Read chopi Genesisi 49 Bible Online

Genesisi 49 - chopi bible

Genesisi 49

¹Jakobe a dhani vanana vakwe e va gela tiya: Tshanganani nguko ni lava ku mi gela ti ti no mi humelela ka mbimo yi yitako,

²tshanganani mi txi engisisa, anu vanana va Jakobe; engisani Israyeli tate wanu.

³Rubheni, awe u matiwula angu, mtamo wangu ni makhato a mtamo wangu, u wo khata amu ka fanelo, u wo khata amu ka mtamo.

⁴Wo khulunga nga mati, Awe khu na mbi guletwa, nguko u tsani u txi kwela ha m'bhedhuni ka tate wako. Sekoko u wu nyenyezisile m'bhedhu wangu!

⁵Simiyoni ni Levhi mkoma ni mnanda, matxhari awe ma thuma kumaha tshofu.

⁶Moya wangu wu nga wulele sikungoni kwawe, nduma yangu yi nga wuletiswe misengeletanoni kwakwe, nguko kuhenyani kwawe va dayete vavamna, ve sakana ngu kulimata misiha ya tihomu.

⁷Yi na va wuyisele dikhombo tshofu yawe ya kwa mbi dinganiswa, txi na mahe dikhombo txiviti txa wurena wawe. Ani ni na va hangalasa hagari ka ditiko da Israyeli.

⁸Awe Judha, vananu va na kudhumisa, dianza dako di na khozisa tithamo ta valala vako; ni vanana va tate wako va na khizama masoni kwako.

⁹ Judha njingonyamwana; u txi wuya mwanangu ngu kuxotani! Wa bukhwama a txi humula nga ngonyamo ya matune, nga ngonyamo ya matune yo kale. I mani a no mu wusa kani?

¹⁰Ndonga kha yi na mbi khukha ka Judha, hambi mlayeli mikondoni kwakwe, kala kuza ku txi ta Silo; awule[107] vathu va no sengeletana kwakwe.

¹¹Ene a na sunga tximbongolana txakwe ka m'vhinya, ni mwanana wa mbongola ka m'vhinya wo tshura ngutu; a na kuwula syambalo sakwe amu ka m'vhinya wale wa txhuko, a txi kuwula didhamba dakwe amu ka mauvha o nga mnoha.

¹²Maso akwe ma bhilivite ngu vhinya, makwasa akwe ma basile ngu mhaka ya masi.

¹³Zebhuloni a na aka ha likasani ka linene, i ku txithoni ka sitimela sa mati, se muhingano wakwe wu na gwitela Sidhoni.

¹⁴Isakari i mbongola ya marambu a mtamo,[108] yi nga otela hagari ka tithundu timbidi.

¹⁵Se ene a pfa kutshamba ka kuhumula, ni ti to ditiko da tsakisa, se a to releta dikata dakwe kasi kupakata thundu a txi ti maha khumbi.

¹⁶Dhani a na lamula timhaka ta vathu vakwe, nguko mmweyo wa tihunzu ta ka Israyeli.

¹⁷Dhani a na va mnyoka hafuhi ni nzila, xaru hafuhi ni dipfhela yi lumako txizenende txa dihantxhi, se m'gadhi wa dona a txi wa ngu nyatxisane!

¹⁸MKOMA, ni verela kutirulwa ngu ngawe!

¹⁹Gadhi a na lwiswa ngu sigevenga; kambe ene a na si lwisa a txi si hambanisa.

²⁰Aseri, sakudya sakwe nza kunona, sona nzo tshamba sa wukoma.

²¹Naftali i mhoti yo tutuma; a womba mapswi o tshura ngutua.

²²Josefa didhavi do veleka ngutu didhavi do veleka ngutu hafuhi ni mlonga; madhavi a dona ma navako txitimwi ka diguma.

²³Vafuli va mpfisile kupanda, ngu ku mfuletela[109] ngu tingove, ngu ku m'venga kwawe.

²⁴Aniko wulaho wakwe wu zumbile wu di tsani, ni misiha ya mawoko akwe yi tsanisilwe, ngu manza a Ndena ya Jakobe (eho i ku M'dyisi ni Dirigwi da Israyeli.)

²⁵Txizimu txa tate wako txi na kuvhuna, ni wu wa Mtamo-wotshe awu a no ku katekise: Ngu makatekwa a kuta ngu txitimwi nzumani, ni makatekwa a kuhokomani, ma ku hahatshi ni makatekwa a titshumbu, ni mrumbuni.

²⁶Makatekwa a tate wako ma na pinda makateko a vatate vangu, kala titshokani ka mimango ya kale ngutu; ona ma nava txitimwi ka msungo wa Josefa, ni txitimwi ka msungo wa wule a nga sawulwa hagari ka vanawe.

²⁷Bhenjamini i dixolwa di di phatulako; ni mixo didya txile di nga xota, se ni minova di phaka sa kuhonyola.

²⁸Votshe vava va tshanganisa digumi da tihunzu ni timbidi ta Israyeli, atiya timhaka ngu tona ti tate wawe a nga va gela. Ene a va katekisile, mmweyo ni mmweyo madingano ni fanelo yakwe.

²⁹Ngu msana a to va ninga sileleto, a txi khene: Ani na tsula ni txi ya tshangana ni va ka kwathu. Ni tshotsheni kumweko ni vatate vangu, ka diphala di di ku thembweni ka Efroni, Muheti,

³⁰ ka diphala di ku diya di ku thembweni ka Makipela, masoni ka Mambre, ditikoni ka Kanana, ahale Abrahamu a nga xava ka Efroni, Muheti, kasi kumaha mathithani ko mlumba.

³¹ Ngu koneyo a nga tshotshwa kona Abrahamu ni msikati wakwe Sara; ngu koneyo a nga tshotshwa kona Isaake ni Rebeka, msikati wakwe, ngu koneyo ani ni nga tshotsha kona Leya.

³²Thembwe yiya ni diphala diya di ku ka yona, si xavilwe ka vanana va Heti.

³³ Ngako Jakobe a di gwitile kuninga sileleto ka vanana vakwe, a to peta minenge yakwe ha m'bhedhuni, efa eya tshangana ni va ka kwawe.