Read chopi 2 Vafumeli 10 Bible Online

2 Vafumeli 10 - chopi bible

2 Vafumeli 10

¹Se Akabe a ti ti ni mtxhanu wa magumi a vanana kona Samariya; Jehu a to bhala mapapilo e ma rumela Samariya, ka vathangeli va Jezireyeli, ni madhota, ni ka vaxayisi va vanana va Akabe, a txi khene:

²Kunukunuko di hokako kwanu dipapilo diya, ngako va ku ni nanu, vanana va nyamne wanu, kumweko ni sikotxikani, ni mahantxhi, ni didhoropa do tsaniswa, ni matxhari,

³wonisisani wu i ku wa txhuko ni mapimo hagari ka vanana va nyamne wanu, wo dingana kukwela wukomani ka tate wakwe, mi lwela nyumba ya nyamne wanu.

⁴Aniko va to thava ngutu, se va nje kha vona: Eko hambi vafumeli vambidi i ku Joramu ni Akaziya va nga mbi sikota kuema masoni kwakwe, hi nga mtsanisisa kutxani athu koko kani?

⁵Sekoko awule a ngadi mxayisi wa nyumba, ni mthangeli wa didhoropa, ni madhota, ni vaxayisi, va to rumela ka Jehu dipswi do kha vona: Sithumi sako ngu ngathu, ni tihi ti u no hi ruma hi na maha; kha hi nga ni mmwani wo mfumisa; maha ti u no ti wona masoni kwako.

⁶Sekoko a to va bhalela dipapilo da wumbidi, a txi khene: Ngako mi di vangu, mi txi engisa dipswi dangu, tekani misungo ya vavamna vale i ku vanana va nyamne wanu, se mangwana, ka yona yiya mbimo, ngonani kwangu kona Jezireyeli. (Se vanana va mfumeli va mtxhanu wa magumi a vavamna, va ti ti ni vahombe va sivelekwa, va nga txi va xayisa.)

⁷Ku to maheka koko taku, di ti hokile dipapilo, va to ñolela vanana va mfumeli, va mtxhanu wa magumi ni magumi mambidi, ve va dayela, ve betela misungo yawe ka tithavangu to kari, ve yi rumela Jezireyeli.

⁸Se kutota mtumi mmweyo, a txi ta khene: Va tisile misungo ya vanana va mfumeli. Se Jehu a to khene: Yi veketeleni ngu mimumbu yimbidi ha txidingeni ka didhoropa, yi zumba kala mangwana.

⁹Se ni mixo, mbimo yile a nga huma, a to khene ka votshe vathu: Anu mi vavanene; nguko ani ni lwite ni nyamne wangu, ni m'date; aniko kasi i mani a nga dayela votshe vava kani?

¹⁰Ti ziveni koko konkuwa taku, ngu ka dipswi da MKOMA, adi MKOMA a ngadi womba madingano ni nyumba ya ka Akabe, kha di na kuwa walo hahatshi, nguko MKOMA wa maha tile a nga womba ngu txithumi txakwe Elija.

¹¹Se Jehu a to dayela votshe vale va nga ti sate, va nyumba ya ka Akabe, kona Jezireyeli, kumweko ni vahombe va kona, ni votshe vale va nga txi va ziva, ni vaphaxeli vawe, kala kuza asi siyi ni wammweyo.

¹²Sekoko a to khukha e tsula Samariya. Se a di ngadi hanzila kona Bheti-Ekedhi ka vadyisi,

¹³Jehu a to mana vanawe va Akaziya, mfumeli wa ka Judha, a nje khene: Nganu va mani anu kani? Se vona va to kha vona: Ngathu vanana va Akaziya; ho kwitima ku ta losa vanana va mfumeli, ni vanana va msikati wa mfumeli.

¹⁴Sekoko Jehu a to khene: Va ñoleni va txi hanya! Se vona va to va ñola va txi hanya, ve va dayela hafuhi ni txisima txa Bheti-Ekedhi, i ti mune wa magumi a vavamna ni vambidi; kha ka nga sala ni wammweyo.

¹⁵Se Jehu a ti khukhile ngu hale, a to mana Jonadhabhe, mwana Rekabhi, a txi tela ku ta wonana nayo, a to mlosa, a txi khene: Ina mbilu yako njinene, ku nga mbilu yangu, i ku yinene ka mbilu yako kani? Se Jonadhabhe a to khene: Njinene. Sekoko Jehu a to khene ngako i di yinene, ni ninge dianza dako! A to mninga dianza dakwe, se e kwela nayo amu ka txikotxikani.

¹⁶Se Jehu a to khene: Tsimbila ni nani, u na wona ku ti ningela kwangu ka MKOMA. Se Jehu a to mteka mu ka txikotxikani txakwe.

¹⁷Mbimo yile a nga hoka Samariya, a to dayela votshe va ka Akabe vale va nga ti sate Samariya, eza a txi va khundumusela, madingano ni dipswi dile MKOMA a nga ti gete Elija.

