Read chopi 2 Vafumeli 22 Bible Online

2 Vafumeli 22 - chopi bible

2 Vafumeli 22

¹ Josiya a khatile kufuma a ti ni tanga ya mtxhanu wa malembe ni mararu, se a fumela Jerusalema magumi mararu a malembe; se ditina da mwamwakwe i ti ti Jedhidha, mwana Adhaya, wa Bhozikate.

²Se a to maha ta tinene masoni ka MKOMA; kambe a to tsimbila ngu totshe tinzila ta tate wakwe Dhavhidha, kha ngaza e khukha ka tona, eya txinene mwendo txibhabha.

³Ku to maheka koko ati taku ngu dilembe da wugumi ni mtxhanu ni mararu da mfumeli Josiya, mfumeli a to ruma mabhalani Safani, mwana Azaliya, wa mwana Mesulawu, Nyumbani ka MKOMA, a txi ya khene:

⁴Kwelela uya ka mphaxeli wa hombe, Hilikiya, uya m'gela ku a na teke male yile yi nga tiswa Nyumbani ka MKOMA, ayiya vawoneleti va mtshunzuti wa ditimba va nga amukela ngu ka vathu.

⁵Se male yiya, va na yi ningele manzani ka vale va ku ni mrwalo wo maha mthumo, ni kuxayisa Nyumba ya MKOMA; ati to ve yi ningela ka vale va mahako mthumo wu wu ku Nyumbani ka MKOMA, ve lulamisa amu ku nga onhekela ka nyumba:

⁶Ka vavati, vaaki, vo aka ngu marigwi, kasi ve xava mapulango ni marigwi o vatwa, ve lulamisa nyumba.

⁷Kha va nga londiselwa ka mhaka ya male yile va nga ti ti ningilwe manzani kwawe, nguko va ti ti yi thumisa ngu kuthembeka.

⁸Sekoko mphaxeli wa hombe Hilikiya, a to khene ka mabhalani Safani: Ni tumbute dibhuku da Mlayo Nyumbani ka MKOMA, se Hilikiya a to ningela dibhuku ka Safani, ene a to di gonda.

⁹Sekoko mabhalani Safani, a to ta ka mfumeli, a txi ta ningela xamulo ka mfumeli, yo khene: Sithumi sako si tekile male yile yi nga manwa nyumbani, si yi ningela manzani ka vale va nga rwekwa mthumo, va wonelelako Nyumba ya MKOMA.

¹⁰Se ene mabhalani Safani, a zivisile mfumeli to khene: Mphaxeli Hilikiya, a ni ningile dibhuku. Se Safani a to di gonda masoni ka mfumeli.

¹¹Ku to maheka koko taku, mbimo yile mfumeli a nga pfa mapswi a dibhuku da Mlayo, e vharula syambalo sakwe.

¹²Se mfumeli a to ruma Hilikiya mphaxeli, ni Ahikamu, mwana Safani, ni Akibhori, mwana Mikaya, ni mabhalani Safani, ni Asaya, txithumi txa mfumeli, a txi khene:

¹³Tsulani mi ya wotisa ngu ditina dangu, ni da vathu vangu, ni da kotshe amuwa Judha, madingano ni mapswi a dibhuku diya di nga manwa; nguko kuhenya ka MKOMA nga hombe, kuturako txitimwi kwathu, nguko vatate vathu kha va pfisisa mapswi a dibhuku diya, ti to ve maha totshe ti hi nga bhalelwa.

¹⁴Sekoko mphaxeli Hilikiya, ni Ahikamu, ni Akibhori, ni Safani, ni Asaya, va to tsula ka mprofeti wa txisikati Hulidha, msikati wa Salumi, mwana Tikivha, wa mwana Harasi, muwoneleli wa syambalo (a nga txi zumba ka didhawa da wumbidi da Jerusalema) veya mtxhamusela.

¹⁵Se ene a to khene kwawe: MKOMA, Txizimu txa Israyeli, a khene: Gelani m'thu[2] wu a nga mi rumela kwangu, mi txi ya khanu:

¹⁶MKOMA a womba tiya: Ni na tisa dikhombo ka wuwa wukhalo, ni ka vale va zumbako ka wona, i ku otshe mapswi a dibhuku dile di nga gondwa ngu mfumeli wa ka Judha.

¹⁷Nguko va ni lekile, ve hisela dibaselo simwani sizimu, ve ni wusela kuhenya ngu yotshe mithumo ya manza awe, txiviti txangu txi vhutukile ka wukhalo wuwa, kambe kha txi na mbi timeka.

¹⁸Aniko, ka mfumeli wa ka Judha, wule a nga mi ruma kuya wotisa ka MKOMA, mi na ya m'gela ku khanu: Madingano ni timhaka tile mi nga tiengisa, MKOMA, Txizimu txa Israyeli, a khene:

¹⁹Ngako mbilu yako yi nga rawula, u ti namisa masoni ka MKOMA, mbimo yile u nga engisa ni txi henya ngu wukhalo wuwa, ni vazumbi va kona, va ti dingana kufuviswa ni kuve txiruko, u vharulete syambalo sako, u dite masoni kwangu, kambe ni ku engisile, kuwomba MKOMA.

²⁰Ngu mhaka yeto, ni na kutshanganisa ni vatate vako, se awe u na vekwa ngu kuthutha dithithani kwako, maso ako kha ma na mbi wona wotshe wufenze wule ni no wu tisa ka wukhalo wuwa. Sekoko va to wuyisa xamulo yongeto ka mfumeli.