Read chopi Genesisi 4 Bible Online

Genesisi 4 - chopi bible

Genesisi 4

¹Se wamwamna a to ziva Evha, msikati wakwe. Ene a to mana txirumbu e veleka[14] Kayini; sekoko a to khene: “Ni mani mwanana wa mfana, ngu kuvhuna ka MKOMA.”

²Se a to veleka mwanawe,[15] Kayini. Abhele a to maha m'dyisi wa tinvuta, Kayini eva m'dimi wa mafu.

³Ku di pindile mbimo yokari, Kayini a to maha ka MKOMA mningelo wa mihando ya mafu.

⁴ Se Abhele nene a to ningela matiwula a tinvuta ta txibalani kwakwe, to nona. MKOMA a to wona ngu kutsaka Abhele ni mningelo wakwe;

⁵aniko kha wona ngu kutsaka Kayini ni mningelo wakwe. Kayini a to henya ngutu, ni khohe yakwe yi to thuvika.

⁶MKOMA Txizimu a wombile ka Kayini, a txi khene: “Ngu kutxani u txi henya ni khohe yako yi thuvika kani?

⁷Ina ngako u txi maha ta tinene, khu na mbi[16] u amukelwa kani? Se ngako u txi maha to biha, txionho txi na ku baramela ha txikeni, txi txi lava ku ku pfinya, aniko awe wa sikota ku txi xula.”

⁸ Se Kayini a to langana ni mwanawe Abhele: “A hi tsimbile thembweni.” Se ku to maheka taku, va di thembweni, Kayini e wukela mwanawe Abhele, a txi m'daya.

⁹Txizimu txi to kha txona ka Kayini: “Ahani Abhele, mwananu kani?” Kayini a xamute, a txi khene: “Kha ni m'zivi. Kasi ani ngani ni ku mxayisi wa mwanathu kani?”

¹⁰Se Txizimu txi to kha txona: “Njitxani u nga maha kani? Dipswi da mnoha wa mwananu, da pfala ha mafuni, kala tinzeveni kwangu.

¹¹Se konkuwa, u ruketetwe ha mafuni, aale ma nga asama txisofu txa ona, kasi kusela ngu manzani kwako, mnoha wa mnanda wako.

¹²Hambi u txi dima mafu, kha ma na mbi kuninga txilo txa mihando ya ona. U na pepeseka u tutuma-tutuma ha mafuni.”

¹³Sekoko Kayini a to khene ka MKOMA: “Txitsayiso txangu nja hombe ngutu kupinda[17] kudivalelwa.

¹⁴Wa ni tutumisa nyamsi ka ditiko diya; ni kurumetwa kusisala kule ni khohe yako, ni na tsimbila ni txi thava-thava ni kupepeseka ha mafuni, ni wu a no khata ku ni mana, a na ni daya.”

¹⁵MKOMA Txizimu a xamute, a txi khene: Ahim-him, ku txi maheka ti taku m'thu e daya Kayini, a na khawuliswa mtxhanu wa sikhati ni simbidi.[18] MKOMA a to m'veka txikombiso txokari, ti taku, a si dawi ngu wuhi ni wuhi a mmanako.

¹⁶Se Kayini a to khukha ngu masoni ka MKOMA, eya zumba ditikoni ka Nodhe, wutxani ka Edheni.

¹⁷Se Kayini a to ziva msikati wakwe, a to mana txirumbu e veleka Enoki; a to aka didhoropa e di raya ditina da mwanana wakwe Enoki.

¹⁸Se Enoki a to veleka Iradhe; a nga veleka Mewujayeli; Mewujayeli a to veleka Metusayeli; Metusayeli a to veleka Lameki.

¹⁹Se Lameki a tekile vasikati vambidi: Mmweyo a ti dhanwa ku i Adha, ni mmwani ditina dakwe i ti ti Zila.

²⁰Se Adha a to veleka Jabhale, awule i nga ti tate wa vale va nga zumba matendani, kambe va ni sifuyo.

²¹Ditina da mnanda wakwe i ti Jubhali, awule i nga ti tate wa vale va nga ti veta sitende ni misengele.

²²Zila a to veleka Tubhali-Kayini, txhari wotshe mthumo wa koporo ni simbi; se ndiya ya Tubhali-Kayini i Nahama.

²³Se Lameki a to khene ka vasikati vakwe: “Adha ni Zila, engisani dipswi dangu; vasikati va Lameki, engisani kuwomba kwangu: Ni date wamwamna, nguko a ni balisile, ni dijaha nguko di ni ganyatile.

²⁴Nguko Kayini mtxhanu wa sikhati ni simbidi[19] kuphota; aniko Lameki mtxhanu wa magumi ni mambidi, a kuwuyetwa mtxhanu ni kumbidi.”

²⁵Se Adhamu a to engeta e ziva msikati wakwe; awu a nga mana mwanana. A to mraya ditina[20] daku i Sete. Nguko ene a ti khene: “Txizimu txi ni ningile mmwani mwanana kasi kutsiveta Abhele, wu a nga dawa ngu Kayini.”

²⁶Nene Sete a mani mwanana, awu a nga mraya ku i Enosi; sekoko ku to khata kukhozelwa MKOMA.