Read chopi Genesisi 41 Bible Online

Genesisi 41 - chopi bible

Genesisi 41

¹Se msana ka malembe mambidi, Faro a to lora mloro, e lora a di emile mabambe ka mnambo wa Nilo.

²Faro a woni tihomu ta mtxhanu ni timbidi ta vamakati, ti txi huma ngu mnamboni ka Nilo, ti di enile, totshura, ti txi ya dya lihawu.

³Msana keto, Faro a woni kambe timwani tihomu ta mtxhanu ni timbidi ta vamakati, to onda, ta migwatsamba, ti txi huma ngu mnamboni, ti txi ema hafuhi ka tile to khata, mabambe ka mnambo wa Nilo.

⁴Tihomu tile ta vamakati to biha ni kuonda, ti to khadamulela tile ta vamakati ta mtxhanu ni timbidi to ena ni kutshura. Sekoko Faro a to wuka.

⁵Faro a to engeta a txi otela, se e lora mloro wa wumbidi: A woni mtxhanu wa mihumbo ni yimbidi ya mafaka kuhuma ngu ka ditshanga dimwedo, yi di ni tipfhaka totshura.

⁶Aniko msana keto, a to wona yimwani mihumbo ya kuwuniswa ni kuhiswa ngu moya wa wutxani, yi txi mila ngu msana ka yile yo khata.

⁷Kambe mihumbo yile yo wuna yi to mita yile ya mtxhanu ni yimbidi ya kunona. Sekoko Faro a to wuka, a txi wona ti to i ti ti mloro.

⁸Se ku to maheka taku, ni mixo, mbilu ya Faro yi maneka yi di ha kukaratekani ka hombe, se e dhana votshe vanyamsoro ni vanyatixolo va ditiko da Egipta, e va xawutela miloro yi a nga va nayo, aniko ni wammweyo kha sikota ku yi txhamusela.

⁹Sekoko awule wa mthangeli wa vatheleli a to womba ka Faro, a txi khene: “Nyamsi ni fanete kutitshanza mnandu wangu.”

¹⁰Mbimo yi Faro a nga ti henyete sithumi sakwe, a rumete ti to ani ni mthangeli wa vabhiki va mapawu, hi txi khotelwa yumbani ka mthangeli wa vawoneleti,

¹¹sekoko hi to lora miloro, ka wusiku wumwewo, ani ni nene, madingano ni tona ti mmweyo ni mmweyo a nga txhamusela mloro wakwe.

¹²Se konaho, a ti ti kumweko ni nathu, mmweyo wa dizambi da Muhebheru, txithumi txa mthangeli wa vawoneleti, hi to mxawutela miloro yathu, se ene e hi txhamusela atiya mloro wammweyo ni mmweyo wathu wu wombako tona.

¹³Se totshe ti mahekisile tona ti a nga hi txhamuselisa tona: Ani ni manekile ni txi wuyiswa ha mthumoni kwangu, kasi mthangeli wa vabhiki va mapawu, a datwe ngu kutxikitwa.

¹⁴Sekoko Faro, a to ruma vathu veya dhana Josefa, va txi kha vona: Kuluveta ku mu humisa ngu mkorani. Ene a to yola maletu, e txitxa syambalo, a txi tsula masoni ka Faro.

¹⁵Se Faro a wombile ka Josefa, a txi khene: Ani nive ni mloro, aniko kha ka nga maneka m'thu ni wammweyo wo sikota ku wu txhamusela.

¹⁶Josefa a xamute ka Faro, a txi khene: “Eto kha ti nga kwangu!” Txizimu ngu txona txi no ninga Faro txhamuselo yi yi lavekako.

¹⁷Sekoko Faro a to khene ka Josefa: Kulorani kwangu, ni lorile ni di mabambe ka mnambo wa Nilo.

¹⁸Ku to huma mtxhanu wa tihomu ni timbidi ta vamakati, ti txi huma ngu mnamboni, to ena ni kutshura, ti txi dya lihawu.

¹⁹Se msana keto, ku to huma timwani tihomu ta mtxhanu ni timbidi ta vamakati, ta kuonda, na ti di bihile ngutu aha kaku, kha ni zivi kuwona tihomu to bihiseto, ka ditiko dotshe da Egipta.

