Read chopi 2 Vafumeli 14 Bible Online

2 Vafumeli 14 - chopi bible

2 Vafumeli 14

¹Ka dilembe da wumbidi da kufuma ka Jehowasi mwana Jehowakazi, mfumeli wa ka Israyeli, Amaziya mwana Jehowasi, a to khata kufumela ditiko da ka Judha.

²A khatile kufuma a di ni magumi mambidi a malembe ni mtxhanu, se a to fuma magumi mambidi a malembe ni mtxhanu ni mune kona Jerusalema. Ditina da mwamwakwe i ti ti Jehowadha wa Jerusalema.

³Amaziya a mahile to lulama masoni ka MKOMA, hambiko a nga mbi fana ni tate wakwe Dhavhidha; a to maha nga tile a nga mahisa tona tate wakwe Jowasi.

⁴Aniko siluvelo kha sa khundumuswa, nguko vathu va txi ngadi ve phaxela kona, ni kuhisa dibaselo.

⁵Mbimo yile wu nga tsaniswa wukoma manzani kwakwe, a to dayela sithumi sakwe sile si nga daya mfumeli, tate wakwe mbimo yile i nga ti mfumeli.

⁶Hambi keto kha dayela vanana va sidayi sile, nga kule ti nga bhalwa ka dibhuku da Mlayo wa Mosi, eho MKOMA a nga ninga txileleto txo khene: Kha mi na mbi daya vaveleki ngu mhaka ya vanana, kambe kha mi na mbi daya vanana ngu mhaka ya vaveleki; aniko mmweyo ni mmweyo a na dawa ngu txionho txakwe.

⁷Amaziya a to daya 10.000 wa va ka Edhomi mkovani ka Mnyu, se e honyola didhoropa da Sela yimbini; a to di raya ditina daku i Jokiteli, kala ka ditshiku da nyamsi.

⁸Sekoko Amaziya a to rumela mitumi ka Jehowasi, mwana Jehowakazi, mwana Jehu, mfumeli wa ka Israyeli, a txi khene: Ngono hi ta wonana khohe ni khohe.

⁹Sekoko Jehowasi mfumeli wa ka Israyeli, e rumela dipswi ka Amaziya mfumeli wa ka Judha a txi khene: Mpa wule wu ku Libhanoni wu to rumela dipswi ka mkedhari wu ku Libhanoni daku kha wona: Ningela mwanana wako eva msikati wa mwanana wangu; aniko sihari sa txitinga si nga ti ti Libhanoni, si to pinda si kandetela mkedhari.

¹⁰Kha ditshuri, u pekile va ka Edhomi, se mbilu yako yi ti kukumukisile; ti gulete ngu ndumeyo, u zumba m'tini kwako; se u na ti wuletelela txani kubihani, u txi na gwitisa kuwa awe, kumweko ni ditiko da ka Judha kani?

¹¹Aniko Amaziya kha pfisisa; se Jehowasi mfumeli wa ka Israyeli, ni Amaziya, mfumeli wa ka Judha, va to manana ve wonana khohe ni khohe kona Bheti-Semesi, ku manekako ditikoni ka Judha.

¹²Se Judha a to pekwa masoni ka Israyeli, se mmweyo ni mmweyo a to tutuma e tsula ditendani kwakwe.

¹³Se Jehowasi mfumeli wa ka Israyeli, a to teka Amaziya, mfumeli wa ka Judha, mwana Jowasi, mwana Akaziya, kona Bheti-Semesi, eta Jerusalema, a to dhoda diguma da Jerusalema, kukhukhela ka ditimba da ka Efrayime, kala ka ditimba da ha dikhonani, 400 wa mikono.

¹⁴A to teka yotshe silivhela ni nzalama, ni sotshe siya si nga txi maneka Nyumbani ka MKOMA, ni tithomba ta nyumbani ka mfumeli, kumweko ni tikhumbi, e tshumela eya Samariya.

¹⁵Kasi ngu kutala ka mithumo yile a nga yi maha Jehowasi, ni tile a nga thuma, ni mtamo wakwe, ni tile a nga lwisa tona ni Amaziya mfumeli wa ka Judha, ina ti ngava ti sa bhalwa ka dibhuku da Matimu a Vafumeli va ka Israyeli kani?

¹⁶Se Jehowasi a to otela ka vatate vakwe, e tshotshwa Samariya, ni vafumeli va ka Israyeli; se mwanana wa kona Jerobhowamu, a to fuma ka wukhalo wakwe.

¹⁷Se Amaziya, mwana Jowasi, mfumeli wa ka Judha, a to hanya digumi da malembe ni mtxhanu, msana ka kufa ka Jehowasi, mwana Jehowakazi, mfumeli wa ka Israyeli.

¹⁸Kasi ngu wungi wa mithumo ya Amaziya, ina yi nga va yi sa bhalwa ka dibhuku da Matimu ya vafumeli va ka Judha kani?

¹⁹Se va to maha txikungo txo mu wukela Jerusalema, se e tutuma e tsula Lakisi; se ku to rumelwa vavamna vo mlondisa kona Lakisi; se va m'dayete kona.

²⁰Va to msanzeka txitimwi ka mahantxhi, ve ta mtshotsha Jerusalema, kumweko ni vatate vakwe, didhoropani ka Dhavhidha.

²¹Se votshe vathu va ka Judha va to teka Azariya, a nga ti ti ni digumi da malembe ni mtxhanu ni dimwedo, va to mfumisa wukhaloni ka tate wakwe Amaziya.

²²Azariya a to aka didhoropa da Elate e di tshumetela Judha, msana ka kuva mfumeli a di otete ka vatate vakwe.

²³Ka dilembe da digumi ni mtxhanu da kufuma ka Amaziya, mwana Jehowasi, mfumeli wa ka Judha, Jerobhowamu mwana Jehowasi mfumeli wa ka Israyeli, a to khata kufumela Samariya, a to fuma mune wa magumi a malembe ni dilembe dimwedo.

²⁴Se a to maha to biha masoni ka MKOMA; kha nga dhuka e hambuka ka txionho ni txa tximwetxo txa Jerobhowamu, mwana Nebhate, a nga onhisa Israyeli.

²⁵ Kambe ene a wusile mihingano ya Israyeli, kukhukhela txidingeni ka didhoropa da Hamati, kala ka Linene la Libalani, madingano ni dipswi da MKOMA, Txizimu txa ka Israyeli, nga kule a nga womba ngu mthumo wa mprofeti Jona, mwana mprofeti Amitayi, awule i nga ti ti wa Gati-Heferi.

²⁶Nguko MKOMA a woni to kuxaniseka ka Israyeli i ti ti ko nemela ngutu, kambe ku si nga ho kuhambana ka wo sungwa ni wo txhatxheka, hambi wo vhunetela Israyeli.

²⁷Kambe MKOMA si se womba txilo ngu kupfhita ditina da Israyeli hahatshi ka nzuma; hambi keto, a va txhatxhile ngu dianza da Jerobhowamu, mwana Jehowasi.

²⁸Kasi ngu wungi wa mithumo ya Jerobhowamu, ka totshe tile a nga maha, ni mtamo wakwe, a tile a nga lwisa tona e wuyisa madhoropa a Dhamasku ni Hamati, ma lumbako Judha, na i di mfumeli wa Israyeli, ina ti nga va ti sa bhalwa amu ka dibhuku da Matimu a Vafumeli va ka Israyeli kani?

²⁹Se Jerobhowamu a to otela ka vatate vakwe, kumweko ni vafumeli va ka Israyeli; se mwanana wa kona Zakariya a to fuma ka wukhalo wakwe.