Read chopi 2 Vafumeli 13 Bible Online

2 Vafumeli 13 - chopi bible

2 Vafumeli 13

¹Ka dilembe da magumi mambidi ni malembe mararu a kufuma ka Jowasi, mwana Akaziya mfumeli wa ka Judha, Jehowakazi, mwana Jehu, a to khata kufuma Israyeli, kona Samariya, se a to fumela digumi da malembe ni mtxhanu ni mambidi.

²A to maha a ti i singako ta tinene masoni ka MKOMA, nguko a londisile sionho sa Jerobhowamu, mwana Nabhote, a nga onhisa Israyeli, kha hambana ale.

³Ngu kumaha keto, kuhenya ka MKOMA ku to tura ka Israyeli, e va ningela manzani ka Hazayeli, mfumeli wa Siriya, ni manzani ka Bheni-Hadhadhe mwana Hazayeli, ka otshe masiku wawe.

⁴Sekoko Jehowakazi a to dila masoni ka MKOMA, se MKOMA a to mu engisa; nguko a woni kukhinyavezwa ka Israyeli, nguko a txi va khinyaveza mfumeli wa Siriya.

⁵Se MKOMA a to ninga muhanyisi ka Israyeli, se vanana va ka Israyeli va to huma ngu manzani ka Vasiriya, veya zumba matendani kwawe, nga kukhatani.

⁶(Hambi keto, kha va hambuka ka sionho sa nyumba ya ka Jerobhowamu, yi yi nga onhisa Israyeli; nguko va to tsimbila ka sona; ni sona sithombe si to simama si di emile Samariya.)

⁷Kha nga siya vathu votala ka Jehowakazi, hahanze ka mtxhanu wa magumi a vagadhi va mahantxhi, ni digumi da sikotxikani, ni 10.000 wa vavamna va kutsimbila ngu mikondo, ngako mfumeli wa Siriya a ngadi va khundumusile, e va tshinda va txi nga mpupu.

⁸Kasi ngu kutala ka mithumo ya Jehowakazi, ni ka totshe ti a nga maha, ni mtamo wakwe, ti ngava ti sa bhalwa ka Dibhuku da Matimu a Vafumeli va Israyeli kani?

⁹Se Jehowakazi a to otela ka vatate vakwe, e tshotshwa Samariya; se mwanana wa kona Jehowakazi a to fuma ka wukhalo wakwe.

¹⁰Ka dilembe da magumi mararu ni mtxhanu wa malembe ni mambidi a Jowasi, mfumeli wa ka Judha, Jehowasi, mwana Jehowakazi, a to khata kufuma txitimwi ka Israyeli, kona Samariya, se a to fuma digumi da malembe ni mtxhanu ni dimwedo.

¹¹Se a to maha kubiha masoni ka MKOMA; kha nga hambuka ka txionho ni txa tximwetxo txa Jerobhowamu, mwana Nebhate, a nga onhisa Israyeli, a to tsimbila ka sona.

¹²Kasi ngu kutala ka mithumo ya Jehowasi, ni ka totshe ti a nga maha, ni mtamo wakwe, a nga lwa ngu wona ni Amaziya mfumeli wa ka Judha, ti ngava ti sa bhalwa ka Dibhuku da Matimu a Vafumeli va Israyeli kani?

¹³Se Jehowasi a to otela ka vatate vakwe, se Jerobhowamu a to zumba ka txikhalo txa wukoma; se Jehowasi a to tshotshwa Samariya, kumweko ni vafumeli va ka Israyeli.

¹⁴ Se Elixa a lwate ngu wu lwati wule a nga za a txi fa ngu wona; se Jehowasi mfumeli wa Israyeli a to tsula eya mxola, a to dila khoheni kwakwe, a txi khene: Tata wangu, tata wangu, sikotxikani sa Israyeli ni vagadhi va mahantxhi a kona.

¹⁵Se Elixa a to m'gela tiya: Teka wulaho ni lingove. Se ene a to teka wulaho ni lingove.

¹⁶Se Elixa a to khene ka mfumeli wa ka Israyeli: Veka dianza dako aha ka wulaho; se a to veka dianza dakwe aha ka wulaho. Elixa a to sanzeka manza akwe txitimwi ka manza a mfumeli.

¹⁷A to khene kwakwe: Tula difasitela di di nga rendekela wutxani. A to di tula, sekoko Elixa a to khene: Jangeta lingove. Mfumeli a to jangeta, se Elixa a nje khene: Lingove la ku thunkunyula kwako, ngu thunkunyula ka MKOMA masoni ka Vasiriya; nguko u na xula Vasiriya ditikoni ka Afeki, uza u va fuvisa.

¹⁸Elixa a to khene kambe ka Jehowasi: Teka tingove. Mfumeli a to teka tingove. Sekoko Elixa a to khene ka mfumeli wa ka Israyeli: Zima ha mafuni, a to zima kuraru ha mafuni a txi ema.

¹⁹Se m'thu wa Txizimu a to henya ngutu, a nje khene: U ti ti dingani kuzima ka mtxhanu hambi mtxhanu ni kumweko; ati tiku u ndi na lwisa Vasiriya uza u va heta; sekoko konkuwa u na lwisa Vasiriya kuraru wa kona.

²⁰Ngu msana a to fa Elixa, va txi mtshotsha. Sekoko masotxhwa a va ka Mowabhi ma to wulela ditikoni, kukhatani ka dilembe.

²¹Ku to maheka ti to va txi tshotsha wamwamna wokari, va to wona sigevenga, se ve rinza wamwamna wule diphalani ka Elixa, se a to ya wa e peka marambu ya Elixa, a to wuka e ema ngu minenge yakwe.

²²Se Hazayeli mfumeli wa Siriya a to khinyaveza Israyeli ka otshe masiku a Jehowakazi.

²³Sekoko MKOMA a to va pfela wumbilu, e va xanisekela, a to va rendekela ngu mhaka ya kuranda txitumelelano txakwe ni Abrahama, ni Isaake ni Jakobe; kha lava ku va khundumusa, kambe kha va tsotsha kule ni nene.

²⁴Se Hazayeli, mfumeli wa Siriya a to fa; se mwanana wa kona Bheni-Hadhadhe a to fuma ka wukhalo wakwe.

²⁵Se Jehowasi, mwana Jehowakazi, a to tshumela e honyola kambe madhoropa manzani ka Bheni-Hadhadhe, a ngadi ma tekile ngu kulwa manzani ka tate wakwe Jehowakazi, Jehowasi a to lwa kuraru, e teka kambe madhoropa a ka Israyeli.