Read chopi 1 Vafumeli 12 Bible Online

1 Vafumeli 12 - chopi bible

1 Vafumeli 12

¹Se Robhowamu a to tsula Sikemi, nguko votshe va ka Israyeli va tile Sikemi, ku ta mmaha mfumeli.

²Ku mahekile ti to mbimo yile a nga ti pfa Jerobhowamu, mwana Nebhate, a di ngadi Egipta (ngako Jerobhowamu a di tutumile masoni ka mfumeli Solomoni, eya zumba Egipta.)

³Va to rumisa ku eya dhanwa; se Jerobhowamu ni wotshe msengeletano wa ka Israyeli, va tile ve ta womba-womba ni Robhowamu, va txi kha vona:

⁴Tate wako a nemetisile dikange dathu; sekoko awe hehukisa wukarawa wu wo nemela wa tate wako ni dikange dathu di a nga hi khoneka, se athu hi na kuthumela.

⁵Se ene a va gete ku khene: Tsulani, ngu ditshiku da wuraru mi na wuya kwangu. Se vathu va to tsula.

⁶Se Robhowamu a to tshangana ni madhota ale ma nga thuma ni tate wakwe Solomoni, a txi ngadi e hanya, a txi khene: Mi ni ninga wudhota muni ku ni xamula ngu wona vathu vava kani?

⁷Se vona va to womba ku kha vona: Ngako nyamsi u txi va thumela vava vathu, ngu ku va vhuna, u txi va xamula ngu kuwomba mapswi amanene, otshe masiku va na va sithumi sako.

⁸Hambiketo ene a to leka milayo yile a nga gelwa ngu madhota, e pfa to gelwa ngu majaha ale a nga kula kumweko nawo, va nga ti masoni kwakwe.

⁹A txi khene kwawe: Anu mi ni laya kuva ni va xamulisa kutxani vathu vava, va nga ta ni gela tiya: Hehukisa dikange di tate wako a nga hi khoneka.

¹⁰Se majaha ale ma nga kula nayo ma to m'gela tiya: Xamulisa tiya ka vathu vale va nga ta kugela ku kha vona: Tate wako a nemetisile ngutu dikange dathu, aniko awe di hehukise kwathu; u na va gela tiya: Litiho langu la lidotho li dhimbile ngutu kupinda txiwunu txa tate wangu!

¹¹Ku nga ku tate wangu a nga mi khinyaveza ngu dikange do nemela, ani ni na engetela kambe dikange danu; tate wangu a mi tsayisile ngu sisephu, se ani ni na mi tsayisa ngu tingume.

¹²Sekoko Jerobhowamu a tile ni votshe vathu ka Robhowamu, ngu ditshiku da wuraru, ku nga tile mfumeli a nga ti wombile a txi khene: Wuyani kwangu ngu ditshiku da wuraru.

¹³Se mfumeli a to va xamula vathu vale ngu kukaratisa ngutu, nguko a ti lekile wudhota wule a nga ti ningilwe ngu madhota.

¹⁴Se a to va gelisa tile a nga vhuniswa tona ngu majaha, a txi khene: Tate wangu a nemetisile dikange danu, sekoko ani ni na engetela kambe kunemela ka dikange danu; tate wangu a mi tsayisile ngu ku mi kwapela, aniko ani ni na mi tsayisa ngu tingume.

¹⁵Mfumeli kha ngava ni mhaka ngu vathu, nguko ku va wukela kuwa kutxita ngu ka MKOMA, kasi kutsanisa dipswi dile a nga ti di wombile ngu mprofeti Ayasi, musilonita ka Jerobhowamu, mwana Nebhate.

¹⁶Msana ka kuva votshe Vaisrayeli va di ti woni taku mfumeli kha va engisi, vathu va to tshumela ve mxamula ku kha vona: Njiavelo muni hi ku natxo athu ka Dhavhidha kani? Kha hi mani thomba ka mwana Jese. Tsula matendani kwako awe Israyeli! Ninga koko, ka nyumba yako, awe Dhavhidha. Se Israyeli a to tsula matendani kwakwe.

