Read chopi Genesisi 48 Bible Online

Genesisi 48 - chopi bible

Genesisi 48

¹Msana ka toneto, ku mahekile tito, ve gela Josefa va txi kha vona: Tate wako wa lwala. Sekoko a to teka vanana vakwe va vambidi, Manasi ni Efrayime e tsula navo.

²Se va to ya bikela Jakobe, va txi kha vona: Mwanako Josefa a bwakile a lava ku ku wona. Israyeli a to wuseta mitamo yakwe e wuka a txi khalahatsha ha m'bhedhuni kwakwe.

³Se Jakobe a wombile ka Josefa, a txi khene: Txizimu txa Mtamo-Wotshe, txi ti wonekisile kwangu ni di niya Luza, ditikoni ka Kanana, txi ni katekisa,

⁴ txi txi ni gela tiya: Ani ni na maha ti to u txi anda, ngu ngawe ani ni na tumbulukisa tihunzu ta tingi ta vathu, ditiko diya ni na di ningela ka liveleko lako, di txi va thomba ya lona kala kupinduka.

⁵Akuwa, vanana vako vavambidi, avava u nga veleka ditikoni muwa ka Egipta, ani ni sanzi kuta ahawa kwako, ditikoni ka muwa Egipta, va na va i di vanana vangu; Efrayime ni Manasi va na va vangu, kufana ni Rubheni ni Simiyoni i ku vanana vangu.

⁶ Se liveleko lako, ali u no veleka msana ka vava, evo va na va i di vako; va na amukela ni vona txyavelo ka thomba yi yi lumbako vanawe.

⁷Mbimo yi ni nga txi wuya ngu Padhani-Aramu, mame wako Rakeli a to fa hi di ngadi hagari ka nzila, ditikoni ka Kanana, hafuhi ni Efrata; se ani ni to m'kelela koneyo, nzilani ka kuya Efrata, i ku Bhetlehema.

⁸Se Israyeli a to wona vanana va vambidi va Josefa, a txi khene: Mbamani vava kani?

⁹Josefa a xamute, a txi khene: Mbanana vangu, ava Txizimu txi nga ta ni ninga ditikoni muwa. Jakobe a to engeta, a txi khene: Na ku kombela, va tise hafuhi kwangu, kasiku ni txi va katekisa.

¹⁰Kunene, maso a Israyeli ma ti si woni ta tinene ngu mhaka ya kukumba; ene a ti si woni kwati, se Josefa a to va tshuketisa hafuhi kwakwe, se ene a to va pswopswa, ni ku va khutarela.

¹¹Israyeli a wombile ka Josefa a txi khene: Txizimu txi mahile ti to ni za ni wona ni liveleko lako!

¹²Sekoko Josefa a to va thavisa ha mathumbini ka tate wakwe, a txi khizama masoni kwakwe ni kutinamisa hahatshi.

¹³Josefa a to va teka ngu wumbidi wawe, a txi ñola Efrayime ngu dianza dakwe da txibhabha, a txi mkonamisa txineneni ka Israyeli, a txi va tshuketisa hafuhi kwakwe.

¹⁴Aniko Israyeli a to hambanisa manza akwe, e nawuluta dianza dakwe da txinene e di sanzeka txitimwi ka msungo wa Efrayime, awu i ku mnanda, se e sanzeka dianza dakwe da txibhabha txitimwi ka msungo wa Manasi, awu i ku mwanana wa matiwula.

¹⁵Se Israyeli a to katekisa Josefa, a txi khene: Txizimu txi va nga tsimbila masoni ka txona vatate vangu Abrahamu ni Isaake Txizimu txi i ku m'dyisi wangu kukhukhela ni txi velekwa kala ditshiku da nyamsi,

¹⁶Ngelozi yi yi nga ni[105] hulukisa ka to biha, yi na katekisa vafana vava, ngu konaho kwakwe ditina dangu di na simame di txi ya masoni, kumweko ni ditina da Abrahamu ni Isaake, i ku vatate vangu; vafana vava va na kule va txi anda ha mafuni.

¹⁷Se ngako Josefa a di woni ti to tate wakwe a vekile dianza dakwe da txinene ha msungo ka Efrayime, eto kha ta mtsakisa, ene a to ñola dianza da tate wakwe kasiku e di thavisa ha msungo ka Efrayime, a txi di veka ha msungoni ka Manasi,

¹⁸se Josefa a to womba ka tate wakwe, a txi khene: Hi nga tona, tata wangu, nguko awuwa ngene i ku matiwula: Veka dianza dako da txinene ha msungo kwakwe.

¹⁹Aniko tate wakwe a to lamba, a txi khene: Ani na tiziva mwanangu, na tiziva; nene a na anda, kambe a na maha wa hombe; hambi keto, mnanda wakwe a na va i di wa hombe kupinda ene, ni liveleko lakwe li na maha[106] mifumo yo tala.

²⁰ Ka ditshiku donedo, Jakobe a to va katekisa, a txi khene: Vaisrayeli va na thumisa matina anu, ngako va txi katekisa m'thu, va na kha vona: Txizimu txi na ku katekise kufana ni Efrayime ni Manasi! Ti di ngeto, Jakobe a to thangetisa Efrayime masoni ka Manasi.

²¹Msana keto, Israyeli a wombile ka Josefa, a txi khene: Ani ni hafuhi ni kufa, kambe Txizimu txi na va ni nanu, txona txi na mi tshumeta mi tsula ditikoni ka vakokwani vanu.

²²Se ani ni ku ningile ditiko di di ku masoni ka vananu, adi ni ngadi honyola ka Vaamori, ngu ditxhari dangu ni wulaho wangu.