Read chopi 2 Vafumeli 1 Bible Online

2 Vafumeli 1 - chopi bible

2 Vafumeli 1

¹Se msana ka kufa ka Akabe, Mowabhi a to wukela Israyeli.

²Se Akaziya a to pfodola ngu ha ka tisimbi ta nyumba ya txitezi txa wumune, a ngadi nayo kona Samariya, a to lwala, eruma mitumi e va gela tiya: Tsulani mi ya wotisa Bhahali-Zebhubha, txizimu txa Ekroni, ku mwendo ni na kalamuka ka wulwati wuwa kani?

³Aniko Ngelozi ya MKOMA yi to kha yona ka Elija wa Tisibha: Khukha u kwelela u na manana ni mitumi ya mfumeli wa Samariya, u na khawe kwawe: Ina kova walo Txizimu amuwa Israyeli, mizako mi ya wotisa ka Bhahali-Zebhubha, txizimu txa Ekroni kani?

⁴Se ngu mhaka yeto, MKOMA a to khene: Khu na mbi txhika ngu ha m'bhedhuni, khu na mbi huluka kufa. Sekoko Elija a to khukha.

⁵Se avale vo rumwa va to tshumela. Se a to va wotisa ku khene: Njitxani txi kuho, mi tshumelako kani?

⁶Vona va to xamula ku kha vona: Hi to manana ni wamwamna wokari a txi khene: Tshumelani mi tsula ka mfumeli wule a nga mi ruma, mi txi ya khanu: Ina kova walo Txizimu amuwa Israyeli, mizako mi ya wotisa ka Bhahali-Zebhubha, txizimu txa Ekroni kani? Se ngu kumaha keto, khu na mbi txhika ngu ha m'bhedhuni, kha ditshuri u na fa.

⁷Se ene a to khene: Wamwamneyo a nga mi hingeta, e mi gela timhaka tiya, a di ambalisile kutxani kani?

⁸ Se vona va to kha vona: I ti wamwamna wo ambala madhowo, a di sungile libhandi la didhowo txiwununi kwakwe. Mfumeli a to xamula ku khene: I Elija, wa Tisibha.

⁹Sekoko a to rumela mthangeli wa mtxhanu wa magumi a vathu, a txi mkwelisa mmangoni, a txi khene: Awe m'thu wa Txizimu, mfumeli a khene: Txhika.

¹⁰Aniko Elija a to xamula ka mthangeli wa mtxhanu wa magumi ku khene: Ngako ani ni di m'thu wa Txizimu, wu na txhike mndilo wa nzumani wu txi kuhisa, ni vathu vako va mtxhanu wa magumi.

¹¹Kambe mfumeli a to engeta kurumela mmwani mthangeli ni vathu va kona va mtxhanu wa magumi; a txi ya m'gela tiya: Awe m'thu wa Txizimu, mfumeli a khene: Txhika ngu kukuluveta.

¹²Se Elija a to xamula ku khene: Ngako ani ni di m'thu wa Txizimu, wu nawe mndilo ngu nzumani, wu txi kutshokomisa awe ni vale va mtxhanu wa magumi. Sekoko mndilo wa Txizimu wu to wa ngu nzumani, wu txi ta tshokomisa mthangeli ni vathu vale va mtxhanu wa magumi.

¹³Se mfumeli a to engeta e rumela mmwani mthangeli wa wuraru, ni vathu va mtxhanu wa magumi; sekoko mthangeli wule a to kwela eya khizama ngu mazolo masoni ka Elija, e mkhongotela a txi khene: Awe m'thu wa Txizimu, na ku kombela ti to uva ni wumbilu ngu wutomi wangu, ni wutomi wa sithumi siya sako sa mtxhanu wa magumi.

¹⁴Hi nga wona koko a ti to wu to txhika mndilo ngu nzumani, wu txi ta tshokomisa vathangeli vale vavambidi, ni mitxawa yawe ya mtxhanu wa magumi, wumwewo ni wumwewo: Sekoko hi nga mahela wumbilu wutomi wangu.

¹⁵Sekoko Ngelozi ya MKOMA yi to kha yona ka Elija: Txhika nayo wuwa, u nga thave. Se Elija a to khukha e txhika nayo ka mfumeli.

¹⁶Se a to khene kwakwe: MKOMA a khene: Njitxani txi nga kumaha awe mfumeli u rumela mitumi kuya wotisa ka Bhahali-Zebhubha, txizimu txa Ekroni kani? Ina kova walo Txizimu amuwa Israyeli, kasi ku wotisa timhaka tako kani? Ngu kumaha keto khu na mbi txhika ngu ha m'bhedhuni hawa, kha ditshuri u na fa.

¹⁷Ngu kumaha keto, a fite madingano ni dipswi da MKOMA, di nga wombwa ngu Elija; se Joramu a to khata kufuma ka wukhalo wakwe, ka dilembe da wumbidi da Joramu, mwana Josafati, mfumeli wa ka Judha, ngako a nga si nga ni mwanana.

¹⁸Wungi wa simaho sile Akaziya a nga ti si mahile, ina si nga va si sa bhalwa ka dibhuku da Matimu a Vafumeli va ka Israyeli kani?