¹⁷Kasi ngu mhaka ya vanana va ka Israyeli avale va nga ti zumba ka madhoropa a ka Judha, a to va fumela Robhowamu.

¹⁸Se mfumeli Robhowamu a to rumela dibutho dile ka Adhoramu i nga ti msengisi wa mbasani, di txi ya mkoyolela ngu marigwi, a txi fa; kambe mfumeli Robhowamu a to kwela ka txikotxikani txakwe e tutumela kuya Jerusalema.

¹⁹Ngu toneto, Vaisrayeli va to ti lumula ka nyumba ya ka Dhavhidha kala ka ditshiku da nyamsi.

²⁰Se ku to maheka ati to, va di ti pfite votshe vathu taku Jerobhowamu a wuyile, va to rumela dipswi do m'dhana e ta ka msengeletano, ve ta mfumisa txitimwi ka dotshe ditiko da Israyeli; kha ngaho wu a nga londisa mahanyelo a nyumba ya Dhavhidha, hahanze ka lihunzu la ka Judha.

²¹Robhowamu ngako a di hokile Jerusalema, a to tshanganisa yotshe nyumba ya ka Judha ni lihunzu la Bhenjamini, ni 180.000 wa vale va nga sawulwa, vo tsana amu ka yimbi, kasi ku yalwa ni nyumba ya ka Israyeli, kasi kutshumetela mfumo ka Robhowamu, mwana Solomoni.

²²Sekoko dipswi da Txizimu di tile ka Semaya, m'thu wa Txizimu, di txi kha dona:

²³Womba Robhowamu mwana Solomoni, mfumeli wa ka Judha, ni ka yotshe nyumba ya ka Judha, ni ka Bhenjamini, ni ka votshe vathu, u txi khawe:

²⁴MKOMA a khene: Kha mi na mbi kwelela mi txi ya wukela vananu, i ku vanana va ka Israyeli; m'thu ni m'thu a na tshumele e tsula m'tini kwakwe, nguko ani ngani ni nga maha mthumo wuwa. Se va to engisa dipswi da MKOMA, va to tshumela madingano ni kuwomba ka MKOMA.

²⁵Se Jerobhowamu a to aka Sikemi, ka mmango wa Efrayime, e zumba konaho, a to khukha nguho eya aka Penuweli.

²⁶Se Jerobhowamu a to womba mbiluni kwakwe ku khene: Konkuwa, wukoma wu na tshumelela nyumbani ka Dhavhidha.

²⁷Ngako vathu vava va txi kwela veya maha miphaxo Jerusalema, Nyumbani ka MKOMA, mbilu yawe vathu vava yi na rendekela ka nyamne wawe, Robhowamu, mfumeli wa Judha, se va na ni daya, se ve tshumelela ka Robhowamu, mfumeli wa Judha.

²⁸Ngu konaho, mfumeli a to wumba marole mambidi a nzalama, e va gela ku khene: Mthumo wanu wawungi i nave wo kwelela Jerusalema; wa siwona sizimu sako awe Israyeli, si nga kuhumisa Egipta.

²⁹Se a vekile txizimu tximwetxo kona Bheteli, e veka tximwani kona Dhani.

³⁰Se tximaho txiya txi mahile txionho, nguko vathu va txi tsula kala Dhani, mmweyo ni mmweyo a txi khozela.

³¹Se a to aka tinyumba to guleka, e teka vathu va hahatshi e va maha vaphaxeli, ava i nga si nga vanana va ka Levhi.

³²Jerobhowamu a to maha m'buso ngu mtxima wa wutxhanu ni yiraru, ka ditshiku da digumi ni mtxhanu ka mtxima.

³³Se a to maha miningelo ka txiluvelo txi a nga txi aka Bheteli, ngu ditshiku da digumi ni mtxhanu, ka mtxima wa wutxhanu ni yiraru, ka dilembe dile a nga ti di pimisile mbiluni kwakwe, se a to mahela m'buso vanana va ka Israyeli, ni miningelo txiluveloni, a txi hisa dibaselo.