Read chopi 2 Samuwele 20 Bible Online

2 Samuwele 20 - chopi bible

2 Samuwele 20

¹ Sekoko ku to dhuka kumaneka wamwamna wa Bheliyali, wule ditina dakwe i nga ti ti Sebha, mwana Bhikiri, m'thu wa ka Bhenjamini, wule a nga veta mpundu, a txi khene: Kha hi nga ni txyavelo ka Dhavhidha, hambi thomba ka mwana Jese; anu va ka Israyeli, mmwani ni mmwani a na tsule ditendani kwakwe.

²Sekoko votshe vavamna va ka Israyeli va to leka kulondeta Dhavhidha, se ve londeta Sebha, mwana Bhikiri; kambe vavamna va ka Judha va to ti pata ka mfumeli wawe, kukhukhela Jordhani kala Jerusalema.

³ Mbimo yile koko, Dhavhidha a nga wuya nyumbani kwakwe, kona Jerusalema, a to teka digumi da vasikati vakwe vavadotho, vale a nga ti va site ve xayisa nyumba, e va veka ka nyumba kuva vawoneleli, a txi va dyisa; aniko kha wulela kwawe, kambe a to va vhalela kala ditshiku da kufa kwakwe, ve hanya kufana ni tinoni.

⁴Mfumeli a to khene kambe ka Amasa: Ni rambele vavamna va ka Judha mndani ka masiku mararu, sekoko, awe u nga te navo hawa.

⁵Se Amasa a to tsula eya ramba va ka Judha; kambe a to ya swela kuza kupinda mbimo yi a nga gelwa yona.

⁶Sekoko Dhavhidha a to khene ka Abhixayi: Sebha, mwana Bhikiri, a na hi xanisa ngutu kupinda Abhisalome; ngu kumaha keto, teka sithumi sa nyamne wako, u mlondeta, kasiku asi mani madhoropa a mtamo, se e huluka masoni kwathu.

⁷Sekoko vavamna va Jowabhi va to mlondeta, kumweko ni Vakereti, ni Vapaleti, ni votshe vavamna va mtamo; avava va to huma Jerusalema ve londeta Sebha, mwana Bhikiri.

⁸Se va di hokile ka dirigwi da hombe di ku hafuhi ni Gibheyoni, Amasa a to humelela masoni kwawe; kambe Jowabhi a ti ambate syambalo sa yimbi, txitimwi ka sona a ti ti sungile libhande ni ditxhari ha txiwununi amu ka msava wakwe; se Jowabhi a txi hoka hafuhi, ditxhari di to wa hahatshi.

⁹Se Jowabhi a to khene ka Amasa: Ina wa wuka kwati mwanathu kani? Se Jowabhi a to ñola txiletu txa Amasa ngu dianza da txinene kasiku e mpswopswa.

¹⁰Se Amasa kha wonisisa ditxhari di di nga ti ti manzani ka Jowabhi, aho kuza Jowabhi e thola Amasa ka limbavhu la wutxhanu, se masembe me kubuka hahatshi; kambe kha mthola ka wumbidi, se Amasa a to fa; sekoko Jowabhi ni mwanawe Abhixayi va to londeta Sebha, mwana Bhikiri.

¹¹Kambe mmweyo ka vafana va Jowabhi a to ema hafuhi ni txirumbi txa Amasa, a txi khene: Awu a tsakako ngu Jowabhi ni wule a tsakelako Dhavhidha, a na londete Jowabhi!

¹²Se txirumbi txa Amasa txi ti tate ngu mnoha hagari ka nzila; kambe wamwamna wule a di woni taku votshe vathu va ta ve ta ema, a to ndinda txirumbi txa Amasa ha nzila e txi yisa txitingani, se e txi fenengeta ngu didhamba; nguko a woni taku votshe va va nga ti hoka kwakwe va ti ko ema.

¹³Se mbimo a nga txi thavisa ha nzilani, votshe vathu va to londeta Jowabhi, kasi kututumisa Sebha, mwana Bhikiri.

¹⁴Se a to pinda ngu ka totshe tihunzu ta va ka Israyeli kala kuza e hoka kona Abheli-Bheti-Mahaka, ni votshe Vabheri va to sengeletana ve mlondeta.

¹⁵Se va to ta mrandela kona Abheli-Bheti-Mahaka, ve maha txituletule digumani ka didhoropa, ngako a nga ti maneka hahanze ka diguma; kambe votshe vathu vale va nga ti ti ni Jowabhi va to peketela diguma kasiku di wisa.

¹⁶Sekoko wamsikati wa wutxhari a to kwangula a di mndani ka didhoropa, a txi khene: Engisani, engisani, na mi kombela taku mi gela Jowabhi, mi txi khanu: Tshuketa kheno kasi ku ni ta kugela mahungu.

¹⁷Jowabhi a to tshuketa kwakwe, se wamsikati a txi khene: Ngawe Jowabhi kani? Se ene a to khene: Ngani! Se wamsikati a to khene ka Jowabhi: Engisa mapswi a txithumi txako! Se Jowabhi a to khene: Na engisa!

¹⁸Sekoko wamsikati a to womba a txi khene: Kale ku ti tolovelwa kuwombwa va txi kha vona: Kha ditshuri, va kombete wudhota ka Abhele; se ta woneka to va wu londetile.

¹⁹Ani ni mmweyo wa vale vo thutha ni kuthembeka ka va ka Israyeli; se awe u lava kulovisa didhoropa di i ku mame ka Israyeli; nguku txani koko, u lava kulovisa thomba ya MKOMA kani?

²⁰Sekoko Jowabhi a to xamula, a txi khene: Ti nave kule, ti nave kule ni nani ti to ni maha to ngeto, kuva ni lovisa mwendo ni fuvisa!

²¹Hi nga yona mhaka eyo; kambe m'thu mmweyo wa mmangoni ka Efrayime, ditina dakwe i ku Sebha, mwana Bhikiri, a guletile dianza e wukela mfumeli Dhavhidha; ni ningeteni ene dwe, se ni na huma amu didhoropani. Sekoko wamsikati a to khene ka Jowabhi: Wona taku hi na kurinza msungo wakwe ngu txitimwi ka diguma.

²²Se wamsikati ngu wutxhari wakwe a to ya womba-womba ni votshe vathu, se va to ya wila msungo wa Sebha, mwana Bhikiri, veya wu rinza ka Jowabhi. Sekoko Jowabhi a to veta mpundu, ve huma didhoropani, mmweyo ni mmweyo e ti tsulela ditendani kwakwe. Kambe Jowabhi a to tshumelela Jerusalema ka mfumeli.

²³Se Jowabhi i ti ti mthangeli wa dotshe dibutho da yimbi da ka Israyeli; se Bhenaya, mwana Joyadha, i ti ti mthangeli wa Vakereti ni va Vapeleti;

²⁴kambe Adhoramu i ti ti mthangeli wa mithumo ya txibhalo; Josafati, mwana Ayiludhi i ti ti mxayisi wa mibhalo;

²⁵Sevha i ti ti mabhalani, Zadhoki ni Abhiyatari i ti ti vaphaxeli;

²⁶se Ira mujayiri, i ti ti mthangeli wa hombe wa Dhavhidha.