Read chopi 2 Vafumeli 20 Bible Online

2 Vafumeli 20 - chopi bible

2 Vafumeli 20

¹Ka ona ale masiku, Ezekhiya a lwate hafuhi ni kufa; se mprofeti Isaya, mwana Amosi, a tile kwakwe a txi ta khene: MKOMA a khene: “Lulamisela nyumba yako, nguko u na fa, khu na mbi hanya.”

²Sekoko a to tshemberisa khohe e wonetela disetani, se e khongela ka MKOMA, a txi khene:

³Awe MKOMA! Alakanya taku ni tsimbite ditshurini, ngu mbilu yo thembeka, ni mahile to lulama masoni kwako, se a to dila ngutu Ezekhiya.

⁴Ku to maheka taku asi se huma Isaya ngu hagari ka m'hubhe wa nyumba ya wukoma, di tile kwakwe dipswi da MKOMA, di txi ta kha dona:

⁵Tshumela u txi ya khawe ka Ezekhiya, mthangeli wa vathu vangu: MKOMA, Txizimu txa tate wako Dhavhidha, a womba tiya: Ni engisile mkombelo wako, ni woni mirongo yako; sekoko ni na kukalamukisa; ka ditshiku da wuraru, u na kwela Nyumbani ka MKOMA.

⁶Ni na engetela digumi da malembe ni mtxhanu ka masiku ako, kambe ni na kuhulukisa manzani ka mfumeli wa Asiriya, awe ni didhoropa diya; ni na emela didhoropa diya ngu lirando langu, ni kuranda txithumi txangu Dhavhidha.

⁷Isaya a to engeta a txi khene: Tekani tximbwanda txo mahwa ngu makuwa. Se va to txi teka ve nameka aha ka txilonda, a so kalamuka.

⁸Se Ezekhiya a to wotisa ka Isaya ku khene: Ngu txihi txikombiso txaku MKOMA a na ni hanyisa, niku ngu ditshiku da wuraru ni na kwela Nyumbani ka MKOMA kani?

⁹Se Isaya a to khene: MKOMA a na kuninga txikombiso txaku, ene MKOMA a na maha tile a nga womba to khene: Ina mtsudi wu na ya masoni ngu digumi da mazambo, niku wu na tshumelela msana ngu digumi da mazambo kani?

¹⁰Sekoko Ezekhiya a to khene: Ta hehuka kuwekela mtsudi ngu lipimo la digumi da mazambo; ti nga maheke eto, mtsudi wu na wuye ngu lipimo la digumi da mazambo.

¹¹Sekoko mprofeti Isaya a to khongela ka MKOMA; se a to wuyisa mtsudi ngu lipimo la digumi da mazambo, i ku mazambo ale diwatxhi da ditambo da Akazi di nga ti wekete ngu ona.

¹²Ka yona yile mbimo Merodhake-Bhaladhani, mwana Bhaladhani, mfumeli wa Bhabhilona, a to rumela mapasi ni txihiwa ka mfumeli Ezekhiya, nguko a ti ti pfite taku Ezekhiya a ti nga lwala.

¹³Se Ezekhiya a to va amukela kha kwati, e va komba yotshe nyumba ya thomba yakwe, silivhela ni nzalama, ni sithimbelo so nungela, ni mafura o bhumula, ni nyumba yakwe ya matxhari, ni sotshe sile si ngadi sisangalani kwakwe; kha ka nga ve ni txa tximwetxo a nga mbi va komba, hambi txa nyumbani kwakwe, mwendo txa wukoma wakwe.

¹⁴Sekoko mprofeti Isaya a tile ka mfumeli Ezekhiya, a txi ta khene: Vavamna vale va ti kha vona txani, niku va khukhete hani va txi ta kwako kani? Se Ezekhiya a to khene: Va tile ngu ka ditiko da kule ngutu, i ku Bhabhilona.

¹⁵Isaya a to khene: Va woni txani nyumbani kwako kani? Ezekhiya a to khene: Sotshe si ku nyumbani kwangu, va si woni; kha ku nga ni txa tximwetxo txi ku sisangalani kwangu ni nga mbi va komba.

¹⁶Sekoko Isaya a to khene ka Ezekhiya: Engisa dipswi da MKOMA.

¹⁷Mata masiku awa aku sotshe si no va si diho nyumbani kwako, si nga sengeletelwa ngu vatate vako kala ka ditshiku da nyamsi, si no tekwa si tsuliswa Bhabhilona; kha ku na mbi sala ni txa tximwetxo, kuwombile MKOMA.

¹⁸Hambi ni vanana vako ava u no va veleka, va na tekwa ve tsuliswa kuya mahwa mithenwa, nyumbani ka mfumeli wa Bhabhilona.

¹⁹Sekoko Ezekhiya a to khene ka Isaya: Ndinene dipswido da MKOMA u nga ni gela. A to womba kambe ku khene: Ina ku na pwateka kuthutha ni ditshuri ka masiku a kufuma kwangu kani?

²⁰Kasi ngu kutala ka mithumo ya Ezekhiya, ni mtamo wakwe wotshe, ni txisima txi a nga txi maha, ni nzila yo tsimbitisa mati me wulela didhoropani, ina ti nga va ti sa bhalwa amu ka dibhuku da Matimu a vafumeli va ka Judha kani?

²¹Se Ezekhiya a to otela ka vatate vakwe; se mwanana wa kona Manasi, a to fuma ka wukhalo wakwe.