²⁰Se tihomu tile to khata ta mtxhanu ni timbidi ta vamakati, ta kuonda ni kubiha, ti to khadamulela tihomu tile ta mtxhanu ni timbidi to khata ta vamakati ta kuena;

²¹kambe ti di khadamulete tile timwani, kha ka woneka taku ti dyite txilo nguko ti to simama ti zumba i di migwatsamba,[92] kufana ni kale. Sekoko ni to vhumuka.

²²Ngu msana ni to wona kulorani kwangu, mihumbo ya mtxhanu ni yimbidi yo pfuna, yi di tshurile, yo huma ngu ka ditshanga dimwedo.

²³Se msana ka yile, ku to huma yimwani mihumbo ya mtxhanu ni yimbidi, ya miburu ya kuoma, ni kuhiswa ngu moya wa wutxani.

²⁴Se mihumbo yile ya miburu, yi to khadamula yile ya mtxhanu ni yimbidi yo pfuna. Ani ni xawutete ka vale vo txhariha, aniko kha ka maneka ni wammweyo wo ni txhamuselo.

²⁵Sekoko Josefa a to khene ka Faro: “Mloro wa Faro mbumwewo dwe; ati Txizimu txi no maha, ngu tile txi nga gela Faro.”

²⁶Mtxhanu wa tihomu ni timbidi ta vamakati, totshura, ti kombisa mtxhanu wa malembe i mambidi; mtxhanu wa mihumbo ni yimbidi yo tshura yi kombisa mtxhanu wa malembe ni mambidi; aniko mloro wumwewo dwe.

²⁷Se mtxhanu wa tihomu ni timbidi ta vamakati, ta kuonda ni kubiha, ti nga ti ti huma msana ka tile, ti kombisa mtxhanu wa malembe ni mambidi; kufana ni mtxhanu wa mihumbo ni yimbidi ya kuoma ni kubiha, ni kuhiswa ngu moya wa wutxani; njikombiso txa mtxhanu wa malembe ni mambidi a nzala.

²⁸Ngu toneto, ni nga womba ka Faro; ati Txizimu txi no maha, txi kombisile ka Faro.

²⁹Se wona taku mata malembe a mtxhanu ni mambidi aawa ku no va ni kupfuna ka dotshe ditiko da Egipta.

³⁰Ngu msana ma nata malembe a mtxhanu ni mambidi, a nzala, aha koza ku txi divalwa kotshe kupfuna ditikoni ka Egipta, se nzala yi na heta ditiko.

³¹Kha ku na mbi alakanywa kambe ati ku nga ti pfunisile tona ditikoni muwa, ngu mhaka ya nzala yi yi no vaho, nguko yi na va i di ya hombe ngutu.

³²Ngako mloro wuwa wa Faro wu nga woneka sikhati simbidi, tikomba ti to mhakeyo yi tsanisilwe ta tinene ngu Txizimu, kambe Txizimu txi na kuluvetela ku ti maha eto.

³³Se akuwa awe Faro, sawula wamwamna wa mapimo, wo ziva, u m'veka txitimwi ka ditiko da Egipta.

³⁴Maha toneto awe Faro, u veka vathangeli ka dotshe ditiko, kasi ku va na veketa didhawa da wutxhanu ka ditiko da Egipta, mndani ka mtxhanu wa malembe ni mambidi a kupfuna.

³⁵Va na sengeletela sakudya sotshe sa malembe awa amanene matako, va txi veketa fulaho ngu dianza da Faro, amu sizendani va na veketela silo madhoropani ve si xayisa.

³⁶Sakudyeso si na va sa ku ta hanyisa ditiko mndani ka malembe ale a mtxhanu ni mambidi a nzala, yi yi no wela ditiko da Egipta; kasiku ditiko di si fuviswi ngu nzala.

³⁷Kambe mapswi awa ma to maha amanene ka Faro ni ka sotshe sithumi sakwe.

³⁸Se Faro a to khene ka sithumi sakwe: “Ina hi nga mmana mmwani m'thu wo nga wuwa, awu moya wa Txizimu wu ku kwakwe kani?”

³⁹Msana keto, Faro a to khene ka Josefa: Ngako Txizimu txi nga ku tuletela totsheto, kha nga ho mmwani a ku ni mapimo ni wutxhari wo nga awe.