¹⁸Se Jehu a to tshanganisa votshe vathu, a txi va gela tiya: Mfumeli Akabe a thumete kudotho Bhahali, aniko Jehu koko a na mthumela ngutu.

¹⁹Sekoko ni dhaneleni votshe vaprofeti va Bhahali, sotshe sithumi sakwe ni votshe vaphaxeli vakwe; ku nga pwateke ni wammweyo, nguko ni ni mningelo wa hombe ni lavako ku wu maha ka Bhahali; ni wihi wu a no pwateka, kha na mbi hanya. Eko Jehu a txi maha eto ngu wutxhari, kasi e khundumusa sithumi sa Bhahali.

²⁰Jehu a to womba kambe ku khene: Mahelani Bhahali msengeletano wa lisima. Se va to mahisa toneto.

²¹Jehu a to rumela dipswi kotshe Israyeli, si to ta sotshe sithumi sa Bhahali, kha ku nga ni wamwamna ni wammweyo a nga tandeka kuta; se va to wulela nyumbani ka Bhahali, yi tala nyumba ya Bhahali, ka otshe madhawa.

²²Sekoko Jehu a to khene ka mphaxeli wule a ngadi ni mthumo wo ningela syambalo sa mphaxo: Teka syambalo so dingana sotshe sithumi sa Bhahali; ene a to humisa hahanze syambalo.

²³Se Jehu a to wulela ni Jonadhabhe, mwana Rekabhi, nyumbani ka Bhahali, a nje khene ka sithumi sa Bhahali: Xolani mi wonisisa kha kwati ti to ku si maneki ni wammweyo hagari kwanu wo thumela MKOMA, hahanze ka sithumi sa Bhahali.

²⁴Mbimo yile va nga txi wulela ve maha miphaxo ni miningelo ya kuhiswa, Jehu a to longisela hahanze mtxhanu wa magumi ni magumi mararu a vavamna, a txi va gela tiya: Ku txo huluka wokari ka vavamna va ni no va ningela manzani kwanu, wutomi wanu wu na lova wukhaloni ka wutomi wakweyo.

²⁵Se mbimo yile Jehu a nga heta kumaha mningelo wakwe, a to gela vawoneleli vakwe ni vathangeli va yimbi ku khene: Wulelani mi va dayela votshe, ku nga sale ni wammweyo! Va to va dayela ngu matxhari, se vawoneleli ni vathangeli va yimbi va to va tshotshela hahanze, se ve wulela ka dithepele didhoropani ka Bhahali.

²⁶Se va to thavisa sithombe nyumbani ka Bhahali, ve si hisa.

²⁷Kambe va fayetete txithombe txa Bhahali, ve khundumusela nyumba ya Bhahali, ve aka ngu yona sisambelo kala ka ditshiku da nyamsi.

²⁸Ngu kumaha keto, Jehu a to khundumusela Bhahali ditikoni ka Israyeli.

²⁹Kambe Jehu kha huluka kuonha nga tile a nga maha Jerobhowamu, mwana Nabhote, a nga za e onhisa Israyeli, ngu marole a silivhela, ma nga txi maneka Bheteli ni Dhani.

³⁰Se MKOMA a to khene ka Jehu: Ngako u nga maha ti i ku to lulama masoni kwangu, madingano ni ti ni ngadi nato mbiluni kwangu, u mahile ka nyumba ya ka Akabe, vanana vako va na fumela Israyeli kala ka liveleko la wumune.

³¹Aniko Jehu kha sikota kulondisa ngu mbilu yakwe yotshe Mlayo wa MKOMA, Txizimu txa ka Israyeli, kambe kha nga hambuka amu ka sionho sile Jerobhowamu a nga onhisa ngu sona Israyeli.

³²Ka ona ale masiku MKOMA a to khata kuhungula mihingano ya Israyeli, nguko Hazayeli a va pekile ka yotshe mihingano ya Israyeli,

³³kukhukhela Jordhani kala m'huma-ditambo, ni dotshe ditiko da Gileyadhi, ni va ka Gadhi, ni va ka Rubheni, ni va ka Manasi, kukhukhela Aroweri, hafuhi ni txinambwana txa Arnomi, i ku Gileyadhi ni Bhasani.

³⁴Se ngu kutala ka mithumo ya Jehu, ni totshe ti a nga maha, ni mtamo wakwe, ina ti nga va ti sa bhalwa amu ka dibhuku da Matimu a Vafumeli va ka Israyeli kani?

³⁵Se Jehu a to otela ka vatate vakwe, e tshotshwa kona Samariya; se mwanana wakwe Jehowakazi, a to fuma wukhaloni kwakwe.

³⁶Jehu a to fuma txitimwi ka Israyeli a di Samariya, magumi mambidi a malembe ni mtxhanu wa malembe ni mararu.