Read chopi Genesisi 5 Bible Online

Genesisi 5 - chopi bible

Genesisi 5

¹Adiya dibhuku da liveleko la Adhamu. Mbimo yi Txizimu txi nga vanga m'thu, txi mmahile a txi fanana ni Txizimu.

² Txi to va vanga wamwamna ni wamsikati, txi va katekisa. Txi va ningile ditina daku M'thu, ka ditshiku dile txona txi nga va vanga ngu dona.

³Adhamu a ti ni 130 wa malembe a tanga, mbimo yi a nga veleka mwanana wo fana nayo khohe ni mmidi, awu a nga mraya ditina daku i Sete.

⁴Msana ka kuva a di velekile Sete, Adhamu a hanyile kambe 800 wa malembe, se a velekile vanana va mazambi ni vamahorana.

⁵Mtengo wa malembe a kuhanya ka Adhamu i 930. Se ngu msana a to fa.

⁶Sete a ti ni 105 wa malembe, mbimo yi a nga veleka Enosi.

⁷Msana ka kuvelekwa ka Enosi, Sete a hanyile kambe 807 wa malembe, e veleka vanana va mazambi ni vamahorana.

⁸Kotshe kuhanya ka Sete, 912 wa malembe; ngu msana a to fa.

⁹Enosi a di ni tanga ya mtxhanu ni mune wa magumi a malembe, a to veleka Kayinani.

¹⁰Msana ka kuvelekwa ka Kayinani, Enosi a hanyile kambe 815 wa malembe. A velekile vanana va mazambi ni vamahorana.

¹¹Se otshe masiku a kuhanya ka Enosi, nga 905 wa malembe.

¹²Kayinani, wa tanga ya mtxhanu wa magumi ni magumi mambidi a malembe, a velekile Mahalaleli.

¹³Msana ka kuva a di velekile Mahalaleli, Kayinani a to hanya kambe 840 wa malembe, se e veleka vanana va mazambi ni vamahorana.

¹⁴Kotshe kuhanya ka Kayinani nga 910 wa malembe, ngu msana a to fa.

¹⁵Mahalaleli, wa tanga ya mtxhanu wa magumi ni dimwedo malembe, a to veleka Jaredhi.

¹⁶Msana ka kuva a di velekile Jaredhi, Mahalaleli a hanyile kambe 830 wa malembe, a di velekile mazambi ni mahorana.

¹⁷Kotshe kuhanya ka Mahalaleli nga tanga ya 895 wa malembe.

¹⁸Jaredhi wa tanga ya 162 wa malembe, a to veleka Enoki

¹⁹Ngu msana ka kuva a di velekile Enoki, Jaredhi a hanyile kambe 800 wa malembe, e veleka vanana va mazambi ni vamahorana.

²⁰Kotshe kuhanya ka Jaredhi, nga 962 wa malembe; ngu msana a fite.

²¹Enoki a di ni tanga ya mtxhanu wa magumi ni dimwedo, ni mtxhanu wa malembe, a to veleka Metusela.

²²Ngu msana ka kuvelekwa ka Metusela, Enoki a to tsimbila kumweko ni Txizimu 300 wa malembe, e veleka mazambi ni mahorana.

²³Kotshe kuhanya ka Enoki nga 365 wa malembe.

²⁴ Se Enoki a tsimbite kumweko ni Txizimu; se kha wonwa kambe aniko, Txizimu txi ti tekete ene.

²⁵Metusela, wa tanga ya 187 wa malembe, a to veleka Lameki.

²⁶Ngu msana ka kuvelekwa ka Lameki, Metusela a hanyile kambe 782 wa malembe, e veleka vanana va mazambi ni vamahorana.

²⁷Kotshe kuhanya ka Metusela nga tanga ya 969 wa malembe, ngu msana a to fa.

²⁸Lameki, wa tanga ya 182 wa a malembe a to veleka mwanana.

²⁹Se e mraya ditina daku[21] i Nowa, a txi khene: “Mwanana wuwa a na hi thavelela kukaralani kwathu, ni kuxuphekani ka mithumo ya manza athu, ka mafu awa MKOMA a nga ma ruketela.”

³⁰Ngu msana ka kuvelekwa ka Nowa, Lameki a hanyile 595 wa malembe, a to veleka vanana va mazambi ni vamahorana.

³¹Kotshe kuhanya ka Lameki nga 777 wa malembe, ngu msana a to fa.

³²Nowa a di ni 500 wa malembe, a to veleka Semi, Kame ni Jafete.