Read chopi Genesisi 42 Bible Online

Genesisi 42 - chopi bible

Genesisi 42

¹Sekoko Jakobe a di engisile ti to ditikoni ka Egipta yi ho fulaho ya kuxaviswa, a to khene ka vanana vakwe: “Ngu kutxani mi gwitelako kuzumba mi txi wonetelana, kani?”

² Se e engeta a txi khene: “Ani ni ti engisile ati to ditikoni ka Egipta, yi ho fulaho yi xaviswako. Relelani mi ya hi xavela, kasiku hi nata dya hi txi hanya, hi si fi ngu nzala.”

³Sekoko vanawe va Josefa va digumi, va to relela va txi ya Egipta, veya xava fulaho.

⁴Aniko Bhenjamini, mwanawe wa Josefa, kha lekwa ngu Jakobe e tsula ni vanawe, nguko a pimisile tito, a nga thuka e humelwa ngu phango yokari.

⁵Ngu mhaka yeto vanana va ka Israyeli va to longoloka ni vamwani veya tshunza Egipta; nguko ku ti ti ni nzala ditikoni ka Kanana.

⁶Josefa koko i ti ene mthangeli wa ditiko da Egipta; ngene kambe a nga ti xavisa sakudya ka vathu votshe; se vanawe va to ta bwaka ve khizama masoni ka Josefa, va txi wonetela hahatshi.

⁷Kambe Josefa a di woni vanawe, a to va ziva, aniko a to ti mahisa a txi nga mthuyo, e womba-womba navo ngu wurena. A to va wotisa, a txi khene: “Mi ta ngu hani kani?” Se vona va mxamute va txi kha vona: “Hi ta ngu ditikoni ka Kanana, ho ta xava sakudya.”

⁸Josefa koko a va zivile vanawe, aniko vona kha va m'ziva.

⁹ Sekoko Josefa a to alakanya miloro yi a nga lora ngu didhawa dawe, se e va gela ku khene: “Anu mi sinyengwani! Mi tela ku ta xola mi wona wufenze wa ditiko.”

¹⁰Vona va kanetile va txi kha vona: “Ahim-him awe nyamne wathu; athu sithumi sako hi tete ku ta xava sakudya.

¹¹Athu hotshethu hi vanana va wamwamna mmweyo; hi vavamna vavanene; athu sithumi sako kha hi nga sinyengwani!”[96]

¹²Kambe ene a va gete, a txi khene: “Ahim-him; mi tela ku ta xola, mi wona makhalo o mbi tsana a ditiko!”

¹³Vona va nje kha vona: “Athu sithumi sako, hi digumi ni vambidi vakoma ni vananda, vanana va wamwamna mmweyo, wa ditikoni ka Kanana; mnanda wathu wo gwitisa a sate ni tate wathu, kambe ku ti ti ni mmwani, aniko kha ngadi ho.”

¹⁴Sekoko Josefa a to khene kwawe: “Ani ni womba ditshuri: Anu mi sinyengwani.

¹⁵Zivani ti to mi na xolisiswa; na xambanya ngu wutomi wa Faro, ti to kha mi na mbi huma hawa, ngako asi ti mnanda wanu wa tshole.

¹⁶Rumani mmweyo wanu eya wuyisa mnanda wanu; anu motshenu mi ñotwe, kala kuza hi wonisisa ti to ati mi wombako nda ditshuri mwendo hi nga ta ditshuri. Hahanze keto, ni xambanya ngu wutomi wa Faro, ti to anu mi sinyengwani.”[97]

¹⁷Se a to va vekela vawoneleti masiku mararu.

¹⁸Kambe ka ditshiku da wuraru, Josefa a va gete ku khene: “Mahani tiya, mi na hanya, nguko ani ni thava MKOMA Txizimu.

¹⁹Ngako mi di vavamna vavanene, mmweyo wanu a na sale a di khotetwe mkorani amu mi nga ti kona; se anu tsulani mi heleketa fulaho ya kuya malata nzala mitini kwanu.

²⁰Mi na ya wuya ni mnanda wanu wa tshole, kasiku mapswi anu me maneka i di o tsana, ananu mi si fi.” Vona va to mahisa toneto.

