Read chopi 2 Samuwele 12 Bible Online

2 Samuwele 12 - chopi bible

2 Samuwele 12

¹ Se MKOMA a to rumela Nathani ka Dhavhidha; a di wuleta ka Dhavhidha a to ya khene kwakwe: Ku ti ti ni vavamna vambidi ka didhoropa dokari, mmweyo i ti nyatithombe, mmwani i ti txisiwana.

²Nyatithombe a ti ti ni tinvuta ni tihomu ta mikati to tala ngutu;

³aniko txisiwana txi si ngani txilo ni txa tximwetxo, hahanze ka txinvutana tximwetxo, a nga ti xavela e txi fuya; se txona txi to kula mazani kwakwe ni vanana vakwe; txi ti ti dya sakudyanyana sakwe, txi sela mati ngu digombe dakwe, txi otela hamakata kwakwe, txi txi nga mwanana wakwe wa dihorana.

⁴Se ku to bwaka mpfhumba m'tini ka nyatithombe, a to leka kuteka nvuta ka tinvuta takwe, mwendo homu ka tihomu takwe, kasi ku ta bhikela mpfhumba, a to ya teka txivutana txa wule wa txisiwana e ta bhikela m'thu wule a nga muendela.

⁵Sekoko kuhenya ka Dhavhidha ku to vhutuka ngutu kuwukela wamwamna wule, se a txi khene ka Nathani: Ni xambanya ngu MKOMA a hanyako, m'thu wu a nga maha eto a fanela kufa.

⁶Se a na diyela txi nvutana ngu kuningela mune wa sona, nguko a mahile mhaka yo ngeto asi nga ni kupfela wusiwana.

⁷Sekoko Nathani a to khene ka Dhavhidha: Wamwamna wa kona ngawe! MKOMA Txizimu txa Israyeli a khene: Ani ni ku totile kuva mfumeli txitimwi ka Israyeli, kambe ni ku hulukisile manzani ka Sawule;

⁸ni ku ningile nyumba ya nyamne wako ni vasikati va nyamne wako hakhana kwako, kambe ni ku ningile nyumba ya va ka Israyeli ni ya ka Judha; ngako siya i di sa sidotho ni di na kuengetela sihi ni sihi.

⁹Ngu kutxani koko, u nga eyisa dipswi da MKOMA ngu kumaha to biha masoni kwakwe kani? U date Uriya, Muheti ngu ditxhari, u tshumela u teka msikati wakwe wu mmaha wako; kambe u mdate ngu ditxhari da vanana va ka Amoni.

¹⁰Konkuwa koko, kha di na mbi ngadi di huma kambe ditxhari nyumbani kwako, nguko u ni eyisile, u teka msikati wa Uriya, Muheti, kuva e maha msikati wako.

¹¹ A womba tiya MKOMA: Wona taku ni na kuwusela dikhombo nyumbani kwako, ni na thavisa vasikati vako masoni kwako, ni va ningela ka mwakelani wako, awule a no otela ni vasikati vako ni mitshikari.

¹²Nguko awe u ti mahile txihujani, kambe ani ni na ti maha masoni ka votshe va ka Israyeli, ni mitshikari.

¹³Sekoko Dhavhidha a to khene ka Nathani: Ni onhile ka MKOMA. Se a to khene Nathani ka Dhavhidha: MKOMA nene a thavisile txionho txako; khu na mbi fa.

¹⁴Hambi keto, ngako ngu mithumo yako u nga ninga wukhalo valala ve ruketela MKOMA, nene mwanana wule a nga velekwa kha ditshuri a na fa.

¹⁵Sekoko Nathani a to tsula m'tini kwakwe. MKOMA a to peka mwanana awule msikati wa Uriya a nga veleka ni Dhavhidha; se mwanana a to lwala ngutu.

¹⁶Se Dhavhidha a to kombelela mwanana ka Txizimu; kambe Dhavhidha e ti tona sakudya, e wulela nyumbani e otela hahatshi wusiku wotshe.

