Read chopi Genesisi 9 Bible Online

Genesisi 9 - chopi bible

Genesisi 9

¹ Se Txizimu txi to katekisa Nowa ni vanana vakwe, txi va gela tiya: “Velekani, mi anda mi tata mafu.

²Sihari sotshe sa ha mafuni, ni sotshe sinyana sa nzuma, ni sotshe si si tsimbilatsimbilako ha mafuni, ni sotshe sihaka sa mu lineneni, si na mi thava ni kudhudhumela. Sona na si ningela manzani kwanu.

³Sotshe si si tsimbilatsimbilako, si ku ni wutomi, si na va i di sakudya sanu, sotsheso na mi ninga, kufana ni ku ni nga mi ninga sotshe similwa si si hanyako.

⁴ Aniko mi nga dyeni nyama ni mnoha wa yona, nguko mnoha mbutomi.

⁵Ngu ditshuri ni na lava mnoha wanu, ngako mnoha wa m'thu wu txi theketwa, ni na maha ti to wu dihwa. Hambi i di txihari txi wu theketako, mwendo i m'thu a wu theketako, ni na wu dihisa.

⁶ Awu a theketako mnoha wa m'thu, mnoha wakwe wu na va wu txi theketwa ngu m'thu, nguko Txizimu txi mahile m'thu ngu mfananiso wa txona.

⁷ Anu velekelani mi anda; tatani mafu mi txi hangalaka ka ona.”

⁸Txizimu txi to kha txona ka Nowa ni ka vanana vakwe:

⁹“Wonani, na tsanisa Txitumelelano txangu ni nanu, kumweko ni vanana vanu, ava va no velekwa msana kwanu,

¹⁰ni sotshe[25] sivangwa si si hanyako, si ku ni nanu, sinyana, sihari so fuywa, sotshe sihari sa txitinga, sotshe si si nga huma ngu ngalavani kumweko ni nanu, sotshe sihari sa ha mafuni.

¹¹Se ni na tsanisa Txitumelelano txangu ni nanu, sotshe si si kuho, kha si na mbi ngadi si hihiritwa kambe ngu mati a ndambi. Kha ku na mbi vaho kambe ndambi yo lovisa ditiko.”

¹²Se Txizimu txi to kha txona: “Txikombiso txa Txitumelelano txi ni txi mahako hagari kwangu ni nanu, ni sotshe sivangwa si mi ku naso, ni votshe vanana va liveleko la ka kwanu, va masiku awa matako, ngu txiya:

¹³Ni vekile wulaho wangu marefuni, wu na maha txikombiso txa Txitumelelano, hagari kwangu ni mafu.

¹⁴Ngako ni txi wuyisa marefu txitimwi ka mafu, se ku txi woneka wulaho marefuni,

¹⁵sekoko ni na alakanya Txitumelelano txangu, txi ku hagari kwangu ni nanu, ni sotshe si si hanyako ha mafuni. Konaho mati kha ma na mbiswa ma txi maha ndambi ya kufuvisa sotshe sivangwa.

¹⁶Ngako wulaho wa nzumani wu di ha mafuni, ani ni na wu wona, ni txi alakanya mhaka ya Txitumelelano txo mbi guma, atxi txi kuho hagari kwangu ani Txizimu, ni sotshe sivangwa si si hanyako ha mafuni.”

¹⁷Se Txizimu txi to kha txona ka Nowa: “Atxiya njikombiso txa Txitumelelano ni txi mahako hagari kwangu ni sotshe sivangwa so hanya, si kuho ha mafuni.”

¹⁸Se vanana va Nowa, va nga huma ngu mu ngalavani, i Semi, Kame ni Jafete. Kame i tate wa Kanana.

¹⁹Ava vavararu, ngu vona vanana va Nowa, se kukhukhela kwawe kuhumile vathu va va nga aka ka otshe mafu.

²⁰Se Nowa a to maha m'dimi wa mafu, e phaya mivhinya.

²¹Kambe a to sela vhinya e leva, eza eya otela a sa ambala txilo, mu ditendani kwakwe.

²²Kame, tate wa Kanana, a woni tate wakwe i di tximbwiri, a to ya zivisa vanawe vavambidi, hahanze.

²³Sekoko Semi ni Jafete va to teka didhamba, ve di kapeka ha makata kwawe, ve tshuketela tate wawe ngu nyatxisane, veya fenengeta tate wawe tikhohe tawe ti di tshemberekile ti wona phuho. Ngu mhaka yeto, kha va wona wumbwiri wa tate wawe.

²⁴Mbimo yi Nowa a nga wuka ngu kulevani kwakwe, a ti zivile tile mwanana wakwe wam'dotho a nga mmahela.

²⁵Se Nowa a to khene: “A na ruketelwe Kanana, ka vanawe a na va khumbi ya tikhumbi!”

²⁶Se Nowa a to womba kambe, a txi khene: “A na dhumiswe MKOMA Txizimu txa Semi, Kanana a na mahe khumbi yakwe.

²⁷Txizimu txi na mkulise Jafete, kambe a na zumbe matendani ka Semi, Kanana a nave khumbi yakwe!”

²⁸Se msana ka ndambi, Nowa a hanyile 350 wa malembe.

²⁹Otshe masiku a kuhanya ka Nowa, i 950 wa malembe, se a to fa.