Read chopi 2 Vafumeli 16 Bible Online

2 Vafumeli 16 - chopi bible

2 Vafumeli 16

¹Ka dilembe da digumi ni mtxhanu ni mambidi, da kufuma ka Peka, mwana Remaliya, Akazi mwana Jothamu, a to khata kufumela ditiko da ka Judha.

²Akazi a ti ti ni tanga ya magumi mambidi a malembe, a to fumela Jerusalema digumi da malembe ni mtxhanu ni dimwedo, aniko kha maha to lulama masoni ka MKOMA, Txizimu txakwe, nga tate wakwe Dhavhidha.

³Nguko a tsimbite ngu nzila ya vafumeli va ka Israyeli, hambi mwanana wakwe a mmahile mningelo wo hiswa, ngu wubihi wa vawuyi vale MKOMA a nga ti ti va tshotshile kule ni vanana va ka Israyeli.

⁴Kambe a mahile miphaxo ni kuhisa dibaselo siluveloni ni simangwanani, ni hahatshi ka mitsudi ya yotshe mindonga.

⁵Sekoko Rezini, mfumeli wa Siriya, kumweko ni Peka, mwana Remaliya, mfumeli wa ka Israyeli, va to khukha ve tsula kulwani, kona Jerusalema; va to randela Akazi, aniko kha va mkota ku mxula.

⁶Ka yona mbimweyo ya yimweyo, Rezini, mfumeli wa Siriya, a to di wuyisa Siriya didhoropa da Elate, se e humisa Vajudha hahanze ka Elate; se Vasiriya va to ta zumba Elate, kala ka ditshiku da nyamsi.

⁷Se Akazi a to ruma mitumi ka Tigilati-Pileseri, a txi khene: Ani ni txithumi txako, kambe ni mwanana wako, ngono u ta hi hulukisa manzani ka mfumeli wa Siriya, ni manzani ka mfumeli wa ka Israyeli, va ni wukelako.

⁸Se Akazi a to teka silivhela ni nzalama, si nga txi maneka Nyumbani ka MKOMA, ni sisangalani ka nyumba ya mfumeli, e rumela kota txiningo ka mfumeli wa Asiriya.

⁹Se mfumeli wa Asiriya a to mu engisa; sekoko mfumeli wa Asiriya a to lwisa didhoropa da Dhamasku e di teka, vathu va kona a to va tsulisa Kiri, se a to daya Rezini.

¹⁰Sekoko mfumeli Akazi a to tsula Dhamasku, kuya wonana ni Tigilati-Pileseri, mfumeli wa Asiriya; se mfumeli Akazi mbimo yile a nga wona txiluvelo txi nga txi maneka Dhamasku, a to rumela ka mphaxeli Uriya txikombiso ni zumbelo ya kona, madingano ni mthumo wu nga txi fanela kumahwa.

¹¹Se mphaxeli Uriya a to aka txiluvelo, madingano ni tile mfumeli Akazi a ngadi leletete a di Dhamasku; mphaxeli Uriya a to maha eto na a sanzi kuwuya mfumeli Akazi ngu Dhamasku.

¹²Mfumeli koko, a txi ngadi e bwaka ngu Dhamasku, a to wona txiluvelo, mfumeli a to tshuketa hafuhi ka txona e maha miphaxo.

¹³Se a to hisa mphaxo wakwe, ni mningelo wakwe wa sakudya, ni sa kusela, e xwayela mnoha, ni miningelo yawe ya kuthutha txiluveloni hale.

¹⁴Aniko txiluvelo txa koporo txi nga ti ti masoni ka MKOMA, a to txi thavisa masoni ka nyumba, yi ku hagari ka txiluvelo ni Nyumba ya MKOMA, e txi veka didhawani ka txiluvelo txakwe, ngu wutxani.

¹⁵Se mfumeli Akazi a to gela mphaxeli Uriya, ku khene: Ka txiluvelo txa hombe, hisa mphaxo wa mixo, ngu toneto kambe ni ka mningelo wa sakudya wa wusiku, ni mphaxo wa mfumeli, ni mningelo wakwe wa sakudya, ni mphaxo wa votshe vathu va ditiko, ni mningelo wawe wa sakudya, ni miningelo yawe ya sa kusela; ni wotshe mnoha wa miphaxo, ni wotshe mnoha wa miningelo yo hiswa, u na xwayela ka txona; sekoko txiluvelo txa koporo txi na lumba ani, ni na mahela kona siwotiso.

¹⁶Se mphaxeli Uriya, a to maha totshe nga tontile a nga leletiswa tona ngu mfumeli Akazi.

¹⁷ Se mfumeli Akazi, a to thavisa tibhande ta hahatshi ka mkamba, e wu teka, se e thavisa linene txitimwi ka tihomu ta koporo, li ngadi hahatshi ka tona, e sanzeka tximwi ka marigwi.

¹⁸Se ligumbagumba la Sabbata, va nga ti ti li akile nyumbani, ni txike txa hahanze a nga txi wulela ngu txona mfumeli, Akaziya a to si thavisa Nyumbani ka MKOMA, ngu mhaka ya mfumeli wa Asiriya.

¹⁹Kasi ngu kutala ka mithumo ya Akazi ni ti a nga maha, ina ti nga va ti sa bhalwa ka dibhuku da Matimu a vafumeli va ka Judha kani?

²⁰ Se Akazi a to otela ka vatate vakwe, e tshotshwa hafuhi ni vatate vakwe, Didhoropani ka Dhavhidha; se mwanana wakwe Ezekhiya, a to fuma ka wukhalo wakwe.