Read chopi Genesisi 7 Bible Online

Genesisi 7 - chopi bible

Genesisi 7

¹Msana keto, MKOMA a to khene ka Nowa: “Wulela ngalavani, awe ni mwaya wako, nguko ngawe wekha wo lulama ni kuwonako masoni kwangu, ka liveleko liya.

²Ka sotshe sihari so sawuleka, u na teka mtxhanu wa mipatwa ni yimbidi, matune ni mkati wa txihari ni txihari; ka sihari so mbi sawuleka, u na teka mpatwa wumwewo, matune ni mkati.

³Kambe ka sinyana sa nzuma, u na teka mtxhanu wa mipatwa ni yimbidi, matune ni mkati, u veketa lixaka la sona kotshe ha mafuni.

⁴Nguko, ku di pindile mtxhanu wa masiku ni mambidi, ni na maha ti to mndani ka mune wa magumi a masiku, ku txi wa mati wusiku ni mitshikari, kasi ku ni na lovisa ha mafuni sotshe sivangwa si ni nga si maha.”

⁵Se Nowa a to maha totshe madingano ni ti MKOMA Txizimu a nga ti mleletete.

⁶Se Nowa i ti ti wa tanga ya 600 wa malembe, mbimo yi ku nga maheka ndambi ya mati ha mafuni.

⁷ Se Nowa ni vanana vakwe, ni msikati wakwe, ni vasikati va vanana vakwe, a to wulela navo ngalavani, kasi ku e huluka ka mati a ndambi.

⁸Ka sihari so sawuleka ni ka sihari so mbi sawuleka, ka sinyana ni ka sotshe si si tsimbilako ngu dibindi ha mafuni,

⁹ku vile ni sihari si si nga wulela ngalavani ni Nowa, ngu simbidi-simbidi, matune ni mkati, nga ti Txizimu txi nga leletisa tona ka Nowa.

¹⁰Se ku to maheka taku, ku di pindile mtxhanu wa masiku ni mambidi, mati a ndambi ma to khata kutala ha mafuni.

¹¹ Ka dilembe diya Nowa a nga tshanganisa 600 wa malembe, a kuhanya kwakwe, ka ditshiku da wugumi ni mtxhanu ni mambidi, ka mtxima wa wumbidi, ku to khulunga mati a minambo yotshe ya kueta ka hahatshi ka mafu, ni mafasitela a nzumani ma to tuleka.

¹²Mndani ka mune wa magumi a masiku, ku to wa mati ha mafuni, wusiku ni mitshikari.

¹³Se ka dona ditshikwedo da dimwedo, Nowa ni vanana vakwe, Semi, Kame ni Jafete, msikati wakwe Nowa ni vasikati vararu va vanana vakwe, va to wulela ngalavani.

¹⁴Vona, ni sotshe sihari ngu tixaka ta sona, ni sotshe sifuyo ngu tixaka ta sona, ni sotshe sihari so tsimbila ngu dibindi txitimwi ka mafuni ngu tixaka ta sona, ni sotshe sinyana sa hombe sa[23] totshe tixaka.

¹⁵Ni yotshe nyama ayi yi nga ti ti ni moya wa kuhanya, si to wulela ngu simbidi-simbidi kumweko ni Nowa, amu ngalavani.

¹⁶Se si to wulela kumweko ni Nowa, matune ni mkati, ka sotshe si i ku sa nyama, nga ti Txizimu txi nga ti leletile ka Nowa; se MKOMA a to seka ditimba da ngalava ngu hahanze.

¹⁷Se mndani ka mune wa magumi a masiku, ku to va ndambi ha mafuni; mati ma to kukumuka me guleta ngalava, yi a maneka yi di txitimwi ka mafu.

¹⁸Se mati ma to guleka me kukumuka ngutu ha mafuni, ngalava yi deluka txitimwi ka mati.

¹⁹Se mati ma to tala, me guleka ngutu, txitimwi ka mafu ni mimango ya hombe yo lapha ngutu, yi yi kuho hahatshi ka yotshe nzuma, yi to fenengetwa.

²⁰Mati ma to kukumuka, me manela digumi da mikono ni mtxhanu; se yi fenengetwa mimango.

²¹Se ku to lova sotshe si i ku nyama yi yi tsimbilatsimbilako txitimwi ka mafu, i ku sinyana, sifuyo, sihari sa txitinga, ni sotshe si si tsimbilako ngu dibindi txitimwi ka mafu, ni vathu votshe.

²²Sotshe si si nga ti ni muhefemulo wa kuhanya tithonvuni ka sona, sotshe si nga ti tiho ha mafuni si fite.

²³Ngu kumaha keto, si fuvisilwe sotshe sivangwa so hanya ha mafuni, vathu, sihari, so tsimbila ngu dibindi, ni sinyana sa nzuma; si fuvisilwe ha mafuni; ku to sala Nowa dwe, ni sotshe si a nga ti naso ngalavani.

²⁴Se mati ma to simama txitimwi ka mafu, 150 wa masiku.