Read chopi 2 Vafumeli 17 Bible Online

2 Vafumeli 17 - chopi bible

2 Vafumeli 17

¹Ka dilembe da wugumi ni mambidi da kufuma ka Akazi, mfumeli wa ka Judha, Hoseya, mwana Ela, a to khata kufumela Israyeli na a di Samariya, mtxhanu wa malembe ni mune.

²Se a to maha wubihi masoni ka MKOMA; hambi keto kha nga vale va nga khata ve fumela Israyeli, na asi se fuma ene.

³A to lwiswa ngu Salmanaseri, mfumeli wa Asiriya, se Hoseya a to maha khumbi yakwe, ni ku mluva.

⁴Hambi keto, mfumeli wa Asiriya a mani txikungo txa Hoseya, nguko a ti rumete mitumi ka So, mfumeli wa Egipta, asi ngadi e luva kambe ka mfumeli wa Asiriya dilembe ni dilembe, nga kale; sekoko mfumeli wa Asiriya a to mkhotela mkorani.

⁵Nguko mfumeli wa Asiriya a to fumela dotshe ditiko kala kuya hoka Samariya, e di randela malembe mararu.

⁶Ka dilembe da digumi ni mune, da kufuma ka Hoseya, mfumeli wa Asiriya a to honyola Samariya, se va ka Israyeli a to va tsulisa Asiriya, kota tikhumbi, eya va veka Hala ni Habhori, hafuhi ni mnambo wa Gozani, ni mu ka madhoropa a Vamidhiyani.

⁷Ti mahekile tiya ngu ku vanana va ka Israyeli, va nga onha ka MKOMA, Txizimu txawe, awu a nga va humisa ngu ditikoni ka Egipta, hahatshi ka dianza da Faro, mfumeli wa Egipta; se va to khozela simwani sizimu.

⁸Se va to tsimbila ngu sileleto sa mifumo yile, MKOMA a nga yi thavisa kule ka vanana va ka Israyeli, ya sihena sa vafumeli va ka Israyeli.

⁹Se vanana va ka Israyeli, ngu kusisala, va to maha ti i nga ti si nga ta tinene masoni ka MKOMA, Txizimu txawe; va to aka siluvelo ka otshe madhoropa awe, kukhukhela ka txitezi txa vawoneleli, kala ka didhoropa da mtamo.

¹⁰ Va to aka sithombe, ni so vatwa, ka sotshe siluvelo sa mimangoni, ni hahatshi ka yotshe mindonga yo nakana.

¹¹Se va to hisa dibaselo ka sotshe siluvelo, madingano ni mifumo yile MKOMA a nga yi tutumisa masoni kwawe; kambe va to maha to biha kasi kuwusa kuhenya ka MKOMA.

¹²Kambe va thumete sithungulu sile MKOMA a khalako ku va gela a txi khene: Mi nga ti maheni eto.

¹³Se MKOMA a to wukela Israyeli ni Judha, ngu dipswi da votshe vaprofeti, ni votshe vahuti, a txi khene: Hundulukani ka tinzila tanu to biha, mi vekisa milayo yangu ni sileleto sangu, madingano ni Milayo yotshe ni nga ninga vatate vanu, kambe ni nga rumela kwanu ngu sithumi sangu, i ku vaprofeti.

¹⁴Hambiko kha va mu engisa; va to ti nemelisa kuthumani kwawe, nga mathumelo a vatate vawe, va nga mbi kholwa ka MKOMA, Txizimu txawe.

¹⁵Se va to lamba sileleto ni txitumelelano a nga ti txi mahile ni vatate vawe, ni wufakazi wule va nga ti mahile vatate vawe, va to tsimbila ngu wukanganyisi, na i ti maphanga, kufana ni mifumo yile yi nga ti ti madhawani kwawe, ayile MKOMA a nga ti ti va gete ku va nga yi londete.

¹⁶Se va to leka yotshe milayo ya MKOMA, Txizimu txawe, ve maha sithombe so tshulwa sa marole mambidi; kambe va to maha txithungulu txo vatwa, ni ku khizamela dotshe dibutho da nzumani, ve thumela Bhahali.

¹⁷ Kambe va to phindisa ngu ha ka mndilo vanana vawe vavafana ni vamahorana, ve ti ningetetela amu ko xaxuva, ni kudhunda wuñanga, va txi ti xavisa, ngu kumaha tile i ku to biha masoni ka MKOMA, kasi ku mu wusela txiviti.

¹⁸Ngu mhaka yeto, MKOMA a to henyela Israyeli, e mthavisa masoni kwakwe; kha ka sala ni wammweyo, hahanze ka lihunzu la ka Judha.

¹⁹Hambi Judha kha vekisa milayo ya MKOMA, Txizimu txakwe; aniko a to tsimbila ngu sileleto sile si nga mahwa ngu Israyeli.

²⁰Ngu kumaha keto, MKOMA a to nyenya yotshe mbewu ya ka Israyeli, e va tsindaveta, ni ku va ningela manzani ka vakhozisi, kala kuza e va thavisa masoni kwakwe.

