Read chopi 2 Samuwele 19 Bible Online

2 Samuwele 19 - chopi bible

2 Samuwele 19

¹Se va to kha vona ka Jowabhi: Wona, mfumeli Dhavhidha wa dila, a dila Abhisalome.

²Sekoko kuxula ka ditshiku dile, ku to hinduka kumaha txidilo ka votshe vathu, nguko ka dona ditshiku dile, vathu va to pfa ku txi wombwa taku: mfumeli a kuxanisekani ngutu ngu mhaka ya mwanana wakwe.

³Ka ditshiku donedo, vathu va to wulela didhoropani ngu kunyanimela, nga vathu va tingana to tutuma yimbini.

⁴Mfumeli koko, a ti ti fenengetile khohe yakwe, a txi kwangula a txi khene: Yowe mwanangu Abhisalome! Abhisalome, mwanangu, mwanangu!

⁵Sekoko Jowabhi a to wulela nyumbani ka mfumeli, a txi khene: Nyamsi u thete tingana sotshe sithumi sako, sile nyamsi si nga hulukisa wutomi wako, ni wutomi wa vanana vako va majaha ni vamahorana, ni wutomi wa vasikati vako, ni wutomi wa vasikati vako vavadotho.

⁶Awe u randa va va ku vengako, u venga va va kurandako; nguko, nyamsi u kombisa ti to vathangeli va yimbi ni sithumi kha va vhuni txilo kwako; kambe na pfisisa nyamsi taku, i ti ku a Abhisalome a ti ko hanya, athu hotshethu nga hi di fite nyamsi, sekoko eto, ti ndi na va i di ta tinene masoni kwako.

⁷Khukha koko, konkuwa; huma uya womba-womba u tsakisa timbilu ta sithumi sako; nguko na xambanya ngu MKOMA tito, u txo mbi huma, hambi m'thu ni wammweyo kha na mbi zumba ni nawe wusiku wuwa; eyo yi na va phango ya hombe kwako kupinda tiphango totshe ti ti nga kuhumelela, kukhukhela wuphyani kwako kala konkuwa.

⁸Sekoko mfumeli a to khukha eya khalahatshi ha txikeni, se va to gela vathu votshe, va txi kha vona: Wonani mfumeli, a khalahatshile ha txikeni. Sekoko votshe vathu va toya sengeletana masoni ka mfumeli; kambe va ka Israyeli va to tutuma, mmwani ni mmwani e ti tsulela ditendani kwakwe.

⁹Se votshe vathu, ka totshe tihunzu ta ka Israyeli, va to kanetisana, va txi kha vona: Mfumeli a hi thavisile manzani ka valala vathu, e hi txhatxhisa manzani ka Vafilista; kambe konkuwa, a tutumile ditikoni ngu mhaka ya Abhisalome.

¹⁰Se Abhisalome wule athu hi nga mtota kuva mthangeli txitimwi kwathu, a fite yimbini; konkuwa koko, mi malalela txani mi si tshumetiko mfumeli kani?

¹¹Sekoko mfumeli Dhavhidha a to rumela Zadhoki ni Abhiyatari, vaphaxeli, a txi khene: Gelani madhota a ka Judha, mi txi khanu: Ngu kutxani mi maha vo gwitisa ku wuyisa mfumeli nyumbani kwakwe kani? (Nguko mapswi a votshe va ka Israyeli ma hokile nyumbani ka mfumeli).

¹²Anu mi vanathu, marambu angu ni nyama yangu, nzanu; ngu kutxani mi maha vo gwitisa ku wuyisa mfumeli kani?

¹³Se ka Amasa, mi na khanu: Ina hi ngawe dirambu dangu ni nyama yangu kani? Txizimu txi na ni mahele ni tihi, ngako u si mahi mthangeli wa wugovelo masoni kwangu yotshe mbimo, ka wukhalo wa Jowabhi.

¹⁴Ngu kumaha keto, a to ndinda timbilu ta votshe vavamna va ka Judha, ti txi nga mbilu ya m'thu mmweyo dwe; se va to rumela dipswi ka mfumeli, va txi kha vona: Wuya ni sotshe sithumi sako.

