Read chopi 2 Samuwele 13 Bible Online

2 Samuwele 13 - chopi bible

2 Samuwele 13

¹Ku to maheka taku, msana keto Abhisalome mwana Dhavhidha a ti ni ndiya yo tshura ngutu, awule ditina dakwe i nga ti ti Tamara, se Aminoni mwana Dhavhidha a to randa Tamara.

²Se Aminoni a to karateka, kala kuza e lwala ngu mhaka ya ndiyakwe Tamara, nguko a sanzi kuziva wamwamna; kambe Aminoni a to ti wona ti txi mkaratela ngutu kumaha to kari kwakwe.

³Kambe Aminoni a ti ti ni mungana, wule ditina dakwe i nga ti ti Jonadhabhe, mwana Simeya, mwanawe wa Dhavhidha. Jonadhabhe i ti ti mfana wo txhariha ngutu.

⁴Se ene a to m'gela ku khene: Ngu kutxani ditshiku ni ditshiku u gomako kupinda mpimo, na kuve u mwanana wa mfumeli kani? Khu na mbi ni gela kani? Sekoko Aminoni a to khene: No navela Tamara, ndiya Abhisalome, mwanathu.

⁵Se Jonadhabhe a to m'gela ku khene: Tsula u ya otela ha m'bhedhuni kwako, u maha ku nga wo lwala, se mbimo yi tate wako a nota e ta ku pfuxela, m'gele ku khawe: Nikombela ti to ndiyangu Tamara e ta ni ninga sakudya, a nate a ta bhika sakudya sa kona masoni kwangu, ni txi si wona, se e ni dyisetela.

⁶Sekoko Aminoni a to otela a txi nga o lwala. Se mbimo yile mfumeli a nga ya mpfuxela, Aminoni a to khene ka mfumeli: Ni kombela ti to ndiyangu Tamara e ta ni bhikela simbwanda simbidi masoni kwangu, kasiku ni txi dya sa manzani kwakwe.

⁷Sekoko Dhavhidha a to rumela dipswi nyumbani ka Tamara a txi khene: Tsula nyumbani ka ndiyako Aminoni, u ya m'bhikela sakudya sokari.

⁸Se Tamara a to tsula nyumbani ka Aminoni, ndiyakwe (kambe ene a ti ti otete), se Tamara a to teka mpupu e vhuva, e maha simbwanda masoni ka Aminoni, e si bhika.

⁹Se a to rewula digalangu e si phamela masoni ka Aminoni; kambe Aminoni a to lamba kudya. A txi khene: Gela vathu votshe ve huma nyumbani muwa! Se votshe va to huma nyumbani.

¹⁰Sekoko Aminoni a to khene ka Tamara: Tisa sakudya txibhiyani kwangu, u ta ni dyisa ngu dianza dako. Se Tamara a to teka simbwanda sile a nga hamba e si yisa txibhiyani, ka ndiyakwe Aminoni.

¹¹Se mbimo yile a nga ti ti mninga sakudya, a to mñola, a txi khene kwakwe: Ngono ndiyangu, u ta otela ni nani!

¹²Kambe Tamara a to m'gela ku khene: Ahim-him ndiyangu, u nga ni kurumete, nguko kha ti mahwi to nga eto amu Israyeli; u nga mahe wuphukuphuku wo nga wuwa.

¹³Nguko ni na ya hani ani ni tingana tangu kani? Se awe u na nga mmweyo wa siphukuphuku sa Israyeli. Konkuwa koko, na ku kombela ti to u gela mfumeli, nguko kha na mbi lamba ku ni tekana ni nawe.

¹⁴Kambe ene kha lava kuengisa dipswi da Tamara; se a ku a nga ti ni mtamo kupinda Tamara, a to mkurumeta, e otela nayo.

¹⁵Msana keto, Aminoni a to vengela Tamara ngu livengo la hombe ngutu, nguko livengo lile a nga mvenga ngu lona i ti ti la hombe kupinda lirando lile a nga ti mrandile ngu lona. Se Aminoni a to khene kwakwe: Khukha u tsula!

¹⁶Sekoko Tamara a to m'gela ku khene: Kha ku nga ni txigelo txo ni tovelisa tiya; wubihi wuwa mbwa hombe kupinda wule u nga ni mahela. Kambe kha lava ku mu engisa.

¹⁷Se a to dhana mfana wule a nga ti ti mthumela, a txi khene: Humisa wamsikati wuwa hahanze, u gwita u seka ditimba!

¹⁸Se Tamra a ti ti ambate txyambalo txa mixowo yayingi (nguko va ti ti ambala mikhatxwa yo nga toneto vanana vamahorana vo tuma va vafumeli), se txithumi txa Aminoni txi to humisa Tamara hahanze, ngu msana txi seka ditimba.

¹⁹Sekoko Tamara a to ti theletela dikhuma ha msungo, e vharulela txyambalo txa mixowo yayingi txile a nga ti ambate, se rwala mawoko ha msungo, e tsula a txi pekeletela tihuwa.

