Read chopi 2 Samuwele 16 Bible Online

2 Samuwele 16 - chopi bible

2 Samuwele 16

¹ Se mibmo yi Dhavhidha a nga pindanyana tshoka ya mimango, a to tshangana ni Zibha, mfana wa Mefibhosete a di ni timbongola timbidi ti dirwate 200 wa mapawu, ni 100 wa sizangwa sa mauvha, ni 100 wa sizangwa sa mihando ya mbimo ya kuhisa, ni digarafawu da vhinya.

²Se mfumeli a txi khene ka Zibha: U lava txani ni siya kani? Zibha a to khene: Timbongola tiya ti na gadhwa ngu va nyumba yako awe mfumeli; mapawu ni mihando ya mbimo ya kuhisa si na va sakudya sa vafana, se vhinya yi na selwa ngu vale va no karala txiwulani.

³ Sekoko mfumeli a to khene: Ahani koko, mwanana wa nyamne wako kani? Se Zibha a to khene ka mfumeli: A sate kona Jerusalema, nguko a khene: Nyamsi, nyumba ya va ka Israyeli yi na ni tshumetela mfumo wa tate wangu.

⁴Sekoko mfumeli a to khene ka Zibha: Wona taku sotshe sile si ku ni Mefibhosete nzako. Se Zibha a to khene: Na ti namisa, ni na mane dikato masoni kwako, awe mfumeli, nyamne wangu.

⁵Se mbimo yile Dhavhidha a nga hoka Bhawurimi, ku to huma wamwamna wa lixaka la va ka Sawule, awule a nga ti dhanwa ku i Simeyi, mwana Gera; se a to ta a txi ruketela.

⁶A to rinzetela marigwi ka Dhavhidha, ni ka sotshe sithumi sa mfumeli Dhavhidha, hambi kule vathu votshe ni tindena totshe va nga ti ti didhawani kwakwe ka txinene ni ka txibhabha.

⁷Simeyi a txi ruketela, a ti ti khene: Huma, huma, m'thu wa mnoha, m'thu wa Bheliyali!

⁸MKOMA a ku ningile hakhelo ya wotshe mnoha wa nyumba ya va ka Sawule, ayi awe u fumako ka wukhalo wa yona; MKOMA a vekile mfumo manzani ka Abhisalome, mwanana wako; konkuwa awe u kuxanisekani, nguko u wamwamna wa mnoha.

⁹Sekoko Abhixayi, mwana Zeruiya, a to khene ka mfumeli: Ngu kutxani yimbwa yiya ya kufa yi ruketela mfumeli, nyamne wangu, kani? Ni leke ni pinda, ni ya mwila msungo!

¹⁰A to khene kambe mfumeli: I txani ni ku natxo ni nanu, anu vanana va Zeruiya kani? Mlekeni e ni ruketela, nguko MKOMA a m'gete ku khene: Ruketela Dhavhidha, nguko i mani a no womba ku khene: U maha txani toneto kani?

¹¹Dhavhidha a to khene kambe ka Abhixayi ni ka sotshe sithumi sakwe: Wona, hambi mwanana wangu wo huma ndani kwangu, a lava ku ni daya, se a na lambisa kutxani ku ni daya mwanana wa ka Bhenjamini kani? Mlekeni e ni ruketela, nguko ngu toneto a nga gelwa ngu Mkoma.

¹²MKOMA a na wona kuxaniseka kwangu, se e ni ninga kuthutha ngu mhaka ya kuruketela kwakwe ka nyamsi.

¹³Sekoko Dhavhidha ni vathu vakwe va to ti tsulela ngu nzila yawe; se Simeyi nene a to teka nzila yakwe e tsula ngu didhawa da mmango, a to tsimbila a txi ruketela, a txi rinzetela marigwi, ni kumaha lithulu.

¹⁴Se mfumeli ni votshe vathu vale a nga ti navo, va to hoka mnamboni ka Jordhani va di karate, ve humula koneyo.

¹⁵Sekoko Abhisalome ni votshe vathu, vavamna va ka Israyeli, va to ta Jerusalema; se Ayitofeli a ti ti kumweko navo.

¹⁶Se ku to maheka taku, a di hokile Husayi, muariki, mungana wa Dhavhidha, ka Abhisalome, Husayi a to khene ka Abhisalome: A na hanye mfumeli, a na hanye mfumeli!

¹⁷Kambe Abhisalome a to khene ka Husayi: Ina ngu lona lirando lako li u randako mngana wako ngu lona kani? U lambete txani kutsula ni mngana wako kani?

¹⁸Se Husayi a to khene ka Abhisalome: Ahim-him, ani ni wa wule a nga sawulwa ngu MKOMA ni votshe vathu vava, ni votshe va ka Israyeli, ni na zumba nayo.

¹⁹Se hahanze keyo, i mani ni di no mthumela kani? Ina hi nga mwanana wakwe kani? Nga kule ni nga thuma masoni ka tate wako, ni na thumisa toneto masoni kwako.

²⁰Sekoko Abhisalome a to khene ka Ayitofeli: Wombani txokari madingano ni ti hi fanelako ku timaha.

²¹Se Ayitofeli a to khene ka Abhisalome: Tsula u ya wulela ka vasikati va tate wako, vale a nga va siya kuve xayisa nyumba, kasiku votshe va ka Israyeli ve ziva taku u henyisile tate wako. Se manza a votshe vale va ku ni nawe ma na tsana.

²² Sekoko va to gwimba ditenda txitimwi ka nyumba, se Abhisalome a to ya wulela ka vasikati va tate wakwe masoni ka votshe va ka Israyeli.

²³Ka masiku ale, mapswi ale ma nga ti wombwa ngu Ayitofeli ma ti fana ni mapswi a Txizimu: Hambi Dhavhidha ni Abhisalome va ti ti themba ka otshe mapswi a Ayitofeli.