¹⁵Sekoko mfumeli a to tshumela e wuya, eya hoka Jordhani; se va ka Judha va toya Giligali, kasi kuya tshangana ni mfumeli, ka didhawa dimwani da Jordhani.

¹⁶ Se Simeyi mwana Gera, mwana Bhenjamini, wa Bhawurimi, a to kuluveta e relela ni vavamna va ka Judha kuya tshangana ni mfumeli Dhavhidha.

¹⁷Se a ti ti ni 1.000 wa vavamna va ka Bhenjamini, kumweko ni Zibha, txithumi txa nyumbani ka Sawule, ni digumi da vanana vakwe ni mtxhanu, ni magumi mabidi a sithumi sakwe; kambe va to ta txhatuka Jordhani masoni ka mfumeli.

¹⁸Se va to txhatukisa ngalava, kasi kuya txhatukisa mwaya wa mfumeli, ni kumaha ti va ti tsakelako; sekoko Simeyi, mwana Gera, a to ti namisa masoni ka mfumeli, mbimo yile ene a nga ti txhatuka Jordhani.

¹⁹Se a to khene ka mfumeli: Nyamne wangu, u nga ni vekela mnandu, kambe u nga alakanye kubiha kule txithumi txako txi nga ku mahela, ka ditshiku dile mfumeli, nyamne wangu a nga huma Jerusalema; u nga ti veke mbiluni, awe mfumeli.

²⁰Nguko txithumi txako txa tiziva taku txi onhile; kambe wona taku ani ni wo khata ka yotshe nyumba ya Josefa wu a nga relela ku ta tshangana ni mfumeli, nyamne wangu.

²¹Sekoko Abhixayi, mwana Zeruiya a to xamula, a txi khene: Ina koko kha na mbi dawa Simeyi, kule a nga ruketela wo totwa wa MKOMA kani?

²²Kambe Dhavhidha a to khene: I txani ni ku natxo ani ni nanu vanana va Zeruiya, kuza nyamsi mi ni wukela kani? Ina ku nafa m'thu nyamsi Israyeli kani? Ngu kutxani mi si tiziviko taku nyamsi ni vekilwe kuva mfumeli txitimwi ka Israyeli kani?

²³Se mfumeli a to khene ka Semeyi: Khu na mbi fa! Kambe mfumeli a to xambanya kwakwe.

²⁴ Mexibhoseti mwana Sawule, a to relela nene e hingeta mfumeli, a to tsula a sa samba minenge, hambi kuwila maletu akwe, hambi kukuwula syambalo sakwe, kukhukhela ka ditshiku di mfumeli a nga khukha ngu dona kala ka ditshiku di mfumeli a nga wuya ngu kudikha.

²⁵Se ku to maheka taku, a di tile Jerusalema, ku ta tshangana ni mfumeli, mfumeli a to khene kwakwe: Mefibhoseti u lambete txani kutsula ni nani kani?

²⁶Se Mefibhoseti a to khene: Awe mfumeli, nyamne wangu, txithumi txangu txi ni xengile; nguko txithumi txako txi ti ti kha txona: Ni na sungelela mbongola ni gadha, se ni tsula ni mfumeli; nguko txithumi txako njilima.

²⁷Hahanze keto, a hembete txithumi txako masoni ka mfumeli, nyamne wangu; kambe mfumeli, nyamne wangu, a fana ni Ngelozi ya Txizimu; maha koko, ti u ti wonako i di ta tinene masoni kwako.

²⁸Nguko yotshe nyumba ya tate wangu nja vathu vo fanelwa ngu kufa, masoni ka mfumeli nyamne wangu; hambi keto, u vekile txithumi txako hagari ka vale vadyako mezani kwako; I txani kambe ni nga txi dilelako ka mfumeli kani?

²⁹Se mfumeli a to khene kwakwe: U ngadi wu txi wombawombela txani ngu timhaka tako kani? Ani ni wombile ni txi khani: Awe ni Zibha mi na abana tithembwe.

