Read chopi 2 Vafumeli 11 Bible Online

2 Vafumeli 11 - chopi bible

2 Vafumeli 11

¹Mbimo yile koko Ataliya, mwamwa Akaziya, a nga wona to mwanana wakwe a datwe, a to wuka e lovisa lihunzu la mfumeli.

²Aniko Jehosebha, mwana mfumeli Jehoramu, ndiya ya Akaziya, a to teka Jowasi, mwana Akaziya, e mpfhukisa hagari ka vanana va mfumeli, va nga txi va dayela, se a to m'veka nyumbani kumweko ni mxayisi wakwe, a txi msisela Ataliya, ngu kumaha keto, kha va m'daya.

³Se Jehosebha a to msisa Nyumbani ka MKOMA, mtxhanu wa malembe ni dimwedo; na Ataliya a txi fuma ditikoni.

⁴Se ka dilembe da wutxhanu ni mambidi, Joyadha a to rumela kudhana vathangeli va mazana, ni vathangeli va yimbi, ni vawoneleli, a txi wulela navo Nyumbani ka MKOMA, e va komba mwanana wa mfumeli.

⁵Se a to va ninga txileleto a txi khene: Awuwa ngu wona mthumo mi dinganako ku wu maha mitxawa yiraru: Mtxawa wumwewo wu na wulela ngu Sabbata, wu wonelela nyumba ya mfumeli;

⁶wumwani wu na zumba ngu ha ditimbani ka Suri; se wa wuraru wu na va ka ditimba da msana ka dile da vawoneleli; mi na woneleliseto m'ti wuwa, mi txi va rethela kule votshe.

⁷Se mitxawa yimbidi kwanu, yile yi no huma ngu Sabbata, yi na wonelela Nyumba ya MKOMA, hafuhi ni mfumeli.

⁸Mi na ranganyeta mfumeli, mmweyo ni mmweyo ni matxhari akwe manzani, se wule a no wulela hagari ka titxhatxha, a fanete kudawa; se anu mi na va ni mfumeli, ngako a txi huma, ni kuwulela.

⁹Vathangeli va mazana koko, va to maha nga tona tile a ngadi leletisile tona mphaxeli Joyadha, mmweyo ni mmweyo ni vathu vakwe, avale va nga txi wulela ni vale va nga txi huma ngu Sabbata, va to ta ka mphaxeli Joyadha.

¹⁰Se mphaxeli Joyadha, a to ningela matxhari ni sitxhavangu ka vathangeli va mazana, asile i ngadi sa mfumeli Dhavhidha, si ngadi Nyumbani ka MKOMA.

¹¹Se vawoneleli va to emeka mmweyo ni mmweyo ni matxhari akwe manzani, kukhukhela ka didhawa da txinene ka nyumba kala ka didhawa da txibhabha, ve vhikela txiluvelo, ni nyumba ya mfumeli.

¹²Se Joyadha a to humisa Jowasi, mwanana wa mfumeli, e msanzeka m'bhoti, ni dibhuku da milayo, va to mfumisa, ve mtota, va txi bhabhwatela manza, na va txi kha vona: A na hanye mfumeli!

¹³Se Ataliya a ti pfite diguwa da vawoneleli ni da vathu, a to wulela hagari ka vathu, Nyumbani ka MKOMA.

¹⁴A to wona mfumeli wamphya hafuhi ni phande, nga tolovelo ya kona, ni vathangeli va yimbi, ni mipundu, hafuhi ni mfumeli, se votshe vathu va ditikoni va ti ti tsakile, ve veta mipundu; sekoko Ataliya a to vharula syambalo sakwe, a to kwangula a txi khene: Kuningelwa! Kuningelwa!

¹⁵Ngu konaho, mphaxeli Joyadha a to gela vathangeli va mazana va nga txi thangela tiyimbi ku khene: M'humiseni hahanze ka titxhatxha ta vawoneleli, se ni wuhi a no lava ku mlwela, m'dayeni ngu ditxhari. Nguko mphaxeli a ti khene: Mi nga m'dayeleni Nyumbani ka MKOMA.

¹⁶Se va to mñola, ve tsula nayo m'tini ka mfumeli, ngu nzila ya txike txa mahantxhi, veya m'dayela kona.

¹⁷Se Joyadha a to maha txitumelelano hagari ka MKOMA, ni mfumeli ni vathu, ati taku va nave vathu va MKOMA. Ni txitumelelano hagari ka mfumeli ni vathu.

¹⁸Sekoko votshe vathu va to wulela nyumbani ka Bhahali, ve yi khundumusela, va to fayetela siluvelo sakwe ni sithombe sakwe, ve daya Matani mphaxeli wa Bhahali, hafuhi ni siluvelo. Sekoko mphaxeli Joyadha, a vekile vawoneleli Nyumbani ka MKOMA.

¹⁹Se a to teka vathangeli va mazana ni vathangeli va yimbi, ni va vawoneleli, ni votshe vathu va ditiko; va to khukha ngu Nyumbani ka MKOMA, na va txi tsimbila ngu nzila ya txike txa vawoneleli, veya nyumbani ka mfumeli, se ene a to khalahatsha txituluni ka vafumeli.

²⁰Se votshe vathu va ditiko va to tsaka, didhoropa di to humula, msana ka kuva va ti date Ataliya ngu ditxhari, hafuhi ni nyumba ya mfumeli.

²¹Jowasi i ti ti wa tanga ya mtxhanu wa malembe ni mambidi, mbimo yile va nga mmaha mfumeli.