Read chopi 2 Samuwele 9 Bible Online

2 Samuwele 9 - chopi bible

2 Samuwele 9

¹ Se Dhavhidha a to khene: Ina ku ni m'thu a nga sala ka nyumba ya ka Sawule, kasi ku ni mmahela wuxinji, ngu mhaka ya kuranda Jonatani kani?

²Se ku ti ti txithumi txa nyumba ya ka Sawule, ditina da txona i ku Zibha; va to ya txi dhana txi ta ka Dhavhidha, mfumeli, se a to ta khene ka txona: Ngawe Zibha kani? Se ene a to khene: Ina, ngani txithumi txako.

³ Se mfumeli a to khene: Ina kha ku nga ni wokari wa nyumba ya Sawule, kasiku ni txi mmahela wuxinji wa Txizimu kani? Sekoko Zibha a to khene ka mfumeli: Aho mwanana wa Jonatani, wo limala minenge.

⁴Se mfumeli a to khene kwakwe: Ahani kani? Kambe Zibha a to khene ka mfumeli: Ndiyole waho m'tini ka Makiri, mwana Amiyeli, kona Lo-Dhebhari.

⁵Sekoko mfumeli Dhavhidha a to rumela vathu veya mteka m'tini ka Makiri, mwana Amiyeli, wa Lo-Dhebhari.

⁶Se mbimo yile Mefibhosete, mwana Jonatani, mwana Sawule a nga hoka ka Dhavhidha, a to nama e khizama hahatshi; se Dhavhidha a to khene: Mefibhosete! Se ene a to khene: Nditxe txithumi txako!

⁷Se Dhavhidha a to khene kwakwe: U nga thave, nguko ni lava ku ku mahela wuxinji ngu mhaka ya kuranda Jonatani, tate wako. Kambe ni na kutshumetela otshe mapulo a tate wako Sawule, awe u na dyela mezani kwangu masiku otshe.

⁸Sekoko a to khizama a txi khene: I mani txithumi txako, aha koza u tikaratela yimbwa yofa, yo fana ni nani kani?

⁹Sekoko Dhavhidha a to dhana Zibha, mfana wa Sawule, a txi khene kwakwe: Sotshe sile si nga ti lumba Sawule ni sotshe sa nyumbani kwakwe, ni na si ningela ka mwanana wa nyamne wako.

¹⁰U na m'dhimela thembwe koko, awe ni vanana vako, ni sithumi sako, kambe u na tisa mihando ya kona, kasi ku mwanana wa nyamne wako a na mana sakudya; se Mefibhosete, mwanana wa nyamne wako a na dyela mezani kwangu otshe masiku. Zibha a ti ti ni digumi da vanana ni mtxhanu, ni magumi mambidi a sithumi.

¹¹Se Zibha a to khene ka mfumeli: Madingano ni totshe ti mfumeli, nyamne wangu, a leletelako ka txithumi txakwe, txithumi txakwe txi na maha toneto. Kambe Mefibhosete a na dyela mezani kwangu ku nga mmweyo wa vanana va mfumeli.

¹²Mefibhosete a ti ti ni mwanana wam'dotho, wule ditina dakwe i nga ti Mika; se votshe vale va nga ti ti zumba m'tini ka Zibha i ti sithumi sa Mefibhosete.

¹³Mefibhosete koko, a ti ti zumba Jerusalema, a txi dya mezani ni mfumeli masiku otshe; I ti ti txilima txa minenge yotshe.