Read chopi 2 Vafumeli 19 Bible Online

2 Vafumeli 19 - chopi bible

2 Vafumeli 19

¹Se mbimo yile Ezekhiya a nga ti mu engisete, a to vharulela syambalo sakwe, e ti fenengeta ngu disaka, se e wulela Nyumbani ka MKOMA.

²Sekoko a to rumela Eliyakimu, mthangeli wa nyumba ya wukoma, ni mabhalani i ku Sebhina, ni madhota a vaphaxeli va di fenengete masaka, ka mprofeti Isaya, mwana Amosi.

³Va to ya m'gela ku kha vona: Mfumeli Ezekhiya a khene: “Ditshiku diya da nyamsi ditshiku da xomulo ni kutxhipiswa, ni kuruketelwa; nguko vanana va hokile kuhefemulwani, kambe kuwalo mtamo waku va txi velekwa.

⁴Ti nga nda maheka ti to MKOMA Txizimu txako, a txi engisa otshe mapswi a Rabhisake, awule a nga rumwa ngu nyamne wako, i ku mfumeli wa Asiriya, ku ta duka Txizimu txa kuhanya; khongelela sotshe sile u si alakanyako.”

⁵Se sithumi sa mfumeli Ezekhiya va to ta ka Isaya.

⁶Isaya a to khene: Wombani tiya ka nyamne wanu: MKOMA a khene: U nga thave mapswi ale u nga ma pfa, ale si nga ni ruketela ngu ona sithumi sa mfumeli wa Asiriya.

⁷Wona ati to ni na thela moya kwakwe, se ene a na pfa diguwa, a na tshumelela ditikoni kwakwe; ngu ditxhari ni na mmaha ewa ditikoni kwakwe.

⁸Sekoko Rabhiseke a to tshumela, a to ya mana mfumeli wa Asiriya a txi lwisa didhoropa da Libhina, nguko a di ti pfite taku mfumeli wa Asiriya a khukhile ngu Lakisi.

⁹Mbimo yile ene a nga pfa taku Tiraka i ku mfumeli wa Etiyopiya wa huma, a lava ku kulwisa, a to engeta e rumela mitumi ka Ezekhiya, a txi khene:

¹⁰Mi na ya khanu ka Ezekhiya mfumeli wa ka Judha: “U nga ti xenge, Txizimu txako txile u txi thembako u txi khawe: Jerusalema kha na mbi ningelwa manzani ka mfumeli wa Asiriya.

¹¹Se u khala ku tipfa tile va khalako kumaha vafumeli va Asiriya ka otshe mafu; ngu ku ma fuvisa otshe; se ina awe u na ti txhatxhisa eko kani?

¹²Ina ma nga va ma di txhatxhisilwe ngu sizimu sa mifumo yile yi nga fuviswa, i ku madhoropa a Gozani, Harani ni Rasefi, ni ka vanana va Edheni, va nga txi zumba Telasari kani?

¹³Kumahilwe txani ka mfumeli wa Hamati, ka mfumeli wa Aripadhe, wa Sefarvayimi, wa Hena, ni wa Ivha kani?”

¹⁴Sekoko mbimo yile Ezekhiya a nga amukela mapasi ngu manzani ka mitumi e ma gonda, a to wulela Nyumbani ka MKOMA; Ezekhiya a to ma ateta masoni ka MKOMA.

¹⁵ A to khongela masoni ka MKOMA a txi khene: Awe MKOMA, Txizimu txa ka Israyeli, u zumbako hagari ka Makerubhima, awe upune ngawe wekha u ku Txizimu txa yotshe mifumo ya ha mafuni; awe u vangile tinzuma ni mafu.

¹⁶Namisa nzeve yako MKOMA, u engisa; tula maso ako MKOMA u wona: Hi nga pfa mapswi a Senakeribhe a nga ma rumela ku ta emisana ni Txizimu txa kuhanya.

¹⁷Ditshuri ngu diya, awe MKOMA, vafumeli va Asiriya va xasete mifumo ni mafu a kona.

¹⁸Va tshotshile sizimu sawe mndiloni, ngako i nga si nga sizimu sa txilo, aniko i ti mithumo ya manza ya vathu, nzithombe so mahwa ngu mapulango ni marigwi; ngu mhaka yeto, va si khundumusete.

¹⁹Konkuwa koko, awe MKOMA, Txizimu txathu, thumelwa ngu kuva u di hi txhatxhisile, ngu kumaha keto, yotshe mifumo ya ha mafuni yi na tiziva ti to ngawe wekha u MKOMA Txizimu.

