Read chopi Genesisi 36 Bible Online

Genesisi 36 - chopi bible

Genesisi 36

¹Ngu liya liveleko la Esawu (i ku Edhomi).

² Esawu a tekile vasikati, hagari ka vanana Vakanana, i ku Adha, mwana Eloni, Muheti, Oholibhama, mwana Ana, mwana Zibheyami, muhevhi,

³ Bhasemate, mwana Ismayeli awu kambe i ku ndiya ya Nebhayote.

⁴Adha a velekete Esawu, mwanana wu a dhanwako ku i Elifazi, Bhasemate a velekile Reweli.

⁵Oholibhama a velekile Jewusi, ni Jalamu, ni Kora. Evo mbanana va Esawu, va nga velekelwa ditikoni ka Kanana.

⁶Esawu a to teka vasikati vakwe, vanana vakwe va majaha ni vamahorana, votshe vathu m'tini kwakwe, ni mitxhambi yakwe, sotshe sifuyo sakwe, thomba yakwe yotshe, ayi a nga yi mana ditikoni ka Kanana, e khukha a txi ya ditikoni ka Seyiri, kule ni Jakobe, mnanda wakwe.

⁷Vona va ti ni tithomba ta tingi, ti si koteki ti to va nga aka wukhalo wumwewo, nguko ditiko di va nga ti akile ka dona di ti si eneli, ngu mhaka ya tithomba tawe, ta tingi.

⁸Ngu mhaka yeto Esawu i ku Edhomi, a to aka mmangoni ka Seyiri.

⁹Ngu liya liveleko la Esawu, mkale wa Vaedhomi, awu a ngu aka mmangoni ka Seyiri.

¹⁰Matina a vanana va Esawu ngu awa: Elifazi, mwana Adha, msikati wa Esawu; Reweli, mwana Bhasemate, msikati wa Esawu.

¹¹Vanana va Elifazi ngu vava: Temani, Omari Sefo, Gayetamu, Kenazi.

¹²Elifazi, mwana Esawu, a ti ni Timina, msikati wa txikaba, awu a nga veleka nayo Amaleki. Evo mbanana va Adha, msikati wa Esawu.

¹³Ngu vava vanana va Reweli: Nahati, Zera, Sama, ni Miza. Evo mbanana va Bhasemate, msikati wa Esawu.

¹⁴Ngu vava vanana va Oholibhama, mwana Ana, mwana Sebeyomi, msikati wa Esawu: Ene a m'velekete Jewusi, Jalamu ni Kora.

¹⁵Avava ngu vona vathangeli va vanana va Esawu; i ku vanana va Elifazi, matiwula a Esawu, i ku vava: Mthangeli Temani, mthangeli Omari, mthangeli Sefo, mthangeli Kenazi,

¹⁶mthangeli Gayetamu, ni mthangeli Amaleki; avava ngu vona vathangeli va Elifazi, ditikoni ka Edhomi; ngu vona vanana va Adha.

¹⁷Se ngu vava vanana va Reweli, mwana Esawu: Nahati, Zera, Sama, Miza. Evo tinduna ta Reweli, ditikoni ka Edhomi, evo mbanana va Bhasemate, msikati wa Esawu.

¹⁸Se ngu vava vanana va Oholibhama, msikati wa Esawu.

¹⁹Evo mbanana va Esawu, i ku ene Edhomi ni tinduna tawe.

²⁰Vanana va Seyiri, wa muhori, vona vaaki va ditiko da Edhomi, ngu vava: Lotani, Sobhali, Zibheyami ni Ana,

²¹Dhixoni, Eseri ni Dhizani, evo mbathangeli va ka Hori, vanana va Seyiri, ditikoni ka Edhomi.

²²Vanana va Lotani i ti Hori ni Hemani, ni ndiya ya Lotani, a nga ti dhanwa ku i Timina.

²³Vanana va Sobhali ngu vava: Alivhani, Manahati, Ebhali, Sefo ni Oname.

²⁴Ngu vava vanana va Zibheyon: Aya ni Ana. Ana ngene awule a nga mana sisima sa mati o hisa txiwulani, mbimo yi ene a nga txi dyisa timbongola ta Zibheyon, tate wakwe.

²⁵Ana a velekile mwanana wa dizambi, Dhixoni, ni mwanana wa muhorana, Oholibhama.

²⁶Se ngu vava va Dhixoni: Hendani, Esibhani, Itrani, ni Kerani.

²⁷Avava mbanana va Eseri: Bhilani, Zahavhani, ni Akani.

²⁸Vanana va Dhisani ngu vava: Uzi ni Arani.

²⁹Vathangeli va ka Hori ngu vava: Mthangeli Lotani, mthangeli Sobhali, mthangeli Zibheyami, ni mthangeli Ana,

³⁰ni mthangeli Dhisomi, ni mthangeli Eseri, ni mthangeli Dhisamu. Avava ngu vona vathangeli va ka Hori, ngako hi txi londeta ngu tinyumba tawe, ditikoni ka Seyiri.

³¹Ngu vava vafumeli va va nga fuma ditikoni ka Edhomi, na kusanzi kufumwa ngu mfumeli wa ka Israyeli.

³²Ditikoni ka Edhomi ku ti fumile Bhela, mwana Bheyori, ani didhoropa da kona di ti dhanwa ku i Dhanabha.

³³Bhela mbimo yi a nga fa, se ha wukhaloni kwakwe ku fumile Jobhabhe, mwana Zera, wa kuta ngu Bhozira.

³⁴Jobhabhe ngako a di fite, ha wukhaloni kwakwe ku fumile Husame, wa ditikoni ka Vatemani.

³⁵Se a di fite Husame, wukhalo wakwe wu to tekwa ngu Hadhadhe, mwana Bhadhadhe, wule a nga xula Vamidhiyani, ditikoni ka Mowabhi, a fumile na a txi zumba didhoropani ka Avhite.

³⁶Hadhadhe ngako a di fite, wukhalo wakwe wu to fumelwa ngu Samila, wa ditikoni ka Masireka.

³⁷Samila mbimo yi a nga fa, ha wukhaloni kwakwe ku fumile Sawule, wa Rehobhoti, hafuhi ni mnambo wa Ewufrate.

³⁸A di fite Sawule, ku to fuma Bhahali-Hanani, mwana Akobhori.

³⁹Bhahali-Hanani, mwana Akobhori, a to fa, se wukhalo wakwe wu to tekwa ngu Hadhadhe a txi fuma; didhoropa da kona di ti dhanwa ku i Fawu; msikati wakwe a ti dhanwa ku i Mehetabheli, mwana Mazahabhe.

⁴⁰Mthangeli Timina, mthangeli Alivha, mthangeli Jetete,

⁴¹mthangeli Oholibhama, mthangeli Ela, mthangeli Pinomi,

⁴²mthangeli Kenazi, mthangeli Temani, mthangeli Mibhizari,

⁴³mthangeli Magidhiyeli, mthangeli Irani, avava ngu vona vathangeli va ka Edhomi, madingano ni tinyumba tawe, ka ditiko di i kuthomba yawe; awuwa i Esawu, tate wa Edhomi.