Read chopi Genesisi 6 Bible Online

Genesisi 6 - chopi bible

Genesisi 6

¹Mbimo yi vathu va nga khata kuanda ha mafuni, va txi veleka vanana vamahorana,

²vanana va mazambi va Txizimu, ngu kuwona ti to vanana vamahorana va vathu va tshurile, va to langa vale va nga va navela, va txi maha vasikati vawe.

³Sekoko, MKOMA a to khene: “Moya wangu kha wu na mbi zumba yotshe mbimo ka m'thu, nguko m'thu i nyama, ni masiku akwe kha ma na mbi pinda 120 wa malembe.”

⁴ Ka yona yile mbimo, ha mafuni ku ti ti ni vanyasihakate va nga velekwa, mbimo yi vanana va Txizimu va nga tekana ni mahorana, ya i ku vanana va vathu, ve veleka vanana. Ngu vonevo tindena ta nduma ta mbimo ya kale.

⁵ Se MKOMA Txizimu a to wona tito, kubiha ka vathu ka anda ha mafuni, ni ti to mipimiso ya timbilu tawe yi va yisa kubihani yotshe mbimo.

⁶Sekoko MKOMA Txizimu, a to ti laya ngu kuva a di mahile m'thu ha mafuni, se a to pandiseka mbiluni kwakwe.

⁷Se MKOMA a ti khene: “Ni na fuvisa txitimwi ka mafu, m'thu wu ni nga mmaha, ni fuvisa kambe sihari, ni sihari so tsimbila ngu dibindi, ni sinyana sa nzumani; nguko na ti laya ngu kuva ni di si mahile.”

⁸Aniko Nowa a mani kukateka masoni ka MKOMA Txizimu.

⁹ Ayiya i xawutelo ya liveleko la Nowa. Nowa i ti m'thu wamnene, i ti wa ditshuri hagari ka vathu va mbimo yakwe, kambe a ti ti tsimbila kumweko ni Txizimu yotshe mbimo.

¹⁰Nowa a velekile vanana vararu va majaha: Semi, Kame ni Jafete.

¹¹Ditiko di ti tate ni kubiha masoni ka Txizimu, ni kuva di ti tate ni wugevenga.

¹²Txizimu txi woni ti to ditiko di tate ni wubihi, nguko votshe vathu va ti ti londeta nzila ya walo.

¹³Sekoko Txizimu txi to kha txona ka Nowa: “Ni lava kufuvisa votshe vathu, nguko mafu ma tate ngu wubihi, ngu mhaka yawe. Ni na va fuvisa, kumweko ni mafu.

¹⁴Aka ngalava ngu mapulango a mndonga wa nyeti[22] ngu sibhiya, u lemetela ngu phula, hahanze ni mndani.

¹⁵U na yi akisa tiya: Kulapha ka ngalava nga 300 wa mikono, kuanama nga mtxhanu wa magumi a mikono ni kudemba ka magumi mararu a mikono.

¹⁶Ngu txitimwi ka ngalava, u na veka difasitela da mkono wumwewo; u veka ditimba da ngalava ha didhawa; u txi aka ka yona txitezi, txa hahatshi, txitezi txa wumbidi ni txitezi txa wuraru.

¹⁷Nguko ni na wuyisa ndambi ya mati ha ditikoni, a ha ku no tala, ku na fuviswa hahatshi ka nzuma sotshe sivangwa si si hanyako, asi si ku ni muhefemulo wa wutomi. Sotshe si si kuho mafuni, si na fuva.

¹⁸Ni na maha txitumelelano txangu ni nawe; se u na wulela ngalavani awe ni vanana vako, ni msikati wako, ni vasikati va vanana vako.

¹⁹Ni ka sotshe si si hanyako, ni ka sotshe si i ku nyama, u na teka simbidi-simbidi, matune ni mkati, u txi wulela naso mu ngalavani, kasi ku si hulukisa, si txi hanya kumweko ni nawe.

²⁰Ka tixaka ta sinyana, ka tixaka ta sihari, ka tixaka ta sotshe si si tsimbilako ngu dibindi ha mafuni, si na wulela simbidi-simbidi kumweko ni nawe amu ngalavani, kasi ku si txi huluka, si txi hanya.

²¹Se awe u na tshanganisa totshe tixaka ta sakudya u txi si veketa; kasi si na va sakudya sako ni sa sivangwa.”

²² Nowa a to maha toneto; totshe ti Txizimu txi nga mruma tona, ene a ti mahile.