Read chopi 2 Vafumeli 15 Bible Online

2 Vafumeli 15 - chopi bible

2 Vafumeli 15

¹[1] Ka dilembe da magumi mambidi a malembe ni mtxhanu ni mambidi, a kufuma ka Jerobhowamu kona Israyeli, Azariya, mwana Amaziya, mfumeli wa ka Judha, a to khata kufuma.

²A khatile kufuma a ti ni digumi da malembe ni mtxhanu ni dimwedo, a to fumela Jerusalema mtxhanu wa magumi a malembe ni malembe mambidi; ditina da mwamwakwe i ti ti Jekoliya, wa Jerusalema.

³Se a to maha tile i ngadi ta tinene masoni ka MKOMA, kufana ni totshe tile a nga mahisa tona tate wakwe Amaziya.

⁴Nziluvelo dwe si nga mbi khundumuswa, nguko vathu va txi ngadi ve phaxela kona ni kuhisa dibaselo.

⁵Se MKOMA a to peka mfumeli, eva ni tshekela kala ka ditshiku da kufa kwakwe, na a txi zumba ka nyumba ya didhawa; ngu kumaha keto, Jothamu mwanana wa mfumeli, ngene a nga ti nyumbani ka wukoma, a txi lamula vathu va ditiko.

⁶Kasi ngu kutala ka mithumo ya Azariya, ni totshe ti a nga maha, ina ti nga va ti sa bhalwa ka dibhuku da Matimu a vafumeli va ka Judha kani?

⁷ Se Azariya a to otela ka vatate vakwe, ve mtshosha hafuhi ni vatate vakwe, Didhoropani ka Dhavhidha; se mwanana wa kona Jothamu, a to fuma ka wukhalo wakwe.

⁸Ka dilembe da magumi mararu ni mtxhanu ni mararu, a kufuma ka Azariya, mfumeli wa ka Judha, ku to fuma Zakariya, mwana Jerobhowamu, a to fumela Israyeli, a di Samariya, mtxhanu wa mitxima ni wumwewo.

⁹Se a to maha to biha masoni ka MKOMA, nga tile va ngadi mahile vatate vakwe; kha nga hambuka ka sionho sa Jerobhowamu, mwana Nebhate, a nga onhisa Israyeli.

¹⁰Se Salumi, mwana Jabhe, a to m'henyela e mlwisa masoni ka vathu, e m'daya, se e fuma ka wukhalo wakwe.

¹¹Kasi ngu wungi wa mithumo ya Zakariya, ngu yona yi nga bhalwa amu ka dibhuku da Matimu a Vafumeli va ka Israyeli.

¹²Adiya ngu dona dipswi dile MKOMA a ngadi womba ka Jehu, a txi khene: Vanana vako kala ka liveleko la wumune, va na zumba ha txikhaloni txa wukoma txa Israyeli. Se ti to mahekisa toneto.

¹³Salumi mwana Jabhe, a khatile kufuma ngu dilembe da magumi mararu ni mtxhanu wa malembe ni mune a kufuma ka Uziya, mfumeli wa ka Judha; se a to fuma mtxima wumwewo.

¹⁴Nguko Menayemi, mwana Gadhi, a to kwelela ngu Tiriza eta Samariya, e ta lwisa Salumi, mwana Jabhe, kona Samariya, se a to m'daya, e fuma ka wukhalo wakwe.

¹⁵Kasi ngu kutala ka mithumo ya Salumi ni kuhenya kwakwe, ti bhatwe ka dibhuku da Matimu ya vafumeli va ka Israyeli.

¹⁶Sekoko Menayemi a to khundumusa didhoropa da Tifisa, ni votshe vale va nga ti tiho ka dona, a mahisileto nguko didhoropa di sa tumela kukhoza masoni kwakwe; a to va lwisa, se e bhandelela ngu hagari votshe vavasikati vale va nga ti ni sirumbu.

¹⁷Kukhukhela ka dilembe da magumi mararu a malembe ni mtxhanu ni mararu, a kufuma ka Azariya mfumeli wa ka Judha, Menayemi, mwana Gadhi, a to khata kufuma txitimwi ka Israyeli, e fumela Samariya digumi da malembe.

¹⁸Se a to maha wubihi masoni ka MKOMA; ka otshe masiku akwe kha nga hambuka ka sionho sa Jerobhowamu mwana Nebhate, a nga onhisa Israyeli.

¹⁹Sekoko ku to humelela Puli, mfumeli wa Asiriya e lwisa ditiko; se Menayemi a to ningela ka Puli 1.000 wa titalenta ta silivhela, kasi ku dianza dakwe di txi mtsanisa, ni kutsanisa mfumo manzani kwakwe.

