Read chopi 1 Vafumeli 3 Bible Online

1 Vafumeli 3 - chopi bible

1 Vafumeli 3

¹Se Solomoni a to va ni wuxaka ni Faro, mfumeli wa Egipta, a to teka mwanana wa Faro wa dihorana, e mtisa m'tini ka Dhavhidha, kala ha a nga heta kuaka nyumba yakwe, ni Nyumba ya MKOMA, ni diguma do ranganyeta Jerusalema.

²Aniko vathu va txi phaxela ka makhalo o guleka dwe, nguko kala ka ale masiku, ku si se akelwa nyumba ditina da MKOMA.

³Solomoni a ti ti randa MKOMA, e tsimbila ngu sileleto sa tate wakwe Dhavhidha; hahanze keto a ti ti hisa dibaselo ka makhalo o guleka.

⁴Se mfumeli a to tsula Gibheyoni kuya phaxela kona, ngu kona i nga ti ti wukhalo wo guleka ngutu, a to ya ningela digumi da mazana a miphaxo ka txiluvelo txile.

⁵Kona Gibheyoni, MKOMA a to woneka ka Solomoni ngu miloro ni wusiku, se Txizimu txi nje kha txona: “Kombela txi u txi lavako ku ni txi kuninga.”

⁶Se Solomoni a to khene: Awe u thumisile txithumi txako Dhavhidha, tate wangu, ngu kukateka ka hombe, ngako ene a nga tsimbila ni nawe ngu ditshuri, ni nongameto, ni kululama ka mbilu, masoni kwako; se u m'vekete txikatekiso txa hombe, u mningile mwanana wu a no khalahatsha ha txikhaloni kwako ka wukoma, nga ti ti wonekako ka masiku awa.

⁷Konkuwa koko, awe MKOMA, Txizimu txangu, u fumisile txithumi txako ka wukhalo wa Dhavhidha, tate wangu, se ni ngadi mfana wam'dotho, kha ni kuzivi kuhuma ni kuwulela.

⁸Se txithumi txako txi hagari ka vathu vako, ava u nga va sawula; vathu vavangi, ava ti si kotekiko ku va bala, hambi mtengo wawe, ngu kutala kwawe.

⁹Ninga mbilu yo ziva ka txithumi txako, kasi kulamula vathu vako, ni kuziva ngu ditshuri kuhambanisa hagari ka ta tinene ni to biha; nguko i mani a ndi no lamula vathu vako vo talisa tiya kani?

¹⁰Dipswi diya di to pfala kwati ka MKOMA, da tiya Solomoni a nga kombela.

¹¹Se Txizimu txi to kha txona: A ku u nga kombela tiya, u si ti kombeleli thomba, hambi wutomi wa valala vako, aniko u ti kombelete mapimo, kasi u ziva kuwila timhaka;

¹²wona ti to ni mahile tona ti u nga kombela; wona ti to ni ku ningile mbilu ya wuzivi ngutu ni kupimisisa, u sanzi ku va ho, wo fana ni nawe kha nga vaho, niku msana kwako, wa ku nga awe kha na mbi humelela.

¹³Se ni ti u nga mbi kombela, ni ku ningile, tithomba kuva wudhundo; nga ku si maneki wo fana ni nawe hagari ka vafumeli, mndani ka masiku ako.

¹⁴Se, ngako u txi tsimbila ngu tinzila tangu, u txi vekisa milayo yangu ni sirumo sangu, nga ti a nga tsimbilisa tona Dhavhidha, tate wako, kambe ni na laphisa masiku ako.

¹⁵Se Solomoni a to wuka, e wona taku a ti ko lora. Se a to ta Jerusalema, a txi ta ti veka hafuhi ni dibhokiso da txitumelelano txa MKOMA, se a to ningela miphaxo, a to longisela miphaxo ya kudikha, se a to mahela m'buso wa hombe vathu vakwe votshe.

¹⁶Sekoko va to ta vavasikati vambidi va magelegele ka mfumeli, va txi ta ema masoni kwakwe.

¹⁷Mmweyo wa vavasikati vale a to khene: Ha! Mfumeli wangu, ani ni wu wamsikati hi zumba nyumbani kumweko, se ni mane mwanana ni ti ka yona nyumba yile.

¹⁸Se ku to maheka ti taku ku di pindile masiku mararu msana ka kuva ni di hefemute, awu wamsikati nene a to va ni mwanana: Hi ti ti kumweko; ku ti si nga ni txo hi hambanisa amu nyumbani, ngako i si nga txo huma kwathu vavambidi.

¹⁹Se, ni wusiku, a to fa mwanana wakwe, ngu kuva a nga mu otelela.

²⁰Se a to wuka ni hagari ka wusiku, e ta thavisa mwanana wangu ha didhawa kwangu, ani ni di otete, a txi ya mu otelisa hakhana kwakwe; se awule wakwe mwanana wa kufa, a txi ta mu otelisa hakhana kwangu.

²¹Se mbimo yi ni nga wuka ni mixo, kasi kumamisa mwanana wangu, ni wona to a fite; se mbimo yi ni nga mxolisisa mixo yile, kuwonekile ti to i ti si nga ene mwanana wangu.

²²Sekoko mmwani wamsikati a to khene: “Ahim-him, awu a hanyako mwanana wangu, mwanana wako ngu wule wo fa.” Se awule a to womba kambe a txi khene: “Ahim-him, ngu ditshuri, mwanana wako ngu wule wa kufa, kasi wangu mbwo hanya.” Va angulisile eto masoni ka mfumeli.

²³Sekoko mfumeli a to khene: Awu a khene: Mwanana wu wo hanya mbwangu, se wako ngu wule wa kufa; “Awu mmwani a khene: Ahim-him, ngu ditshuri; awule wo fa mbwako se awu a hanyako mwanana wangu.”

²⁴A to womba kambe mfumeli a txi khene: “Ni tiseleni ditxhari.” Va to tisa ditxhari masoni ka mfumeli.

²⁵A nje khene kha mfumeli: “Abanisani ngu madhawa mambidi mwanana wu wo hanya, mi ninga hafu ka mmweyo, ni yimwani hafu ka mmwani.”

²⁶Aniko, wamsikati wule mwanana wakwe i nga ti wule wo hanya, a to womba ka mfumeli (ngako a nga dhukiswa mbiluni kwakwe ngu mhaka ya mwanana wakwe), a txi khene: O! Awe nyamne wangu, mningeni mwananeyo wo hanya, mi nga duketeni ni ku m'daya. Se mmwani a ti ti khene: Mwendo mbwako mwendo mbwangu; a na abaniswe.

²⁷Sekoko mfumeli a to xamula, a txi khene: Ningelani mwanana wo hanya ka wuwa, mi nga m'dayeni, nguko awuwa ngene i ku mame wakwe.

²⁸Se votshe Vaisrayeli va pfite ti a nga wilisa tona mahungu mfumeli, va to mxamala mfumeli; nguko va ti woni ti to wu ti ti ho kwakwe wuzivi wa Txizimu, wa kulamula mahungu.