¹⁷Sekoko madhota a nyumbani kwakwe ma to khukha me m'yela, kasi kuya m'wusa; kambe ene kha tumela, a to lamba ni kudya navo sakudya.

¹⁸Se kumaheka taku, ngu ditshiku da wutxhanu ni mambidi, mwanana e fa; sithumi sa Dhavhidha si to thava ku m'gela taku mwanana a fite, nguko si ti ti kha sona: Wonani taku, mbimo yile mwanana a nga ti hanya, hi wombawombile nayo kambe kha engisa dipswi dathu; hi na m'gelisa kutxani koko taku mwanana a fite kani? Nguko ti na mkarata ngutu.

¹⁹Kambe Dhavhidha a to wona sithumi sakwe si txi womba-womba ngu malengo, se e ziva ti to mwanana a fite, aniko Dhavhidha a to khene ka sithumi sakwe: A to fa mwanana kani? Se sona si to kha sona: Ina, a fite.

²⁰Sekoko Dhavhidha a to wuka ngu hahatshi, e samba, e tola mafura, e txhitxha syambalo, e wulela Nyumbani ka MKOMA eya khozela; sekoko a to tshumelela nyumbani kwakwe eya kombela sakudya, ve m'vekela sakudya e dya.

²¹Se sithumi si to kha sona kwakwe: Nda txani tiya u mahako kani? Mbimo yile mwanana a nga ti hanya wu ti toni sakudya, u dila; kambe msana ka kuva mwanana a di fite, u to wuka, udya sakudya.

²²Se ene a to khene: Mbimo yile mwanana a nga ti hanya, ni ti toni sakudya ni dila, nguko ni ti ti khani: Mwendo MKOMA a na ni pfela wusiwana mwanana e hanya.

²³Kambe konkuwa a nga fa, ni nga ti tonela txani kambe sakudya kani? Ina ani ni nga sikota ku m'wuyisa kambe kani? Ani ni na tsula kwakwe, kambe ene kha na mbi wuya kwangu.

²⁴Sekoko Dhavhidha a to thavelela msikati wakwe Bhate-Sebha, e wulela nyumbani kwakwe, e otela nayo; aniko ene a to veleka mwanana wa mfana, e mraya ditina daku i Solomoni; MKOMA a to randa Solomoni.

²⁵Se a to rumela ngu dianza da mprofeti Nathani, se ene a to mraya ditina daku i Jedhidhiya, ngu kuranda ka MKOMA.

²⁶Ngu kumaha keto, Jowabhi a to lwa ni didhoropa da Rabha, da vanana va ka Amoni, e teka didhoropa da wukoma.

²⁷Sekoko Jowabhi a to rumela mitumi ka Dhavhidha, yi txi ya kha yona: Ni lwite ni didhoropa da Rabha, kambe ni tekile didhoropa da mati.

²⁸Konkuwa koko sengeleta vathu va va nga sala, u ya randela didhoropa, u di teka, kasi ku ni txo di teka ani didhoropa, di si dhanwi ngu ditina dangu.

²⁹Sekoko Dhavhidha a to sengeleta votshe vathu, e tsula didhoropani ka Rabha, e yalwa nado, se e di teka.

³⁰Se a to thavisa m'bhoti ha msungo ka mfumeli wa kona; wule kunemela ka wona i nga ti ti ka talenta yimweyo ya nzalama, ka wona ku ti ti ni marigwi a lisima, kambe wu to sanzekwa ha msungo ka Dhavhidha; se a to handa simaha so tala ngutu didhoropani.

³¹Se a to tisa vathu vale va nga ti ti ka dona, e va veka amu ka mthumo wa masaho, ni mithumoni ka misuka, ni ka matxhapu, e va pindisa ngu ka sikho sa sitini; se a to mahisa toneto ka otshe madhoropa a vanana va ka Amoni. Dhavhidha ni votshe vathu va to tshumela ve wuya Jerusalema.