Read chopi Genesisi 38 Bible Online

Genesisi 38 - chopi bible

Genesisi 38

¹Ka mbimo yoneyo, Judha a to hambana ni vanawe, a txi ya zumba m'tini ka m'thu wokari wa Adhulamu a nga ti dhanwa ku i Hira.

²Koneyo Judha a to ya wona dihorana dimwedo, mwanana wa mkanana, a nga ti dhanwa ku i Suwe; ene a to mteka e maha msikati wakwe, e zumba nayo.

³Se Suwe a to mana txirumbu, e veleka mwanana wa mfana, awu a nga mraya ditina daku i Eri.

⁴A to amukela tximwani txirumbu e veleka kambe mwanana wa mfana, e mraya ditina daku i Onani.

⁵A to engeta kambe a txi mana txirumbu txa wuraru, e veleka mwanana wa dizambi, e mraya ditina daku i Xela; ka mbimo yoneyo a nga velekwa Xela, Judha a ti ti maneka a di Kesibha.

⁶Judha a to tekela Eri mwanakwe wa matiwula, msikati, a nga ti dhanwa ku i Tamari.

⁷Aniko Eri, matiwula a Judha, a henyisile MKOMA Txizimu, ngu mahanyelo akwe o biha, se Txizimu txi mahile ti to ene efa.

⁸Sekoko Judha a to womba ka Onani, a txi khene: “Tshangana ni msikati wa mwananu, u txi hetisa tifanelo ta ku msambela thaka, ngako i ku ndombe yako, kasi u wusa liveleko la mkomwako.”

⁹Ti di ngeto, Onani ngu kuziva ti to liveleko la kona kha li na mbi mlumba, txikhati ni txikhati txi a nga txi tshangana nayo, a ti ti theketela hahatshi, kasiku asi wuseli mkomwakwe liveleko.

¹⁰Mhaka yiya a nga txi yi maha, yi to henyisa MKOMA Txizimu, txi maha ti to nene efa.

¹¹Sekoko Judha a to womba ka Tamari maane wakwe, a txi khene: “Tshumela u txi ya m'tini ka tate wako, u di noni, kala kuza mwanana wangu Xela e kula. Nguko a txi alakanya ti to a nga thuka efa nene, kufana ni vakomwakwe. Se Tamari a to tsula eya zumba m'tini ka tate wakwe.”

¹²Ngako ku di pindile masiku amangi, mwanana wa Suwa wa dihorana, i nga ti msikati wa Judha, a to fa. Se Judha a di gwitile madila, a to ya Timina ni Hira, mndoni wakwe wa Adhulamu, kasi ta kuya kaya tinvuta takwe.

¹³Vathu va to gela Tamari va txi kha vona: “Masale wako wa tsula Timina kuya kaya tinvuta takwe.”

¹⁴Sekoko a to thavisa syambalo sa mkhwasi, a txi ambala so hehuka, e ti fenengeta, a txi ya khalahatsha ha txikeni ka didhoropa da Enayime, di ku nzilani ka kuya Timina. Nguko a woni taku, Xela se a kute, aniko kha nzi kuningelwa kasiku e tekwa ngu ngene.

¹⁵Judha ngako a di mu woni a to pimisa ati to digelegele, ngukuwa ene a nga ti ti fenengetile khohe.

¹⁶A to ya hafuhi kwakwe eya khene: “Ngono ni ta wulela kwako, na ku kombela.” Nguko a ti si ti zivi ti to ngene maane wakwe. Aniko Tamari a ti khene: “Ngako u txi otela ni nani, u na ni ninga txani, kani?”

¹⁷Ene a to xamula, a txi khene: “Ni na ku rumela phongo ya ha mtxhambini kwangu.” Tamari a to khene: “Ni ninge txo thembisa ngu txona taku u na ni rumela phongo!”

¹⁸Sekoko ene a to muwotisa, a txi khene: “Njixambanyo muni ni no kuninga, kani?” Tamari a to khene: “Ni ninge ringi yako, liketani lako, ni ndonga eyo u ku nayo manzani kwako.” Ene a to mninga soneso, se a txi ya otela nayo; Tamari a to mana txirumbu.

¹⁹Ngu msana Tamari a to khukha e tsula, eya thavisa nguwo yi a nga ti ti fenengetile ngu yona, a txi ambala kambe syambalo sa mkhwasi.

²⁰Judha a to rumela phongo ngu mndoni wakwe Hira wa Adhulamu, kasiku eya amukela simaha sakwe sa txixambanyo ka wamsikati eneyo, aniko Hira kha nga ya mmana.

²¹Ene a wotisile ka vathu va wukhalowo, a txi khene: “Ahani wamsikati wule wa digelegele a zumbako ha nzilani ka Enayime kani?” Vona va xamute va txi kha vona: “Ahawa kha kuzivi kuzumba digelegele!”

²²Hira a to tshumela, a txi ya ka Judha, a txi ya m'gela ku khene: “Kha na nga ya mmana. Hambi ni vathu va wukhalowo va ni gete va txi kha vona, ahawa kha kuzivi ka nga maneka digelegele.”

²³Sekoko Judha a ti khene: “A na zumba ni simaheso sangu a ku naso, e si xayisa; e thuka e hi thela tingana, nguko ani ni rumete phongo, aniko awe khwa nga ya mmana.”

²⁴Ngu msana ka mitxima yiraru, Judha a to ya gelwa ngu vathu va txi kha vona: “Tamari maane wako, ana ni txirumbu, a nga maha wugelegele, e txi mana ka wona wugelegelewo.” Sekoko Judha a to khene: “M'humiseni hahanze, kasiku e hiswa!”

²⁵Va di mñote, Tamari a to rumela ati to veya womba ka masale wakwe atiya: “Kha ditshuri ni ni txirumbu, kambe ni txi mani ni nyamne wa simaha siya. Si wonisiseni, si lumba mani, txitambu txiya, ni[89] phera yiya, liketani liya ni ndonga yiya kani?”

²⁶Judha asi woni simaha sile, e si ziva, a txi khene: “Ene a lulamile kupinda ani, nguko kha na mningela ka mwanana wangu Xela.” Kukhukhela konako kha nga va a di otete nayo kambe.

²⁷Mbimo yi ku nga hoka txikhati txo hefemula, kuwonekile tito, mrumbuni ka Tamari ku ti ti ni vanana vambidi va mahasa.

²⁸“Se ka mbimo yi a nga ti hefemula, mmweyo mwanana to humisa dianza, se nyakhotwe, a to di ñola e di sunga ngoti yo bhilivila, kasi kukomba tito: Awuwa ngene wa matiwula.”

²⁹Aniko ku mahekile ti to ene e tshumeta dianza, ku txi thanga mmwani e huma! Se nyakhotwe a ti khene: “U si kotisile kutxani kukunyulula u txi huma!” Se va to mraya ditina daku i Farezi.

³⁰Ngu msana ku to huma mwanawe, awule a nga ti sungilwe ngoti yo bhilivila ka dianza dakwe, ve mraya ditina daku i Zera.