⁴⁰Awe u na va mthangeli wa nyumba yangu, ni vathu vangu votshe va na fumwa ngu milayo yako, ani ngu mhaka ya txikhunja txangu txa wukoma, ni va ni di wa hombe kwako.

⁴¹Faro a to engeta a txi khene ka Josefa: “Wona, ani na kuveka txitimwi ka dotshe ditiko da Egipta.”

⁴²Se Faro a to thavisa phera ngu dianzani kwakwe, e yi veka ka dianza da Josefa, a to mu ambekisa syambalo sa linyu yo hehuka, a txi mu ambekisa liketani la nzalama thamoni kwakwe.

⁴³A to maha ti to Josefa e kwela ka txikotxikani dakwe da wumbidi a nga ti ti nado, na ku txi huwelelwa masoni kwakwe, va txi kha vona: “Abreki” Khizamani. Ngu toneto, Josefa a to vekwa e mahwa mthangeli wa ditiko dotshe da Egipta.

⁴⁴Se mfumeli Faro a to khene ka Josefa: “Ani ngani Faro, aniko hahanze ka kutumetiswa ngu ngawe, kuwalo ni wammweyo a no guleta dianza mwendo mkondo ka ditiko dotshe da Egipta.”

⁴⁵Faro a to raya Josefa ditina, daku i Safaneti-Faneki,[93] e mninga Asenati, mwana Potifera mphaxeli wa Oni, e maha msikati wakwe. Se Josefa a to tsimbila-tsimbila ka ditiko dotshe da Egipta.

⁴⁶Josefa a ti ti ni tanga ya magumi mararu a malembe, mbimo yi a nga ya maneka masoni ka Faro, mfumeli wa ditiko da Egipta. Se a to khukha Josefa masoni ka Faro, e tsimbila-tsimbila ka dotshe ditiko da Egipta.

⁴⁷Ditiko da Egipta di to maneka di di pfuni ngutu sakudya mndani ka mtxhanu wa malembe ni mambidi.

⁴⁸Va to sengeletela sotshe sakudya sa malembe awa a mtxhanu ni mambidi a kupfuna ditikoni ka Egipta; va txi xayiswa sakudya ka otshe madhoropa, si veketelwa madhoropani sotshe sakudya sa tithembwe ta madhawani ka didhoropa.

⁴⁹Ngu toneto, Josefa a to sengeletela fulaho yayingi ngutu, nga mtxhefa wa lineneni, a txi tandeka ni kubalela, ngu kugwitelwa ngu sibalo.

⁵⁰Na kusanzi kuhoka malembe a nzala, Josefa a to velekelwa vanana vambidi vavafana ngu Asenati, mwana Potifera, mphaxeli wa Oni.

⁵¹Se Josefa a to raya matiwula akwe ditina daku[94] i Manasi, a txi khene: “Txizimu txi ni mahile ni divala sixaniso sangu ni wotshe m'ti wa tate wangu.”

⁵²Mwanana wa wumbidi, a mrayile ditina daku[95] i Efrayime, a txi khene: “Txizimu txi ni mahile ni anda ngu vanana ditikoni muwa ka kuxupheka kwangu.”

⁵³Sekoko ma to guma malembe ya kupfuna kuwa ku nga vaho ditikoni ka Egipta,

⁵⁴ se me khata malembe a mtxhanu ni mambidi a nzala nga ti Josefa a nga ti wombisile tona; ka otshe matiko ku manekile nzala, aniko ka dotshe ditiko da Egipta ku ti ti ni sakudya.

⁵⁵ Mbimo yi ditiko dotshe da Egipta di nga maneka di txi xupheka ngu nzala, vathu va to ya dila ka Faro, va txi ya kombela sakudya; se Faro a to khene ka votshe Vaegipta: “Tsulani ka Josefa, ni tihi ti a no mi gela, mahani.”

⁵⁶Na ku di ni nzala koko ka dotshe ditiko, Josefa a to tula sizenda sotshe sa fulaho, a txi xavisela Vaegipta; nguko nzala yi ti ti simama ditikoni ka Egipta.

⁵⁷Se otshe matiko ma txi ta Egipta, kasi ku ta xava sakudya ka Josefa, mbimo yile nzala yi nga ti ti simama ka otshe matiko.