Read chopi 1 Vafumeli 17 Bible Online

1 Vafumeli 17 - chopi bible

1 Vafumeli 17

¹ Sekoko Elija, wa Tisibha, mmweyo wa vaaki va Gileyadhi, a to khene ka Akabe: Ni xambanya ngu MKOMA a hanyako, Txizimu txa Israyeli, awu ni ku masoni kwakwe, ti to kha ku na mbiwa mati, hambi mwando, hahanze ka kuva ni kombela.

²Msana keto, di tile kwakwe dipswi da MKOMA di txi kha dona:

³Khukha ngu hawa u tsula wutxani, i nda ya sisala mabambe ka txinambwana txa Kerite, txo dingetelana ni Jordhani.

⁴Se u na sela mati a txinambwana; nguko ni rumile magwana ati to ma na kudyisa.

⁵Se a to tsula eya maha madingano ni dipswi da MKOMA, nguko a to tsula eya zumba hafuhi ni txinambwana txa Kerite, txo dingetelana ni Jordhani.

⁶Se ni mixo magwana ma ti m'heleketela mapawu ni nyama, se ni minova kambe ma ti m'heleketela mapawu ni nyama; se a txi sela mati a txinambwanani.

⁷Se ku to maheka to, ngu kupinda ka masiku, txinambwana txi to oma, nguko ma si zivi kuwa mati.

⁸Sekoko di tile kwakwe dipswi da MKOMA, di txi kha dona:

⁹ Khukha u tsula Sarepita, ku manekako Sidhoni, u txi ya zumba kona; wona to ani ni rumile wamsikati wa noni, a ti to e kudyisa.

¹⁰Sekoko ene a to khukha e tsula Sarepita; se mbimo yi a nga txi hoka ditimbani ka didhoropa, ku ti tiho konaho wamsikati wa noni a nga ti lava tikhuni. Se ene a to m'dhana, a txi khene: Na ku kombela, nihe mati amadotho o sela ngu txihindwana.

¹¹Se mbimo yile a nga ti tsula kuya reka, ene a to m'dhana a txi khene: Nihe koko ni dona dipawu da didotho ngu manza ako.

¹²Se ene a nje khene: Ni xambanya ngu MKOMA Txizimu a hanyako, hambi txibhubhutela txatxidotho kha ni nga natxo, hahanze ka dianza da mpupu amu ka khadi, ni sitonana amu ka txibhembe; hi nga wona, ni mani tihale timbidi, se ni na si lulamisela ani ni mwanana wangu, hi na dya hi txi fa.

¹³Se Elija a to khene: U nga thave; tsula u ya maha tona ti u nga womba; hambiketo, khata ngu ku ni mahela txibhubhutela txatxidotho uta natxo hahanze; ngu msana u na maha txako ni txa mwanana wako.

¹⁴Nguko MKOMA, Txizimu txa Israyeli, a khene: Mpupu kha wu na mbi guma khadini, ni mtona kha wu na mbi pwateka txibhembeni, kala ka ditshiku dile MKOMA a no nisa mati ha mafuni.

¹⁵Se ene a to tsula eya maha madingano ni kuwomba ka Elija; ngu kumaha keto, a to dya ene, ni Elija, ni va mwaya wakwe, ka masiku amangi.

¹⁶Kha wa guma mpupu khadini, hambi mtona kha wa pwateka txibhembeni, madingano ni dipswi da MKOMA, ngu txisofu txa Elija.

¹⁷Msana ka kumaheka ka totshe tiya, mwanana wa wule wamsikati wa nyamne wa m'ti, a to lwala; se mpando wakwe wu to tikisa ngutu, kuza ku si sali ni moyanyana wa wudotho.

¹⁸Se ene a to khene ka Elija: Njitxani ni ku natxo ni nawe, awe m'thu wa Txizimu kani? U tile kasi ku ta ni wusela wusiwana wangu, u daya mwanana wangu kani?

¹⁹Se ene a to khene: Ni ningete mwanana wako. Se a to mteka ngu hamidi kwakwe e tsula nayo txitimwi, ka wukhalo wu a nga ti zumba ka wona, se a to mu otelisa ha m'bhedhuni kwakwe.

²⁰Se a to khongela ka MKOMA a txi khene: Awe MKOMA, Txizimu txangu, u xanisela txani noni yiya ni zumbwako nayo, ngu kudaya mwanana wa yona kani?

²¹ Sekoko Elija a to bubuma kuraru txitimwi ka mwanana, e khongela ka Txizimu, a txi khene: Awe MKOMA, Txizimu txangu, na ku kombela ku u tshumeta moya ka mfana wuwa.

²²Se MKOMA a to engisa dipswi da Elija. Se moya wa mfana wu to tshumelela kwakwe, e tshumela e hanya.

²³Se Elija a to txhika ngu txitezi ni mwanana eya mningela ka mwamwakwe nyumbani; a nje khene kha Elija: Wona! Mwanana wako wa hanya.

²⁴Sekoko wamsikati a to khene ka Elija: Se na tiziva koko taku u m'thu wa Txizimu, ni ti taku dipswi da Txizimu txisofuni kwako ditshuri.