²¹Nguko msana ka kule MKOMA a nga abanisa Israyeli ka nyumba ya Dhavhidha, va to fumisa Jerobhowamu mwana Nebhate; Jerobhowamu a to hambukisa Israyeli amu ka kulondisa MKOMA, e va maha ve onha txionho txa hombe.

²²Ngu kumaha keto, vanana va ka Israyeli, va to maha sotshe sionho sile Jerobhowamu a nga ti si mahile; kha va nga nga hambuka ka sona.

²³Kala kuza MKOMA e thavisa Israyeli masoni kwakwe, nga kule a nga nga womba ngu sithumi sakwe, i ku vaprofeti; a tekisilweto Israyeli e tsuliswa Asiriya, emo a manekako kona kala ka ditshiku da nyamsi.

²⁴Se mfumeli wa Asiriya a tisile vathu ngu Bhabheli, ni Kuta, ni Avha, ni Hamati, ni Sefarivhayimi, e ta va akisa madhoropani ka Samariya, wukhaloni ka vanana va ka Israyeli; va to teka Samariya e maha thomba yawe, ve zumba ka madhoropa a kona.

²⁵Se ku to maheka taku, kukhukhela ve khata kuzumba muleya, kha va nga ninga txithavo ka MKOMA; se MKOMA a to rumela tingonyamo hagari kwawe, ti txi ya daya vokari kwawe.

²⁶Veza ve womba ka mfumeli wa Asiriya va txi kha vona: Vathu vale u nga va tisa ve ta zumba madhoropani ka Samariya, kha va zivi sihena sa Txizimu txa mafu awa; wona ku txi va rumete tingonyamo, sekoko ta va dayela, nguko kha va zivi kukhozela Txizimu txa mafu awa.

²⁷Sekoko mfumeli wa Asiriya a to rumisa dipswi do khene: Tekani mmweyo wa vaphaxeli vale mi nga ya va teka niya; a na tshumele eya zumba koneyo, e va gondisa txihena txa Txizimu txa mafu.

²⁸A tile koko, mmweyo wa vaphaxeli vale va nga ti va tekile Samariya, e ta zumba Bheteli, a to va gondisa ti va nga txi dingana kuthavisa tona MKOMA.

²⁹Eko ko, mfumo ni mfumo wu ti mahete sizimu sa wona, wu txi si veka ka makhalo o sawuleka, ale va nga ti mahela Vasamariya, vathu ni vathu ka madhoropa awe, emo va nga txi zumba ka ona.

³⁰Se va Bhabheli va to maha Sukote-Bhenote; va Kuta va to maha Nergali; va Hamati va to maha Asima;

³¹se va Avhewu va to maha Nibhazi ni Taritake; se Vasefarivha va txi hisa vanana vawe mndiloni, masoni ka Adrameleki ni ka Anameleke, sizimu sa Sefarivha.

³²Ngu kumaha keto, va to thava MKOMA, se avale vo ti namisa ngutu, ve va maha vaphaxeli, ka makhalo o sawuleka, i ku vona va nga txi maha mithumo tinyumbani ko sawuleka.

³³Ngu kumaha keto, va ti ti ni txithavo ka MKOMA, ni kuthumela sizimu sawe, madingano ni sihena sa mifumo yile va nga ti tekilwe ka yona.

³⁴ Kala ka ditshiku da nyamsi, va maha sona sihena sile sa kukhata; kha va thavi MKOMA, kambe kha va londisi sileleto sakwe ni silayelo sakwe, hambi milayo, ni sirumo sile MKOMA a nga ruma vanana va Jakobe, awule a nga mninga ditina da Israyeli.

³⁵Hambi keto, MKOMA a ti ti mahile navo txitumelelano, a txi va ruma ku khene: Mi nga thaveni simwani sizimu, hambi kukhizama masoni ka sona, mwendo ku si thumela, mi nga si phaxeleni.

³⁶Aniko ka MKOMA, a nga mi humisa ngu mtamo wa hombe ditikoni ka Egipta, ni diwoko do nawulutwa, mi na thava enewu, ni ku mkhizamela, mi phaxela kwakwe.

³⁷Se sileleto ni sirumo ni silayelo ni milayo yile a nga mi bhalela, mi na khatalela ku yi emela otshe masiku; kha mi na mbi thava simwani sizimu.

³⁸Kha mi na mbi divala txitumelelano txile ni nga maha ni nanu; kha mi na mbi thava simwani sizimu.

³⁹Aniko mi na thava MKOMA, Txizimu txanu, se ene a na mi hulukisa manzani ka votshe valala vanu.

⁴⁰Hambi keto, vona kha va pfisisa; va to maha tolovelo yile yawe yo khata.

⁴¹Ngu kumaha keto, mifumo yiya yi txi thava MKOMA, ni kuthumela sithombe sawe so vatwa; nga tile va nga maha vatate vawe; va mahisa toneto ni vona vanana vawe, ni vanana va vanana vawe, kala ka ditshiku da nyamsi.