Read chopi 2 Samuwele 1 Bible Online

2 Samuwele 1 - chopi bible

2 Samuwele 1

¹Se msana ka kufa ka Sawule, na a di wile Dhavhidha ngu kuya xula Vaamaleki, a to ta zumba masiku mambidi kona Zikilage.

²Ku to maheka taku, ngu ditshiku da wuraru, ku txi ta wamwamna wokari ngu wugoveloni ka Sawule, a di ambate syambalo so vharukela, a di ti theletete mafu ha msungo; se kumaheka ti to a di hokile ka Dhavhidha, a to ti wisa hahatshi, e khizama.

³Se Dhavhidha a to khene kwakwe: U ta ngu hani kani? Se ene a to xamula ku khene: Ni to huluka ka dibutho da yimbi da ka Israyeli.

⁴Se Dhavhidha a to khene kwakwe: Ti mahisile kutxani kheyo toneto, kani? Ni gele na ku kombela. Ene a to mxamula a txi khene: Vathu va tutumile yimbini, wungi wawe va wite, se va fite! Kumweko ni Sawule ni mwanakwe Jonatani, va datwe ni vona.

⁵Se Dhavhidha a to khene ka mfana wule a tisa mahungu aawa: U ti zivisa kutxani awe, taku Sawule ni mwanakwe Jonatani va datwe kani?

⁶Sekoko mfana wule a nga ti ti mtisela mahungu a to khene: Ni to thuka ni ya humelela mmangoni ka Gilibhowa, se ni wona Sawule a di khigete aha ka mseve wakwe, se sikotxikani ni vathangeli va yimbi va nga ti gadhile mahantxhi va ti hafuhi kwakwe.

⁷Se mbimo yile ene a nga tshembereka e wona msana kwakwe, a to ni wona e ni dhana; kambe ani ni to khani: Ngani wuwa hawa!

⁸Se Sawule a to khene kwangu: Ngawe mani awe kani? Se ani ni to m'gela ku khani: Ni muamaleki.

⁹Sekoko Sawule a to khene kwangu: Na ku kombela, tshuketa u ta ni daya, nguko ni tate ngu kupandiseka, kambe wotshe wutomi wangu wu ngadi kwangu.

¹⁰ Ni to tshuketela kwakwe koko, se ni m'daya, nguko ani ni txi ziva taku kha na mbi hanya msana ka kuwa kwakwe, se ni to teka m'bhoti wule a nga ti nawo ha msungo ni di sinda dile a nga ti nado diwokoni kwawe, ni si tisa hawa ka nyamne wangu.

¹¹Sekoko Dhavhidha a to ñola syambalo sakwe e vharula, kumweko ni votshe vavamna vale a nga ti ti navo.

¹²Se va to saluka, ve dila, ni kutitona sakudya kala ni minova, ngu mhaka ya Sawule ni mwanakwe Jonatani, ni vathu va MKOMA, ni nyumba ya ka Israyeli, nguko va datwe ngu ditxhari.

¹³Sekoko Dhavhidha a to khene ka mfana wule a nga mtisela mahungu: U huma hani awe kani? Se ene a to khene: Ni mwanana wa wamwamna wokari wa muamaleki.

¹⁴Se Dhavhidha a to khene kwakwe: Ngu kutxani awe u nga mbi thava kunawuluta diwoko dako u daya wo totwa wa MKOMA kani?

¹⁵Sekoko Dhavhidha a to dhana mmweyo wa vafana vakwe a txi khene: Tshuketa u ta m'daya. Se ene a to mthola, efa.

¹⁶Se Dhavhidha a to khene ka muamaleki: Mnoha wako u nave txitimwi ka msungo wako, nguko txisofu txako txi pune txi ku mangalete, txi txi kha txona: Ani ni date wule wo totwa wa MKOMA.

¹⁷Se Dhavhidha a to dila Sawule ni Jonatani, ngu ndando yiya,

¹⁸ a txi khene, yi na gondiswe ka vanana va ka Judha ndando ya ma thumiselo a wulaho. Wona taku yi bhatwe amu ka Dibhuku da Mlulami.

¹⁹Ah! Kutshura ka Israyeli! Ni xasetwe mimangoni kwako; eto ti nga wisa tona tindena!

²⁰Mi nga geleni va Gati, Mi nga nuweleni tiruwani ka Asikeloni, kasiku va si tsaki vanana vamahorana va Vafilista, va si ndakandaki vanana vamahorana va makhuto.

²¹Anu mimango ya Gilibhowa, ku nga thuke kuwa mwando, hambi nzuma yi nga ne txitimwi kwanu, hambi txitimwi kwanu, tithembwe ta miningelo yo diwitelwa, nguko nguho ku nga txhipiswa ngutu sitxhavangu sa tindena, txitxhavangu txa Sawule, ku nga kha txi zivi kutotwa mafura.

²²Mnoha wa vale va nga dawa, ni mafura a tindena, kha wu khali kutshumelela msana wulaho wa Jonatani, hambi kuwuya di sa daya m'thu ditxhari da Sawule.

²³Sawule ni Jonatani va ti ti dhundana ni kurandana ngutu kuhanyani kwawe, hambi kufani kwawe kha va hambana! Va ti ti ni livilo ngutu kupinda magama, ni mtamo ngutu kupinda tingonyamo.

²⁴Anu vanana vamahorana a Israyeli, dilani Sawule! Wule a nga ti ti mi ambeka syambalo so bhilivila so tsakisa, wule a nga tshurisela tinguwo tanu ngu nzalama.

²⁵Eto ti nga wisa tona tindena hagari ka yimbi! Jonatani a datwe txitimwi ka mimango yako!

²⁶Ni pandisekile ngutu ngu ngawe mwanathu Jonatani; u ti ti randeka ngutu kwangu! Lirando lako li ti ti ni tsakisa ngutu kupinda lirando la vavasikati!

²⁷Eto ti nga wisa tona tindena! Kulova ni matxhari a yimbi!