³⁰Se Mefibhoseti a to khene ka mfumeli: A na teke totshe, nguko mfumeli, nyamne wangu a wuyile ngu kudikha amu nyumbani kwakwe.

³¹ Bharizilayi, mugileyadhi, a to ta nene ngu Rogelini e ta txhatuka Jordhani kumweko ni mfumeli, kasiku m'heleketa ka dimwani didhawa da Jordhani.

³²Se Bharizilayi a ti ti kumbile ngutu, wa tanga ya mtxhanu wa magumi ni magumi mararu a malembe; kambe ene a ti ti heleketa sakudya ka mfumeli, mbimo yile mfumeli a nga ti zumba Mahanayime, nguko i ti m'thu wa hombe ngutu.

³³Se mfumeli a to khene ka Bharizilayi: A hi txhatuke hotshe, aniko ni na ya kuxayisa kona Jerusalema.

³⁴Kambe Bharizilayi a to khene ka mfumeli: I ngadi masiku muni a kuhanya kwangu, ka ku naza ni kwelele ni mfumeli kuya Jerusalema kani?

³⁵Nyamsi ni ni mtxhanu wa magumi ni magumi mararu a malembe, ina ni nga sikota kuhambanisa to biha ni ta tinene kani? Ina txithumi txako txi nga sikota kupfa kutshamba ka sile txi dyako ni kusela kani? Ina ani ni nga engisa mapswi a vaembeleli va vavamna ni vavasikati kani? Se txithumi txako txi nga rwekela txani kambe kunemela mfumeli, nyamne wangu, kani?

³⁶Txithumi txako txi na txhatuka ka kudotho Jordhani kumweko ni mfumeli; ana ni bongela txani mfumeli ngu mabongelo awa kani?

³⁷Leka txithumi txako txi tshumela, ni lava kuya fela didhoropani kwangu, hafuhi ni dithitha da tate vangu ni da mame wangu; aniko nditxetxo txithumi txako Kimani; a na txhatuke ni mfumeli, nyamne wangu, mmahele ti u ti wonako i di tinene masoni kwako.

³⁸Sekoko mfumeli a to khene: Kimani a na txhatuka ni nani, se ani ni na mmahela ti ti no woneka i di ta tinene masoni kwako, ni totshe ti a no ni kombela ni na ku mahela.

³⁹Ngako koko, votshe vathu va di txhatukile Jordhani, se mfumeli nene a di txhatukile, mfumeli a to pswopswa Bharizilayi e mkatekisa; se ene e tshumela eya ka wukhalo wakwe.

⁴⁰Se mfumeli a to pinda eya Giligali, kumweko ni Kimani; kambe vathu votshe va ka Judha va to mheleketa, kumweko ni hafu ya vathu va ka Israyeli.

⁴¹Wona taku votshe vavamna va ka Israyeli va to ta ka mfumeli, va txi ta kha vona: Ngu kutxani vanathu, vathu va ka Judha va nga ta kuteka ni nyumba yako ve kutxhatukisa Jordhani, kumweko ni votshe vathu va Dhavhidha kani?

⁴²Sekoko votshe vathu va ka Judha va to xamula ka vathu va ka Israyeli, va txi kha vona: Nguko mfumeli dixaka dathu; se mi henyela txani ngu eto kani? Ina hi to dya mtamo wa mfumeli, mwendo kuningwa txokari ngu ngene kani?

⁴³Se vavamna va ka Israyeli va to xamula ka vavamna va ka Judha, va txi kha vona: Athu hi ni digumi da tifanelo ka mfumeli, hambi ka Dhavhidha hi nato ngutu kupinda anu; ngu kutxani koko, mi si khataliko ngu ngathu, kasiku dipswi dathu di si mahi do khata, kasi kutshumela hi wuyisa mfumeli wathu kani? Kambe dipswi da vathu va ka Judha di ve ni mtamo ngutu kupinda dipswi da vathu va ka Israyeli.