²¹Sekoko va to wombawombisana ngu txawe, va txi kha vona: “Kha ditshuri, ha tsayiswa ngu mhaka ya tile hi nga ti maha ka mnanda wathu, hi woni kuxaniseka kwakwe, mbimo yi a nga ti kombela divalelo; athu koko kha ha mu engisa; ngu mhaka yeto, sixaniso siya si hi telako.”

²² Se Rubheni a to va xamula a txi khene: “Kha na mi gela ti to mi nga maheni kubiha ka mnanda wathu, kani? Aniko anu kha ma ni engisa; se wonani, mnoha wakwe wa vilelwa.”

²³Kambe va ti si ti zivi ti to Josefa wa va engisa, nguko a ti womba-womba navo ngu mtxhamuseli.

²⁴Se a to khukha hafuhi kwawe a txi dila. Ngu msana a to wuya kwawe, e ta womba-womba navo, a to ñola Simiyoni, e msunga hagari kwawe.

²⁵Se Josefa a to ruma ku tata masaka awe ngu fulaho, ni ku va tshumeta male mmweyo ni mmweyo wawe, ve va ninga mbuva ya nzila; se va to va mahela toneto.

²⁶Se va to rweka fulaho yawe aha ka timbongola tawe, ve tsula.

²⁷Se mbimo yile mmweyo wawe a nga txhatxha disaka dakwe, kasi kuninga mbongola sakudya ka sile a nga xava, a to mana male yakwe, nguko yi di ha txisofuni ka disaka dakwe.

²⁸A to khene ka vanawe: Va tshumetile male yangu, ndiye yi ho mu disakani kwangu ka fulaho: Sekoko timbilu tawe ti to ema, va txi kha vona mmwani ni mmwani: “Kasi nda txani tona tiya Txizimu txi hi mahelako kani?”

²⁹Se va to wuya m'tini ka tate wawe Jakobe ditikoni ka Kanana; va to mxawutela totshe ti ti nga va humelela, va txi kha vona:

³⁰M'thu wule a fumako ditiko dile, a hi wombawombete ngu wurena, a txi pimisa ti to hi sinyengwani[98] ka ditiko dile.

³¹Aniko hi m'gete ku khathu: “Hi vavamna vavanene, kha hi nga sinyengwani;[99]

³²hi vanawe va digumi ni vambidi, vanana va tate mmweyo; aniko mmweyo wathu khaswi a diho, ani mnanda wathu wa tshole a sate ni tate wathu, ditikoni ka Kanana.”

³³Se wamwamna wule i ku mthangeli wa ditiko da Egipta, a to khene: “Kasiku ni tiziva ti to mi vathu vavanene siyani ni nani mmweyo wa vananu, mi txi teka sakudya so dingana kuya hanya nzala timwayani kwanu, mi txi tsula;

³⁴aniko ni wuyiseleni mnanda wanu; se ni nata tiziva ati to kha mi nga sinyengwani,[100] aniko mi vavamna vavanene; sekoko ni nata mi tshumetela mwananu, mi na tsimbila-tsimbila mi di txhatxhekile ditikoni muwa.”

³⁵Mbimo yi vona va nga txi kutulela masaka awe, mmweyo ni mmweyo, disakani kwakwe, a to mana txipatxhi txi di ni male yakwe; se ngako va di woni male yawe amu ka siya, vona ni tate wawe, va to dhudhumela.

³⁶Sekoko tate wawe Jakobe, a va gete, a txi khene: “Anu mi zama kuheta vanana vangu: Josefa khaswi a diho kambe, Simiyoni kha nga ho hawa, se mi lava ku ni tekela ni ene Bhenjamini! Totshe tiya ti txitimwi kwangu.”

³⁷Aniko Rubheni a to gela tate wakwe ku khene: “Daya vanana vangu vavambidi, ngako ni si ku wuyiseli kambe Bhenjamini; mningele manzani kwangu, ni na wuya nayo!”

³⁸Kambe ene a to khene: “Mwanana wangu kha na mbi tsula ni nanu, nguko mwanawe a fite, se ku to sala ene ekha dwe. Ngako a txi manwa ngu phango emo mi no tsimbilela kona, mi na ni releta diphalani ni tinvi tangu.”