Read chopi 1 Vafumeli 21 Bible Online

1 Vafumeli 21 - chopi bible

1 Vafumeli 21

¹Se msana ka tiya, ku to maheka taku: Nabhote, Mujezireyeli, a ti ti ni Thembwe yi nga ti hafuhi ni nyumba ya wukoma ya Akabe, mfumeli wa Samariya,

²Akabe a to womba ka Nabhote, a txi khene: Ni ninge thembwe yako ni phaya ka yona siyalo, nguko yi hafuhi ni nyumba yangu; se ni na kuninga yimwani thembwe ya txhuko kupinda yona; ni kungako u txi ti wona, ni na kuninga mtengo wa yona ngu male.

³Sekoko Nabhote a to khene ka Akabe: MKOMA a na ni xayise ni si ku ningi thomba ya vatate vangu.

⁴Sekoko Akabe a to wuya m'tini kwakwe a di swirekile ni kuhenya, ngu mhaka ya dipswi dile a nga xamulwa ngu Nabhote, Mujezireyeli, do khene: Kha ni na mbi kuninga thomba ya vatate vangu. Se a to otela ha m'bhedhuni kwakwe, a txi wuna khoheni, kambe a sidyi dipawu.

⁵Sekoko msikati wakwe Jezabheli a to ta mu wotisa a txi khene: Njitxani txi kuho, moya wako wu si tsakiko, kambe u si dyi kani?

⁶Se Akabe a to khene ka msikati wakwe Jezabheli: Ngu ti to ni gela Nabhote, Mujerireyeli, ni txi khani: Ni xavisele thembwe yako ngu male; mwendo u txi ti lava ni na kuninga yimwani thembe ka wukhalo wa yiya. Aniko Nabhote a to khene: Kha ni na mbi kuninga thembwe yangu.

⁷Sekoko msikati wa kona Jezabheli, a to khene kwakwe: Kasi hi ngawe mfumeli wa Israyeli konkuwa kani? Wuka u txi dya dipawu, kambe mbilu yako yi na tsake; ani ni na kuninga thembwe ya Nabhote, Mujezireyeli.

⁸Sekoko Jezabheli a to bhala mapapilo ngu ditina da Akabe, se a txi ma lema ngu txitambu txakwe, e rumela mapapilo ale ka madhota ni vahombe va nga ti ti ho didhoropani kwakwe, kambe va nga ti zumba ni Nabhote.

⁹A to bhala ka mapapilo a txi khene: Zivisani mhaka ya kutitona, mi guleta Nabhote txitimwi ka vathu.

¹⁰Mi veka masoni kwakwe vavamna vambidi, vanana va Bheliyali, va txi womba masoni kwakwe va txi kha vona: U ruketete Txizimu, ni mfumeli; se mi txi m'humisa hahanze mi txi m'balisela ngu marigwi, a txi fa.

¹¹Se vavamna va didhoropa dakwe, madhota ni vathu vahombe vale va nga ti zumba ka didhoropa dakwe, va to maha madingano ni kuruma ka Jezabheli, nga ti ti nga ti bhatwe mu ka mapapilo, ale a nga ti va rumete.

¹²Va to leletela kutitona, se va txi guleta Nabhote txitimwi ka vathu.

¹³Sekoko kutota vavamna vambidi, i ku vanana va Bheliyali, va txi ta ema masoni kwakwe; se vavamna vale, vananevo va Bheliyali, va to wukela Nabhote, masoni ka vathu va txi kha vona: Nabhote a ruketete Txizimu, ni mfumeli. Se va to tsula nayo hahanze ka didhoropa va txi ya m'balisela ngu marigwi, a txi fa.

¹⁴Sekoko va to rumela m'biko ka Jezabheli wa ku kha vona: Nabhote a balisetwe ngu marigwi, a txi fa.

¹⁵Se ngako Jezabheli a di ti pfite taku Nabhote a balisetwe ngu marigwi, niku a fite, Jezabheli a to khene ka Akabe: Nabhote a fite. Khukha u txi ya teka thembwe ya Nabhote, Mujezireyeli, ayile a nga kulambela kuxava ngu male; nguko Nabhote khe ngadi a txi hanya, a fite.

¹⁶Se mbimo yile Akabe a nga pfa taku se Nabhote a fite, Akabe a to khukha e relela thembweni ka Nabhote, Mujezireyeli, a txi ya yi teka.

¹⁷Sekoko MKOMA Txizimu a to khene ka Elija, mprofeti wa Tisibhe:

¹⁸Tsula u txi ya womba-womba ni Akabe, mfumeli wa ka Israyeli, a manekako Samariya; wona taku a thembweni ka Nabhote, a relela kuya yi teka.

¹⁹Se tsula u txi ya m'gela ku khawe: MKOMA a womba tiya: Ina mwendo khu ngo m'daya u txi teka thomba kani? U na m'gela kambe ku khawe: MKOMA a womba tiya: Ka wukhalo wule timbwa ti nga danzela mnoha wa Nabhote, timbwa ti na danzela ni wako mnoha, ina mnoha wako kha ditshuri.

²⁰Se Akabe a to khene ka Elija: Se u ni mani awe mlala wangu kani? Se Elija a to khene: Ni ku mani; nguko se u ti xavisile, ngu kumaha to biha masoni ka MKOMA.

²¹Wona taku ni na tisa dikhombo txitimwi kwako, ni na lovisa vanana vako, votshe vavamna va ka Akabe ni na va fuvisa, ni votshe vale i ku maxonga ni vale vo bulwa kona Israyeli;

²²se ni na fuvisa nyumba yako nga ti ni nga fuvisisa tona nyumba ya ka Jerobhowamu, mwana Nebhate, ni kufana ni nyumba ya Bhahasa, mwana Ahiya, ngu mhaka ya ti u nga ni vhukisa tona, se u txi onhisa Israyeli.

²³ Se kambe ngu mhaka ya Jezabheli, a to womba kambe MKOMA a txi khene: Timbwa ti na dya Jezabheli msana ka diguma da Jezireyeli.

²⁴Ni wihi wa ka Akabe a no fa amu didhoropani, a na dyiwa ngu timbwa, se awu a no fela txitingani, a na dyiwa ngu sinyana sa nzuma.

²⁵Kha kuzivi kumaneka ni wammweyo wa ku ti xavisa nga Akabe, eza e maha to biha masoni ka MKOMA, nguko msikati wa kona Jezabheli, ngene a nga mkujetela.

²⁶Kambe a mahile kunyenyeza ka hombe, a txi londisela sithombe, nga ti va nga maha Vaamori, evo MKOMA a nga va tshotsha kule, masoni ka va ka Israyeli.

²⁷Mbimo yile koko, Akabe a nga pfa mapswi awa, a to vharula syambalo sakwe, a txi fenengeta mmidi wakwe ngu disaka, a txi ti tona; se a ti otela ha masakani, a txi tsimbila-tsimbila, ni dikhodho.

²⁸Sekoko dipswi da MKOMA di tile ka Elija, wa Tisibhe, di txi ta kha dona:

²⁹Khwa ti wona taku Akabe wa ti namisa masoni kwangu kani? Ngako koko a ti namisako masoni kwangu, kha ni na mbi tisa kubiha kuwa ka masiku a kuhanya kwakwe, aniko ni na tisa wubihi wuwa ka masiku a kuhanya ka mwanana wakwe, nyumbani kwakwe.