²⁰Se ndiyakwe Abhisalome a to khene kwakwe: Ndiyako Aminoni asi ngani nawe kani? Malala koko, ndiyangu; i ndiyako. U nga pandiseke mbiluni kwako ngu mhaka yiya. Ngu kumaha keto, Tamara a to zumba nyumbani ka ndiyakwe Abhisalome, a di ni txiwunda txa hombe.

²¹Se ngako mfumeli Dhavhidha a di pfite totshe timhaka tiya, a to henya ngutu.

²²Kambe Abhisalome kha womba txilo txo biha hambi txo tshura ka Aminoni; nguko Abhisalome, a to vengela Aminoni ngu kule a nga kurumeta Tamara, ndiyakwe.

²³Se ku to maheka taku, ku di pindile malembe mambidi o tala, Abhisalome a ti ti ni vakayi kona Bhahali-Hazori, ku ku hafuhi ni Efrayime, kambe Abhisalome a to ramba votshe vanana va mfumeli.

²⁴Se Abhisalome a to ya ka mfumeli a txi ya khene: Wona taku, txithumi txako txi ni vakayi, ni kombela ti to mfumeli ni sotshe sithumi sakwe mi tsula ni nani txithumi txako.

²⁵Kambe mfumeli a to khene ka Abhisalome: Ahim-him, mwanangu, kha hi na mbi tsula hotshethu, kasiku hi si ya ku nemetisela. Se a to mkurumeta, kambe ene kha tumela kutsula, aniko a to mkatekisa.

²⁶Sekoko Abhisalome a to khene: Ngako u txi tandeka, leka Aminoni, mwanathu, e tsula ni nathu. Kambe mfumeli a to m'gela ku khene: A na tsulela txani ni nawe kani?

²⁷Se Abhisalome a to mkurumeta, kala kuza e tumela ku Aminoni ni votshe vanana va mfumeli ve tula nayo.

²⁸Se Abhisalome a to leletela ka vafana vakwe, a txi khene: Wonisisani kha kwati; mbimo si mbilu ya Aminoni yi tsakako ngu vhinya, se ani ni txi mi gela ku khani: Dayani Aminoni! Sekoko mi na m'daya; mi nga thaveni; Ina hi ngani ni mi rumako kani? Tsanani, mi va tindena.

²⁹Se vafana va Abhisalome va to maha ka Aminoni nga ti Abhisalome a nga ti va leletile tona. Sekoko votshe vanana va mfumeli va to khukha, mmweyo ni mmweyo e gadha dimula dakwe, ve tutuma.

³⁰Se ku to maheka ti to va di ngadi hanzila, mhaka yi to hoka ka Dhavhidha, yo kha vona: Abhisalome a date votshe vanana va mfumeli, kha ka sala ni wammweyo kwawe.

³¹Sekoko mfumeli a to khukha, e vharulela syambalo sakwe, e ti rinza hahatshi; ngu mamahelo eyo, sotshe sithumi sakwe si ti ti ni syambalo so vharukela.

³²Kambe Jonadhabhe, mwana Simeya, mwanawe wa Dhavhidha, a to xamula, a txi khene: U nga wombe ka nyamne wangu ta ku votshe vanana va mfumeli va datwe, nguko i Aminoni e kha a nga fa; nguko Abhisalome a ti ti mbejete, kukhukhela ka ditshiku dile Aminoni a nga kurumeta Tamara, ndiyakwe.

³³Konkuwa koko, yi nga pandiseke ngutu mbilu ya mfumeli, nyamne wangu, ngu mhakeyo ya ku kha vona: Votshe vanana va mfumeli va fite; nguko i Aminoni dwe a nga fa.

³⁴Se Abhisalome a to thava. Kambe mfana wule a nga ti mwonelela a to gula maso e wona, se a to wona vathu vavangi va txi ta ngu nzila ya msana kwakwe, ngu didhawa da mmangoni.

³⁵Sekoko Jonadhabhe a to khene ka mfumeli: Ndiva hawa vanana va mfumeli, va wuya; mandingano ni dipswi da txithumi txako, ti mahisile toneto.

³⁶Se ku to maheka taku, mbimo yile a nga heta kuwombawomba, vanana va mfumeli va to hoka, ve guleta mapswi awe, ve dila; se nene mfumeli ni sotshe sithumi sakwe va to pekeletela tihuwa ta hombe ngutu.

³⁷ Ngu kumaha keto, Abhisalome a to thava eya ka Talimayi, mwana Amiyudhe, mfumeli wa Gesuri. Se Dhavhidha a to dila mwanana wakwe ka otshe masiku ale.

³⁸Ngu toneto, Abhisalome a to thavela kuya Gesuri, eya zumba kona malembe mararu.

³⁹Sekoko mfumeli Dhavhidha a ti ti xuva Abhisalome, nguko mbilu yakwe yi ti ti tshorete ka mhaka ya kufa ka Aminoni.