²⁰Sekoko Isaya mwana Amosi, a to khene ka mfumeli Ezekhiya: MKOMA, Txizimu txa ka Israyeli, a khene: A tile u nga ni kombela ngu mhaka ya Senakeribhe, mfumeli wa Asiriya, ani ni ti engisile.

²¹Dipswi di a ngadi womba MKOMA ngu mhaka yakwe ngu diya: Wo tuma, mwanana wa Siyoni wa dihorana, wa kutxhipisa, wa kupoyilela; mwanana wa Jerusalema wa dihorana wa zinginisa msungo msana kwako.

²²U phikizanile ni mani niku u ruketete mani kani? U kwangulete mani ni kuguleta maso txiluveloni kani? U mahete ani Msawuleki wa Israyeli kani?

²³Ngu mitumi yako u lwisile MKOMA u txi khawe: Ngu kutala ka sikotxikani sangu, na kwelela ani txitimwi ka mimango yo sawuleka, ya didhawani ka Libhanoni, ni na gangela mikedhari yakwe yo lapha, ni mikhure yakwe yo tshura, ni na wulela kala mtungwe ka tinyumba takwe, kala ka sitinga sakwe so nona.

²⁴Ni kete mati o biha ni sela, ngu mikondo yangu ni na omisa yotshe minambo ya makhalo o tsana.

²⁵Ina u nga va u sa tipfa taku ngu kale ni ti mahile toneto, niku kukhukhela masiku a kale ni si vangile kani? Sekoko konkuwa ni ku tisile, kuva u ta khozisa madhoropa a mtamo me maha situletule sa siwula.

²⁶Ngu kumaha keto va zumbi va kona, ngu manza o sawuleka, va to xamaliswa, ve kanganyiseka; ku nga mwasi wa txitingani, ni wotshe mwasi wo nakana, ni mwasi wo tshulela tinyumba, ni fulaho yo hiswa yi si se kula.

²⁷Hambi keto, kukhalahatsha kwako ni kuhuma kwako, ni kuwulela kwako, ni ku ni henyela kwako, na kuziva.

²⁸Ngu mhaka ya ku ni henyela kwako, niku kuhenya kwako ku pfate ka tinzeve tangu, sekoko ni na vekela tximemba txangu thonvuni kwako, ni matomu angu txisofuni kwako, ni kutshumeta ngu nzila yile u nga ta ngu yona.

²⁹Txikombiso txa kona ngu txiya: Dilembe diya ku na dyiwa sile si no mila sipune, se ka dilembe di tako sile si no huma; sekoko da dilembe da wuraru, phayani mi funyela, mi phaya mivhinya, mi txi dya mihando ya kona.

³⁰Nguko va nyumba ya ka Judha avale va nga huluka, va tshumela ve zima mikoloti hahatshi, ve wonekisa mihando txitimwi.

³¹Nguko ngu Jerusalema ku na huma vale va nga sala, se ngu mmangoni ka Siyoni avale va nga huluka; kuthembeka ka MKOMA ku na maha eto.

³²Ngu toneto, MKOMA a womba tiya ngu mhaka ya mfumeli wa Asiriya: Kha na mbi wulela ka diya didhoropa, hambi kujangetwa lingove limwelo; kha ku na mbi wulela txitxhangu ni txa tximwetxo, hambi ka mibhala yo sisala ka yona.

³³Nzila yile a nota ngu yona, a na tshumela ngu yona, sekoko kha na mbi nga wulela ka diya didhoropa, kuwomba MKOMA.

³⁴Nguko ani ni na emela didhoropa diya, ku na di hulukisa, ngu kuranda kwangu ni kuranda txithumi txangu Dhavhidha.

³⁵Ku to maheka ti to ka wona wusiku wule, kuhuma ngelozi ya MKOMA yi peka 185.000 wa va Asiriya dizumboni kwawe; ni mixo mbimo yile va nga wuka vale va nga huluka, va to wona sirumbi.

³⁶Sekoko Senakeribhe i ku mfumeli wa Asiriya a to khukha e tsula; a to tshumela eya zumba Ninivha.

³⁷Mbimo yile a nga ti namile nyumbani ka txizimu txakwe Nisiroke, vanana va kona i ku Adrameleki ni Saresari, va to m'daya ngu ditxhari; hambi keto, va to thavela ditikoni ka Ararati; se mwanana wa kona Esari-Hadhomi, a to fuma ka wukhalo wakwe.