Read chopi Genesisi 37 Bible Online

Genesisi 37 - chopi bible

Genesisi 37

¹Josefa a to zumba ditikoni ka Kanana, amu tate wakwe a nga ti akile kona.

²Ngu tiya tiveleko ta Jakobe: Josefa a ti ni tanga ya digumi da malembe ni mtxhanu ni mambidi, ene a txi dyisa tinvuta ta tate wakwe, kumweko ni vanawe, vanana va Bhiliha ni Zilpa, vasikati va tate wakwe; Josefa a ti ti geletela tate wakwe timhaka to biha, ati vanawe va nga txi ti mahetela.

³Se Israyeli a ti ti randa ngutu Josefa, kupinda votshe vanana vakwe, nguko i ti mwanana wa wukhovana wakwe; se a to rumisa ku e rungelwa dibhaji do lapha da mixowo yayingi.

⁴Vanawe ngako va txi wona ti to tate wawe a randa ngutu Josefa, kupinda votshe vamwani vanawe, va to khata ku m'vengela ngutu, va si lavi ni kuwombawomba nayo ngu kuthutha.

⁵Sekoko, dimwani da masiku, Josefa a to lora ni wusiku, se ngu msana a to txhamusela mloro wuwa ka vanawe; ngu mhaka yeto, livengo lawe li to kula ngutu.

⁶Ene a va gete, a txi khene: “Engisani timhaka ta mloro wu ni nga va nawo:

⁷Hi ti ti maneka hi di thembweni, hi txi sunga tinyanda ta fulaho; nyanda yangu yi to wuka yi txi ema, se tanu tinyanda ti to randela nyanda yangu, ti txi yi khizamela.”

⁸Sekoko vanawe va to kha vona kwakwe: “Ti komba ti to awe u na fuma txitimwi kwathu kani? Niku awe u na hi thangela nga m'thu wa hombe kani? Ngu kumaha yeto, va to m'vengela ngutu, ngu mhaka ya miloro yakwe, ni mapswi akwe.”

⁹Ene a to lora wumwani mloro, awu a nga wu xawutela ka vanawe, a txi khene: “Ni lorile wumwani mloro: Ni woni ditambo, mtxima ni digumi da tinyeleti ni yimweyo, na si txi ni khizamela.”

¹⁰Ene a to xawutela toneto ka tate wakwe ni ka vakomwakwe, aniko tate wakwe a to mkawuka, a txi khene: “Mloro wa txani wonewo u nga va nawo kani? Ti komba ti to ani, ni mame wako ni vakomwako, hi na khizama hahatshi masoni kwako, kani?”

¹¹ Vakomwakwe va to zumba va txi m'vengela; kambe tate wawe a to veketa mapimoni kwakwe timhaka tiya.

¹²Vanawe Josefa va to ya Sikemi, va txi ya dyisela kona mitxhambi ya tate wawe,

¹³Israyeli a to womba ka Josefa a txi khene: “Vakomwako va tsute Sikemi, va txi ya dyisela kona mitxhambi. Ngono, ni na kuruma kwakwe.” Se Josefa a to xamula, a txi khene: “Ni ti lulamisete.”

¹⁴Ene a m'gete, a txi khene: “Tsula u txi ya wona ti to vakomwako va hanyisa kutxani ni mitxhambi, se u na ni wuyisela mahungu awe.” Josefa a di rumilwe, a to khukha mkovani ka Hebroni a txi ya hoka Sikemi.

¹⁵M'thu wokari wa dijaha, a to wona Josefa a txi timela nzila amu txiwulani, e mu wotisa, a txi khene: “U lava txani kani?”

¹⁶Ene a xamute, a txi khene: “No lava vakomwangu. Maha wuxinji u txi ni gela, amu va dyiselako kona mitxhambi yawe.”

¹⁷Wa dijaha a m'gete, a txi khene: “Vona va khukhile ka wuwa wukhalo, ni va engisile va txi kha vona: A hi yeni Dhotani.” Josefa koko a to tsimbila e lava vakomwakwe, a txi ya va manela kona Dhotani.