²⁰Se Menayemi a to humisa maleyo ka Israyeli, yi txi huma ngu ka vanyatithomba, i ku mtxhanu wa magumi a tipimo to wuyeletwa, ka m'thu ni m'thu, e ningela ka mfumeli wa Asiriya, se kha zumba kambe kedo ditiko.

²¹Kasi ngu kutala ka mithumo ya Menayemi ni totshe ti a nga maha, ina ti nga va ti sa bhalwa ka dibhuku da Matimu ya vafumeli va ka Israyeli kani?

²²Se Menayemi a to otela ka vatate vakwe, se mwanana wa kona Pekaya a to fuma ka wukhalo wakwe.

²³Ka dilembe da mtxhanu wa magumi a kufuma ka Azariya, mfumeli wa ka Judha, Pekaya, mwana Menayemi, a to khata kufuma txitimwi ka Israyeli na a di Samariya, malembe mambidi.

²⁴Se a to maha wubihi masoni ka MKOMA; kha nga dhuka e hambuka ka sionho sa Jerobhowamu, mwana Nebhate, a nga onhisa Israyeli.

²⁵Se Peka, mwana Ramaliya, mthangeli wa yimbi, a to mlwisa e m'daya, kona Samariya, hamthandani ka nyumba ya mfumeli, kumweko ni Argobhe ni Ariye; va ti ti nayo mtxhanu wa vavamna, i ku vamwevo va vanana va ka Gileyadhi; na a ti m'date a to fuma ka wukhalo wakwe.

²⁶Kasi ngu kutala ka mithumo ya Pekaya ni totshe tile a nga maha, ti bhatwe amu ka dibhuku da Matimu a Vafumeli va ka Israyeli.

²⁷Ka dilembe da mtxhanu wa magumi ni malembe mambidi a kufuma ka Azariya, mfumeli wa ka Judha, Peka, mwana Remaliya, a to khata kufuma txitimwi ka Israyeli, na a di Samariya, magumi mambidi a malembe.

²⁸Se a to maha wubihi masoni ka MKOMA; kha nga dhuka e hambuka ka sionho sa Jerobhowamu, mwana Nebhate, a nga onhisa Israyeli.

²⁹Ka masiku a Peka, mfumeli wa ka Israyeli, a tile Tigilati-Pileseri, mfumeli wa Asiriya, e ta honyola madhoropa ya Ijomi, ni Abheli-Bheti-Mahaka, ni Janowa, ni Kedhesi, ni Hazori, ni Gileyadhi, ni Galileya, ni dotshe ditiko da Naftali, a va yisa Asiriya.

³⁰Se Hoseya, mwana Ela, a to wukela Peka, mwana Remaliya, e mlwisa, a txi m'daya, se e fuma ka wukhalo wakwe, ka dilembe da magumi mambidi da kufuma ka Jothamu, mwana Uziya.

³¹Kasi ngu kutala ka mithumo ya Peka, ni totshe ti a nga maha, ti bhatwe mu ka dibhuku da Matimu a Vafumeli va ka Israyeli.

³²Ka dilembe da wumbidi da kufuma ka Peka mwana Remaliya, mfumeli wa ka Israyeli, a to khata kufuma Jothamu, mwana Uziya, mfumeli wa ka Judha.

³³I di wa tanga ya magumi mambidi a malembe ni mtxhanu, mbimo yile a nga khata kufuma; se a to fumela Jerusalema digumi da malembe ni mtxhanu ni dimwedo; ditina da mwamwakwe i ti ti Jerusa, mwana Zadhoki.

³⁴Se a to maha ti i ngadi ta tinene masoni ka MKOMA, a to maha totshe ku nga tile a nga mahisa tona tate wakwe Uziya.

³⁵Nziluvelo dwe si nga mbi khundumuswa, nguko vathu va txi ngadi ve phaxela kona ni kuhisa dibaselo. Jothamu ngene a nga aka Ditimba do Guleka da Nyumba ya MKOMA.

³⁶Kasi ngu kutala ka mithumo ya Jothamu, ni totshe ti a nga maha, ina ti nga va ti sa bhalwa amu ka dibhuku da Matimu a vafumeli va ka Judha kani?

³⁷Ngu ka ona ale masiku MKOMA a to khata kurumela Rezimi mfumeli wa Siriya, ni Peka mwana Ramaliya, kuya wukela Judha.

³⁸Se Jothamu a to otela ka vatate vakwe, e tshotshwa hafuhi ni vatate vakwe, didhoropani ka tate wakwe Dhavhidha; se mwanana wa kona Akazi, a to fuma ka wukhalo wakwe.