Read chopi Genesisi 35 Bible Online

Genesisi 35 - chopi bible

Genesisi 35

¹ Txizimu txi to womba ka Jakobe txi txi kha txona: “Khukha! Tsula Bheteli u txi ya aka kona. Koneyo u na ya aka txiluvelo txa Txizimu, atxi txi nga ti wonekisa kwako, mbimo yile u nga txi thava masoni ka mkomwako Esawu.”

²Sekoko Jakobe a to womba ka ngamu yakwe yotshe ni ka votshe vale a nga ti navo, a txi khene: “Tshotshani hahanze sotshe sithombe sa sizimu sa vamatiko, asi si ku hagari kwanu, ti basiseni mi txitxa ni syambalo sanu.”

³Se a hi khukheni hi kwela kuya Bheteli; ni na ya aka kona txiluvelo ka Txizimu, atxi txi nga ni emela mbimo yi ni nga ti ti pandiseka, kambe txi ni pangalatile, ka nzila yi ni nga yi tsimbila.

⁴Sekoko vona va to ningela ka Jakobe sotshe sithombe sa sizimu sa vamatiko, asi va nga ti naso, ni singeda ati va nga ti nato tinzeveni kwakwe, se Jakobe a to si kelela hahatshi ka mkusu wu wu nga ti hafuhi ni didhoropa da Sikemi.

⁵Vona va to khukha ha wugoveloni hale va nga ti kona, se Txizimu txi to thela dizowa da hombe, ka vathu va madhoropa otshe ma nga ti hafuhi, ti to ku si maneki m'thu ni wammweyo wa kutsana a txi londeta Jakobe ni ngamu yakwe.

⁶Jakobe a to hoka Luza, ditikoni da Kanana (i ku Bheteli), ene ni votshe vale a nga ti navo.

⁷Koneyo a ti ya aka txiluvelo, e raya wukhalowo ditina daku[84] i Eli-Bheteli, nguko ngu koneyo Txizimu txi nga ti wonekisa kwawe, mbimo yi a nga txi thava masoni ka mkomwakwe.

⁸Se Dhebhora, txithumi txa Rebheka, a to fa, e tshotshwa hafuhi ni Bheteli, hahatshi ka mkusu, awu se wu nga dhanwa ku Mkusu wa Masaluko.

⁹Txizimu txi to humelela kambe ka Jakobe, na ene a txi ta ngu Padhani-Aramu, txi txi mkatekisa.

¹⁰Se Txizimu txi to kha txona kwakwe: “Ditina dako u Jakobe; khu na mbiswa u txi dhanwa kambe ngu ditina da Jakobe: Aniko ditina dako u na dhanwa ku u Israyeli.” Txizimu txi to mraya ditina daku i Israyeli.

¹¹Se Txizimu txi m'gete kambe, txi txi kha txona: “Ani ngani Txizimu txa mtamo wotshe. Velekelanani mi txi anda. Ngu kwako ku na humelela mfumo, ni matiko o tala, ni vafumeli va na huma ngu kwako.

¹²Ani na kuninga ditiko di ni nga ninga Abrahamu ni Isaake, ni ka liveleko lako; ali li no maneka msana kwako.”

¹³Se Txizimu txi to khukha hafuhi kwakwe, ka wukhalo wule txi nga ti ti womba-womba nayo.

¹⁴Jakobe a to emisa dirigwi da txialakanyiso, ha wukhaloni hale Txizimu txi nga womba-womba nayo, dirigwi diya txitimwi ka dona a nga phaxa mhamba ya vhinya, e thela kambe mtona.

¹⁵ Jakobe a to raya wukhalo wule ditina daku i Bheteli, wukhalo wule Txizimu txi nga womba-womba nayo kona.

¹⁶Vona va to khukha Bheteli. Se ku di sate mnava wa wudotho, kasi kuhoka Efrata, Rakeli a to hefemula kambe, aniko kulumwa kwakwe ku mpandisile ngutu.

¹⁷Mbimo yi Rakeli a nga hefemula ngu kukarateka, nyakhotwe wakwe a m'gete tiya: “U nga thave, nguko u na va ni mmwani m'zambi!”

¹⁸Mbimo yi wu nga txi huma moya wakwe, na se lifo li di hafuhi, ene a to raya ditina mwanana, daku[85] i Bhenoni; aniko tate wakwe a mrayile ku[86] i Bhenjamini.

¹⁹ Rakeli a to fa, se e kelelwa hafuhi ni nzila ya kuya Efrata, i ku Bhetlehema.

²⁰Jakobe a to emisa dirigwi da txialakanyiso txitimwi ka dithitha, dirigwi da txialakanyiso txa dithitha da Rakeli, adi di kuho kala ni nyamsi.

²¹Sekoko Israyeli a to khukha eya zima ditenda dakwe, kupinda ka[87] Migdhali-Edheri.

²²Nga ti Israyeli a nga va a di akile ka dona ditiko edo, Rubheni a to otela ni Bhiliha, i nga ti txikaba txa tate wakwe, kambe Israyeli a ti zivile. Se vanana va Jakobe, i ti ti digumi ni vambidi.

²³Vanana va Leya ngu vava: Matiwula a Jakobe i Rubheni, Simiyoni ni Levhi, Judha, Isakari ni Zebhuloni.

²⁴Vanana va Rakeli ngu vava: Josefa ni Bhenjamini;

²⁵Vanana va Bhiliha txithumi txa Rakeli ngu vava: Dhani ni Naftali.

²⁶Vanana va Zelfa txithumi txa Leya ngu vava: Ghadhe ni Aseri. Evo mbanana va Jakobe va nga velekelwa Padhani-Aramu.

²⁷ Se Jakobe a to ta ka Isaake tate wakwe, kona Mambre, aniya Kiriyate-Aribhe, i ku Hebroni, ahale va nga ti akile kona, Abrahamu ni Isaake.

²⁸Kuhanya ka wutomi wa Isaake nga 180 wa malembe.

²⁹Se Isaake, msana ka kuva a di kumbile, to fa, eya ti patanisa ni va ka kwawe, i di txikhovana, na a di hanyile masiku o tala, se vanana vakwe, Esawu ni Jakobe, va to mtshotsha.