¹⁸Vona va mu woni a di ngadi kule, se na a sanzi kuhoka hafuhi kwawe, va to langana ti to ve m'daya.

¹⁹Va to wombawombisana va txi kha vona: “Ndiyole nyamilorwani, wata!

²⁰Ngonani hi ta m'daya hi txi mrinza amu ka diphala dokari, hi na ya womba ti to txihari txokari txa txitinga txi m'date, txi txi m'dya. Hi lava kuwona ti to miloro yakwe yi na thuma txani!”

²¹Aniko Rubheni, a di engisile timhaketo, a to lava nzila ya kuponisa Josefa manzani kwawe. A to womba, a txi khene: “Hi nga m'dayeni!”

²²Rubheni a to engeta, a txi khene: “Hi nga theketeni mnoha wakwe! Mrinzeni ka diphala da mu txiwulani, aniko mi nga mpfinyeni ngu manza anu! Ene a ti ko zama ku m'hulukisa manzani kwawe, kasiku e mtshumeta a txi m'yisa ka tate wakwe.”

²³Ngako Josefa a di hokile hafuhi kwawe, va to mñola va txi mu ambula dibhaji dakwe do ziza, adi a nga ti ambate.

²⁴Va to mñola va txi mtshotsha mu diphalani; i ti diphala da diphanga, mndani ka dona ku ti si nga ni mati.

²⁵Ti di ngeto, va to khalahatsha va txi dya sakudya. Mbimo yi va nga gula maso, va to wona mtxawa wa va ka Ismayeli, va kuta ngu Gileyadhi; makamelu awe ma ti rwate mafura o bhumula, ni makha, ni mira, va txi ya naso Egipta.

²⁶Sekoko Judha a to womba ka vanawe, a txi khene: “Ti vhuna txani kudaya mnanda wathu, hi txi sisa mnoha wakwe, kani?

²⁷Ngonani, a hi mxaviseni ka va ka Ismayeli, hi nga nyeteni manza athu; ene mnanda wathu, wa nyama yimweyo ni mnoha wumwewo ni nathu.” Se vanawe va to mu engisa.

²⁸ Ku ti ngako vanyamabhindu va Midhiyani va txi pinda ngu hafuhi kwawe, vona va to humisa Josefa ngu mu diphalani, ve mxavisa Josefa ka va ka Ismayeli ngu magumi mambidi a maxekele a silivhela, se vanyamabhindu va to mteka, ve tsula nayo Egipta.

²⁹Ngako Rubheni a di wuyile koko, e ta solela mu diphalani, e wona ti to Josefa kha nga ho mu diphalani; a to vharula syambalo sakwe;

³⁰se a di tshumete a txi wuya ka vanawe, a ti ta khene: “Mfana kha nga ho amule! Se ani ni ya hani kani?”

³¹Sekoko va to daya mabhongwe mmweyo, ve teka dibhaji da Josefa va txi di nakanisa ngu mnoha

³²va txi rumela dibhaji dile do lapha ka tate wakwe, kumweko ni mapswi awa: “Hi nga wona dibhaji diya, hi ngadi mana. Ina hi nga dona dibhaji da mwanako kani?”

³³Ene a di di woni a ti khene: “Ngu dona dibhaji da mwanana wangu! Txihari txokari txa txitinga txi m'date txi txi m'dya! Josefa mwanana wangu a bhandisetwe!”

³⁴Sekoko Jakobe a to vharula syambalo sakwe, e phamba disaka txiwununi kwakwe, a txi maha mkhwasi, ni masaluko o dila mwanana wakwe, ngu mbimo ya kulapha.

³⁵Vanana vakwe votshe vamajaha ni vamahorana va to ya mkhongotela, aniko ene a to lamba kukhongotelwa, a txi khene: “Ahim-him ni na dila ni txi relela ka mwanana wangu, kufani.” Jakobe tate wawe, a to msaluka.

³⁶Ti di ngeto, Vamidhiyani va to ya xavisa Josefa ditikoni ka Egipta, ka mfumeli Potifari,[88] mthenwa wa Faro, i nga ti mthangeli wa vawoneleli.