Read chopi 2 Samuwele 22 Bible Online

2 Samuwele 22 - chopi bible

2 Samuwele 22

¹Se Dhavhidha a to womba ka MKOMA mapswi a ndando yiya, ka ditshiku dile MKOMA a nga mtxhatxhisa manzani ka votshe valala vakwe ni manzani ka Sawule.

²A to khene koko: MKOMA dirigwi dangu, ni wukhalo wangu wo tsana, ni mtxhatxhisi wangu.

³Txizimu dirigwi dangu, ni na themba ka txona. Txitxhangu txangu, ni mtamo wa kuhanyiswa kwangu, dikhokhola dangu ni wuthavelo wangu. Awe Mhanyisi wangu, u ni hanyisile ka vale va ni xanisako.

⁴MKOMA ana ni fanelo ya kudhumiswa, ni mdhani, se ni mana kutxhatxhiswa ka valala vangu.

⁵Nguko mavimbi a kufa ma ni randete, ni mtalo wa wubiha wu ni fenengetile.

⁶Majoke a kuhokomani ma ni sungile, tingoti ta lifo ti ni mani.

⁷Na ni di kupandisekani kwangu ni dhani MKOMA, kambe ni dite ka Txizimu txangu; ene a engisile dipswi dangu a di dithepeleni kwakwe, ni kudila kwangu kuhokile tinzeveni kwakwe.

⁸Sekoko mafu ma to zinginika me bandeka, makhato a nzuma ma to zinginika me bandeka, nguko ene a henyile.

⁹Wu to kwelela wutshi wa tithonvuni kwakwe, ni mndilo wo lovisa ngu txisofuni kwakwe; ni makala o turiswa ngu ngene.

¹⁰Se a to kweva nzuma e txhika, aniko txidema txa hombe txi ti ti hahatshi ka mikondo yakwe.

¹¹Se a to gadha ka dikerubhima, e puruma ngu dona; e wonwa txitimwi ka tibhapi ta moya.

¹²A to veka txidema amu ka matenda a ma nga mranganyeta, kupatana ka mati, ni marefu a nzumani.

¹³Kuphatima kwakwe, ku to turisa makala a mndilo.

¹⁴MKOMA a to dhinda a di nzumani, Nyatxitimwi a to pfalisa dipswi dakwe.

¹⁵A to khwinza tingove takwe e va fula; se kukeluka ku to vathavisa.

¹⁶Kambe ku to humelela kutshima ka linene, makhato a mafu ma to vhunungulwa, ngu kudhusa ka MKOMA, ni kufuteta ka moya wa tithonvuni kwakwe.

¹⁷A nawulutile diwoko dakwe a di txitimwi, e ni ñola; e ni humisa amu ka mati amangi.

¹⁸A ni hulukisile ka valala vangu va mtamo, ni ka vale va ni vengelako, nguko va ni mtamo ngutu kupinda ani.

¹⁹Va to ni mana ngu ditshiku da dikhombo dangu; kambe MKOMA a ti mahile txiseketelo txangu.

²⁰Se a to ni humisa ha kubasani, e ni hanyisa, nguko wa ni tsakela.

²¹MKOMA a ni hakete madingano ni kululama kwangu, madingano ni kusawuleka ka manza angu a ni tshumetete.

²²Nguko ni xayisile tinzila ta MKOMA, kambe kha na hambuka ka Txizimu txangu.

²³Nguko sotshe sileleto sakwe si ti masoni kwangu, ni sirumo sakwe kha na si tshuralela.

²⁴Kambe ni vi m'thu wa ditshuri masoni kwakwe, aniko ni tivhikela ka tinzila to biha.

²⁵Se MKOMA a ni tshumetete madingano ni kululama kwangu, ni madingano ni kusawuleka kwangu masoni kwakwe.

²⁶Ka wule wamnene u tikomba ngu wunene, ka wamwamna wo thembeka u tikomba ngu kuthembeka.

²⁷Se ka wule wo sawuleka u woneka u di sawulekile, aniko ka wule wo biha, u ti wonekisa ngu wubihi.

²⁸Se awe wa txhatxhisa vathu va va xanisekako, aniko maso ako ma wukela vale va ti guletako, kambe awe wa va wisa hahatshi.

²⁹Nguko awe MKOMA u liwoningo langu; kambe MKOMA wa woninga txidema txangu.

³⁰Nguko ni nawe na sikota kupinda hagari ka valala, ngu Txizimu txangu ni na ndaka diguma.

³¹Nzila ya Txizimu yi hetisekile, ni dipswi da MKOMA di basile, ene txitxhangu txa votshe vale va mthembako.

³²Nguko i mani i ku Txizimu, hahanze kwako MKOMA kani? Ni ku i mani i ku dirigwi, hahanze ka Txizimu txathu kani?

³³Txizimu dikhokhola dangu, ni mtamo wangu, ngu txona txi mahako nzila yangu yi va yo hetiseka.

³⁴ Txi maha ti to mikondo yangu yi fana ni ya timhoti; txi ni veka txitimwi ka mmango wangu.

³⁵Ene a gondisa manza angu kulwa, aha koza diwoko dangu di sikota funya wulaho wa koporo.

³⁶U ni ningile txitxhangu txa kuhanyisa kwako, kambe ngu wunene wako, u ni kulisile.

³⁷U ananisile nzila hahatshi ka mikondo yangu, se mikondo yangu kha ya rithimuka.

³⁸Ni tutumisile valala vangu, ni vaxula, kha na tshumela kambe, kala kuza ni va lovisa.

³⁹Ni va lovisile ni va ganyatela, aha koza ve tandeka ni kukhukha, aniko va to wa hahatshi ka mikondo yangu.

⁴⁰Nguko u ni sungile ngu mtamo wo ya yimbini, u wisile hahatshi avale va ni wukelako.

⁴¹Se u ni ningile magondo a valala vangu, avale va nga ti ni nyenya, se ni va hoxotile.

⁴²Va to wona, kambe kha va mana mtxhatxhisi, ina, ka MKOMA, kambe kha va xamula.

⁴³Sekoko ni to va tshinda va txi nga lithule la mafu, ni va kandetela ni ku vafuvisa kufana ni lidhaka la hanzila.

⁴⁴Awe u ni txhatxhisile ku lwisanani ka vathu vangu; kambe u ni veka ku va mthangeli wa matiko; vathu vale ni nga si va zivi va na ni thumela.

⁴⁵Vanana va vamatiko va ti vekile hahatshi, va di pfite dipswi dangu, va ni engisile.

⁴⁶Vanana va vamatiko va gumile mtamo; se va huma mikhokholani kwawe ngu kudhudhumela.

⁴⁷MKOMA wa hanya, ku na dhumiswe dirigwi dangu, kambe txi na guletwe Txizimu, dirigwi da kuhanyiswa kwangu!

⁴⁸Txizimu txi txi ni ningako kuphota ko enela, txi vekako vathu hahatshi kwangu,

⁴⁹kambe txi ni thavisako hagari ka valala vangu, se awe wa ni guleta txitimwi ka vale va ni wukelako; u ni txhatxhisa ka m'thu wa mtamo.

⁵⁰ Ngu toneto, awe MKOMA, ni na kudhumisa hagari ka matiko, kambe ni na embelela tindando to dhumisa ditina dako.

⁵¹Ene ngene i ku txitezi txa kuhanyisa ka mfumeli wakwe, kambe a komba lirando ka wule wo totwa wakwe, ka Dhavhidha ni ka liveleko lakwe, kala kupinduka.