Read chopi 2 Samuwele 11 Bible Online

2 Samuwele 11 - chopi bible

2 Samuwele 11

¹ Se ku to maheka ta ku, ku di pindile dilembe dimwedo, ka mbimo yile vafumeli va nga huma veya kulwani, Dhavhidha a to rumela Jowabhi, kumweko ni sithumi sakwe, ni votshe va ka Israyeli, kuya xasela vanana va ka Amoni ni kuya randela Rabha; kambe Dhavhidha a to sala kona Jerusalema.

²Se ku to maheka tito, ni minova, Dhavhidha a to wuka ngu ha m'bhedhuni kwakwe, e tsimbila-tsimbila txitimwi ka nyumba ya wukoma, kambe a di txitimwi ka nyumba a to wona wamsikati a txi kuwula; se wamsikati wuwa i ti wo tshura ngutu.

³Se Dhavhidha a to ruma vo ya wotisa madingano ni wule wamsikati; kambe va txi kha vona: Ina awuwa hi nga Bhate-Sebha, mwana Eliyami, msikati wa Uriya, Muheti kani?

⁴Sekoko Dhavhidha a to rumela mitumi ya kuya mteka; se a txi wulela nyumbani ka Dhavhidha, a to otela nayo (nguko a ti ti basisile ka mtxima wakwe); sekoko ene a to tshumela e tsula m'tini kwakwe.

⁵Se wamsikati a to khura txirumbu, e rumela dipswi ka Dhavhidha, a txi khene: Ni ni txirumbu.

⁶Sekoko Dhavhidha a to rumela dipswi ka Jowabhi, a txi khene: Ni rumele Uriya, Muheti. Se Jowabhi a to rumela Uriya ka Dhavhidha.

⁷Mbimo yile koko Uriya a nga ta, Dhavhidha a to wotisa taku, o txani Jowabhi, ni vathu, ni ma tsimbilelo a yimbi.

⁸Msana keto, Dhavhidha a to khene ka Uriya: Kwetima m'tini kwako, u ya samba minenge yako. Se ngako Uriya a di humile nyumbani ka wukoma, koneko ku to huma siningo ngu ka mfumeli so ya ka Uriya.

⁹Kambe Uriya a to ya otela ha txikeni ka nyumba ya wukoma, ni sotshe sithumi sa nyamne wakwe, kha ya relela eya m'tini kwakwe.

¹⁰Se va to gela Dhavhidha va txi kha vona: Uriya kha ya tsula m'tini kwakwe. Sekoko Dhavhidha a to khene ka Uriya: Kasi khu wuya ngu kuendani kani? U lambete txani kutsula m'tini kani?

¹¹Se Uriya a to khene ka Dhavhidha: Dibhokiso, ni va ka Israyeli, ni va ka Judha, va zumba matendani; Jowabhi nyamne wangu, ni sithumi sa nyamne wangu va govile sitingani; ina ani ni nga wulela nyumbani kwangu, ni dya, ni sela, ni otela ni msikati wangu kani? Na xambanya kwako ni ka muhefemulo wako, kha ni na mbi yi maha eyo mhaka!

¹²Sekoko Dhavhidha a to khene ka Uriya: Zumba kheno kambe nyamsi, se mangwana na kuleka u tsula. Uriya koko, a to zumba Jerusalema ditshiku dile ni mangwana ka kona.

¹³Se Dhavhidha a to dhana Uriya veya dya ve sela, e mlevisa, kambe ni minova Uriya a to huma eya otela m'bhedhuni kwakwe kumweko ni sithumi sa nyamne wakwe; aniko kha tsula m'tini kwakwe.

¹⁴Se ku to maheka taku, ni mixo ya kona, Dhavhidha a to bhala dipapilo do ya ka Jowabhi, e di rumela ngu dianza da Uriya.

¹⁵A to bhala ka dipapilo a txi khene: Vekani Uriya masoni ka yimbi ya hombe; se mi na xexa ngu msana kwakwe, mi msiya ekha, kasiku ve m'daya a txi fa.

¹⁶Se ku to maheka koko taku, Jowabhi a di wonisisile kha kwati didhoropa, a to veka Uriya ka wukhalo wule a nga wona to ku ni vavamna va tindena.

¹⁷Se mbimo yi vavamna va didhoropani va nga huma ku yalwa ni Jowabhi; ku to dawa vathu vokari ka sithumi sa Dhavhidha, kufa nene Uriya, Muheti.

¹⁸Sekoko Jowabhi a to rumela vathu kuya gela Dhavhidha totshe ti ti nga maheka ka nyimbi yile.

¹⁹Se a to ningela sileleto ka mtumi, a txi khene: Wu txi heta kugela mfumeli yotshe mhaka ya yimbi yiya,

²⁰se ngako mfumeli a txi henya a txi khene: Mi hokete txani hafuhi ni didhoropa mi txi lwa kani? Ina anu mi si ti zivi taku va na mi fula ngu ha ka diguma kani?

²¹ I mani a nga daya Abhimeleki, mwana Jerubheseti kani? Ina hi nga wamsikati a nga rinza dirigwi da txigoyo a di digumani, a di a nga fa ngu dona kona Tebhesi kani? Mi hokete txani digumani kani? Sekoko u na khawe: Txithumi txako Uriya, Muheti, txi fite ni txona.

²²Se mtumi wo to tsula, wu ya wulela wu gela Dhavhidha totshe tile Jowabhi a nga mruma tona.

²³Se mtumi a to khene ka Dhavhidha: Kha ditshuri, vathu vale va ti ti ni mtamo ngutu kupinda athu, aniko va to hi londeta ve talwa ni nathu txitingani, kambe athu hi to va wukela kala ha txikeni ka ditimba.

²⁴Sekoko vafuli va to fula sithumi sako kukhukhela mmangoni ka diguma, se kufa vokari ka sithumi sa mfumeli; ni txona txithumi txako Uriya, Muheti, txi fite.

²⁵Se Dhavhidha a to khene ka mtumi: Gela Jowabhi u txi khawe: Atiya ti nga ku karate masoni kwako; nguko ditxhari di daya wuhi ni wuhi; tsanisa yimbi yako mi wukela didhoropa mi di xula; u nda ya mtsanisisa toneto awe.

²⁶Mbimo yile koko, msikati wa Uriya a nga tipfa taku mwamna wakwe Uriya a datwe, a to dilela nyamne wakwe.

²⁷Se ku di pindile txidilo, Dhavhidha a to rumela vo ya mteka eya nyumbani kwakwe; kambe a to mmaha msikati wakwe, ene e m'velekela mwanana wa mfana. Kambe mhaka yi ya Dhavhidha a nga yi maha yi ti bihile masoni ka MKOMA.