Read chopi Genesisi 50 Bible Online

Genesisi 50 - chopi bible

Genesisi 50

¹Sekoko Josefa a to ti wisa khoheni ka tate wakwe, a txi mpswopswa, na a txi dila.

²Josefa a to leleta vadhokodhele va va nga ti mthumela, ti to va txi lulamisa mmidi wa tate wakwe, va txi wu totela mafura, se vona va totete mafura txirumbi txa Israyeli.

³Se kupinda mune wa magumi a masiku, nguko ku mahisva toneto ka vale va totelwako mafura; se Vaegipta va to msaluka amu ka mtxhanu wa magumi ni magumi mambidi a masiku.

⁴Ma di pindile masiku a txidilo, Josefa a to womba ka nyumba ya ka Faro, a txi khene: Ngako mi di ni lirando ni nani, na mi kombela ti to mi womba tinzeveni ka Faro, mi txi khanu:

⁵ Tate wangu a ni xambanyisile, a txi khene: Ani ni hafuhi ni kufa, u na ya ni tshotsha diyivani kwangu, ni nga ti lulamisela ditikoni ka Kanana, ngu koneyo u no ya ni tshotsha kona. Ngu mhaka yeto, ni kombela ti to ni txi tumelelwa kutsula ni txi ya tshotsha kona tate wangu; sekoko ni txi gwita ni na wuya.

⁶Faro a to xamula, a txi khene: Tsula u txi ya tshotsha tate wako, nga kule a nga kumaha u xambanya.

⁷Josefa a to khukha a txi tsula kuya tshotsha tate wakwe, va to tsula nayo votshe vahombe va nyumba ya ka Faro, votshe vahombe va nyumbani ka wukoma, ni votshe vahombe va ditikoni ka Egipta.

⁸Va tsute nayo votshe va mwaya wa Josefa, vanawe, ni yotshe ngamu ya tate wakwe. Ditikoni ka Goxeni ku to sala vanana vawe dwe ni mitxhambi yawe ya tinvuta ni ya tihomu.

⁹Kumweko navo kutsute sikotxikani ni mahantxhi, ni vagadhi va ona: I ti dibutho da hombe ngutu.

¹⁰Ngako va di hokile koko[110] wuhuleloni ka Goreni-Atadhe, ngu didhawa da wutxani ka mnambo wa Jordhani, koneyo va to maha tifanelo ta madila a hombe, Josefa a salukile tate wakwe, a txi heta mtxhanu wa masiku ni mambidi.

¹¹Ava va zumbako kona ditikonimo, i ku Kanana, ngako va di woni masaluko awa ma nga mahwa wuhuleloni, va ti kha vona: Atxiya njidilo txa hombe txa Vaegipta; ngu toneto wukhalo wuwa wu dhanwa ku i Abhele-Mesirayime, wukhalo wuwa wu maneka mtxhatuko ka mnambo wa Jordani.

¹²Vanana va Jakobe va mahisile ti ene a nga va gelisa tona.

¹³ Va mtekile va txi m'yisa ditikoni ka Kanana, veya mtshotsha diphalani ka thembwe ya Makipela, ayi Abrahamu a nga yi xava ka Efroni, Muheti, kasiku yi maha wukhalo wo tshotsha ka wona masoni ka Mambre.

¹⁴Sekoko Josefa a to tshumela e wuya Egipta, kumweko ni vanawe avale a nga ti tsute navo kuya tshotsha tate wakwe.

¹⁵Sekoko ngako vanawe va Josefa va di woni to tate wawe a fite, va to wombawombisana va txi kha vona: Mwendo Josefa a na hi vengela a txi hi tshumetela, wotshe wubihi wu hi nga mmahela.

¹⁶Ngu mhaka yeto, va to ruma kuya womba ka Josefa, tito: Na tate a sanzi kufa, a hi gete, a txi khene:

¹⁷Mi na ya womba ka Josefa mi txi khanu: Na kukombela, divalela vananu minandu yawe ni sionho sawe, nguko va ku mahete wubihi; konakuwa koko, ha kukombela, ti to u divalela sionho sa sithumi sa Txizimu txa tate wako. Se Josefa a di engisile toneto, a to dila.

¹⁸Ngu msana, vanawe va Josefa, va manekile va txi ta ngu wutumbu wawe, ve ta ti wisa minengeni kwakwe va txi kha vona: Hiho hawa, athu sithumi sako.

¹⁹Aniko Josefa a va gete, a txi khene: Mi nga thaveni txilo! Mi pimisa ti to ani ni ha wukhaloni wa Txizimu kani?

²⁰Kubiha kuwa mi nga pimisa ku ni mahela, ngu kuxuva ka Txizimu, ku hindukile ku txi maha wunene, kasiku ti txi woneka ti nyamsi ti mahekako, i ku kuhulukisa wutomi wa vathu votala.

²¹Konkuwa, mi nga thaveni txilo. Ani ni na mi xayisa, kumweko ni vanana vanu. Ene a to va khongotela, a txi womba-womba navo ngu lirando.

²²Ngu toneto, Josefa kumweko ni votshe va ka kwawe, va yite masoni ngu kuzumba ditikoni ka Egipta, se Josefa a hanyile 110 wa malembe.

²³Se Josefa a woni vanana va Efrayime, va liveleko la wuraru; ni vanana va Makiri, mwana Manasi, va velekilwe ngu Josefa.

²⁴Ngu kugwita, Josefa a wombile ka vanawe, a txi khene: Ani na fa, aniko Txizimu txi na mi endela txi hulukisa mi khukha ka diya ditiko, txi mi yisa ka ditiko di txona Txizimu txi nga thembisa, ngu txixambanyo ka Abrahamu, ka Isaake ni ka Jakobe.

²⁵ Se Josefa a mahile ti to vanana va ka Israyeli ve xambanya, a txi khene: “Mbimo yi Txizimu txi no mi endela, mi na thavisa marambu angu ka wuwa wukhalo mi tsula nawo.”

²⁶Se Josefa a fite a di ni tanga ya 110 wa malembe. Msana ka ku mtotela mafura a mrende, va to lulamisa txirumbi txakwe ve txi veketa dibhokisoni, kona Egipta.