Read chopi 1 Vafumeli 5 Bible Online

1 Vafumeli 5 - chopi bible

1 Vafumeli 5

¹Hiramu, mfumeli wa Tiro, a to rumela sithumi sakwe ka Solomoni (nguko a nga pfa taku Solomoni a totilwe wukoma wukhaloni ka tate wakwe), nguko Hiramu a ti dhunda Dhavhidha.

²Sekoko, Solomoni a to rumela ka Hiramu kuya womba tiya:

³Kha ditshuri wa tiziva ti taku tate wangu Dhavhidha kha sikota kuakela nyumba ditina da MKOMA, Txizimu txakwe, ngu mhaka ya kurandelwa ngu tiyimbi, kuza kuhoka aha MKOMA a nga va veka hahatshi ka mikondo yakwe.

⁴Ngu konaho koko, MKOMA, Txizimu txangu, a ni ningile kuhumula ngu ka otshe madhawa; kha ku nga ni mlala, kambe kha ni mani txikarato ni txa tximwetxo.

⁵Se ani ni lava kuduketa kuakela nyumba ditina da MKOMA, Txizimu txangu, nga ti MKOMA a nga wombisa tona ka Dhavhidha, tate wangu, a txi khene: Mwanana wako, awu ni no m'veka ha wukhaloni kwako ka wukoma, eyo a na akela nyumba ditina dangu.

⁶Ruma koko, konakuwa, a ti to ngu Libhanoni va txi wila mikedhari, se sithumi sangu si na va kumweko ni sako, se ani ni na dihela sithumi sako, madingano ni ti u no wombisa tona; nguko awe wa tiziva kha kwati ti to ani ni nawe awalo a sikotako kuwila mapulango nga Vasidhoni.

⁷Ngako Hiramu a di pfite mapswi a Solomoni, a to tsaka ngutu, a txi khene: A na dhumiswe nyamsi MKOMA, a nga ninga ka Dhavhidha mwanana wo ziva txitimwi ka vathu vava vo talisa tiya.

⁸Se Hiramu a to rumela ditpswi ka Solomoni, a txi khene: Ni ti pfite ti u nga rumela ku ta ni gela. Ni na maha kotshe kuranda kwako ngu mikedhari ni mikipresi.

⁹Sithumi sangu si na ma rwala kukhukhela Libhanoni kala lineneni, se ani ni na va ruma kuheleketa ngu sitataru ngu lineneni kala ka wukhalo wu u no ni elela kuya veka kona; se awe u na ma amukela; na nawe u na maha ti ni no ti lava, u na dyisa m'ti wangu.

¹⁰Ngu toneto, Hiramu a to ninga mapulango a mikedhari ni a mikipresi ka Solomoni, madingano ni kuranda kwakwe.

¹¹Se Solomoni a to ninga ka Hiramu 20.000 wa tipimo ta hombe ya fulaho, kasi kudyisa m'ti wakwe, ni magumi mambidi a tipimo ta hombe ta mafura amanene; eso Solomoni a ti ninga Hiramu, dilembe ni dilembe.

¹²Sekoko MKOMA a to ninga Solomoni wuzivi nga ti a nga ti thembisile; ku to maneka kuthutha hagari ka Hiramu ni Solomoni, ngu wumbidi wawe va to sunga txitumelelano.

¹³Se mfumeli Solomoni a to dhana sithumi hagari ka Israyeli, ngu mtengo wa 30.000 wa vavamna.

¹⁴Se a to va rumela Libhanoni, ngu mtxima i ti 10.000 dwe; ve thuma mtxima wumwewo Libhanoni, se mitxima yimbidi ve maneka mitini kwawe; se va ti thangelwa ngu Adhoniramu.

¹⁵Solomoni a ti navo kambe 70.000 va nga ti ti rwala siya, ni 80.000 va nga ti ti wilela mimangoni.

¹⁶Vathangeli va Solomoni va i nga ti madhota akwe, va nga ti tsimbitisa kuaka kuleya, i ti ti 3.300, ngu vona va nga ti thangela vathu ka mthumo wa kuaka kuleya.

¹⁷Mfumeli se a to rumela ti to ve tisa marigwi a hombe ni a lisima, marigwi o vatelwa, ku ta khatisa ngu ona nyumba.

¹⁸Se ma to vatelwa ngu vaaki va Solomoni, ni va Hiramu, ni va Gebhalita; se va ti ti vatela mapulango ni marigwi kasi kuaka nyumba.