

Genesisi 33 - chopi bible

Genesisi 33

¹Jakobe a txi gula maso, a to wona ti to Esawu wata ni 400 wa vavamna. Sekoko a to hambanisa vanana va Leya, ni va Rakeli, ni vanana va sithumi sakwe sa simbidi.

²A to thangetisa sithumi ni vanana va sona, e veka Leya ni vanana vakwe, ngu msana; se ngu kugwitisa e veka Rakeli ni Josefa.

³Ene a to thangela masoni kwawe votshe. Se mtxhanu wa sikhati ni simbidi a to khizama hahatshi, a sanzi kuhokela mkomwakwe.

⁴Sekoko Esawu a to tutuma e hingeta mnanda wakwe Jakobe, a to mñola, e mkhutarela, a txi mpswopswa, va txi dila ngu wumbidi wawe.

⁵Mbimo yi Esawu a nga gula maso a txi wona vavasikati ni vanana, a to wotisa, a txi khene: “Mbamani vava u ku navo kani?” Jakobe a xamute, a txi khene: “Mbanana vangu, avava Txizimu txi nga ni ninga ani txithumi txako.”

⁶Sekoko sithumi sa txisikati si to tshuketa ni vanan va sona ka Esawu, si khizama.

⁷Se Leya a to tshuketa hafuhi nene, ni vanana vakwe, va txi khizama; ngu kugwitisa a to tshuketa hafuhi Rakeli ni Josefa, va txi khizama ni vona.

⁸Esawu a to wotisa ka Jakobe, a txi khene: “U lava kumaha txani ngu yotshe mitxhambi yi ni nga yi mana hanzila kani?” Jakobe a xamute, a txi khene: “Ani ni lava ku ni txi mana wuxinji kwako awe mkomwangu.”

⁹Esawu a to engeta a txi khene: Ani ni naso so enela, mnanda wangu, ti vekele asi u ku naso.

¹⁰Sekoko Jakobe a ti khene: “Ahim-him, ani na ku kombela! Ngako ni nga mana kuamukeleka masoni kwako, amukela txiningo txa manzani kwangu. Nguko ni woni khohe yako, nga ni to wona khohe ya Txizimu, se awe u ni amukete ngu kuthutha.

¹¹Ngu toneto, na kombela, amukela txiningo txangu atxi ni ku mahelako, nguko Txizimu, txi ni mahete wumbilu, sa ku ti vhuna ngu sona ani, sotshe ni naso.” Ngu kukhokhoniswa, Esawu a tumete.

¹²Esawu a ti khene: “A hi tsimbile hotshe, ani ni lava kutsula ni nawe.”

¹³Aniko Jakobe a ti khene: “Mkomwangu wa tiziva ti to vanana i ngadi vadotho, nani ni fanete kualakanya tinvuta ni tihomu ati ti mamisako; ngako ni txi ti khurisa, hambi i ti ditshiku dimwedo dwe, wotshe mtxhambi wu na fa.

¹⁴Mkomwangu, ni kombela u tsula, u thangela masoni ka txithumi txako: Nguko ani ni na tsimbila kha kwati, madingano ni kutsimbila ka mtxhambi wu u ku nawo masoni kwangu ni vanana, kala kuza ni txi hoka Seyiri, m'tini ka mkomwangu.”

¹⁵Se Esawu a ti khene: “Kona kuwa, ni na kusiyela majaha okari ka awa ni ku nawo!” Aniko Jakobe a xamute, a txi khene: “Kasi kutxani toneto, kani? Ani ni bonga kumana dithomo do amukelwa masoni ka nyamne wangu!”

¹⁶Ka donedo ditshiku Esawu a to teka nzila yo tshumela a txi ya Seyiri.

¹⁷Aniko Jakobe a to teka nzila ya kuya Sukote, aho a nga ya aka kona nyumba ni sibala sa sifuyo sakwe; ngu mhaka yeto, wukhalo wule wu dhanwa ngu ditina daku i Sukote.

¹⁸Jakobe, ngako a di humile ngu Pedhani-Arani, a to hoka ngu kudikha didhoropani ka Sikemi, ditikoni ka Kanana, e gova, e gwimba ditenda dakwe, hafuhi ni didhoropa.

¹⁹ Se a to xava ka vanana va Hamori, tate wa Sikemi, ngu male ya dizana, thembwe yi a nga gwimba ka yona ditenda dakwe.

²⁰Se konaho a to aka txiluvelo, a nga txi raya ditina daku i “Eli-Txizimu txa Israyeli.”