Read chopi 2 Vafumeli 25 Bible Online

2 Vafumeli 25 - chopi bible

2 Vafumeli 25

¹ Se ku to maheka ti to ka dilembe da mtxhanu ni mune da kufuma ka Zedhekiya, ka mtxima wa digumi, ngu ditshiku da digumi ka mtxima, Nabhukodhonozori mfumeli wa Bhabhilona ni otshe masotxhwa akwe, va to wuka ve randela Jerusalema, va to aketela sitshingelelo ka otshe madhawa.

²Se didhoropa di to randelwa kala ka dilembe da digumi ni dimwedo da kufuma ka Zedhekiya.

³Ka ditshiku da mtxhanu ni mune, ka mtxima wa wumune, mbimo yile didhoropa di nga ti wona di ti tsindavetilwe ngu nzala, ku si maneki hambi dipawu do dyisa vathu,

⁴sekoko didhoropa di to khundumuswa, se votshelele valwi va yimbi va to tutuma ni wusiku ngu haditimbani diku hagari ka maguma mambidi hafuhi ni thembwe ya mfumeli (nguko Vakaldheya va ti ti randete didhoropa ngu hahanze); se mfumeli a pfhukile ngu nzila ya libalani.

⁵Hambi keto, masotxhwa ma to londisa mfumeli kala me ya mmanela tibalani ka Jeriko; se masotxhwa akwe otshe ma to hangalaka.

⁶Va to teka mfumeli ve mtsulisa ka mfumeli wa Bhabhilona, didhoropani ka Ribhila; ngu koneyo a nga lamulwa kona.

⁷Se vanana va Zedhekiya va to dawa masoni kwakwe; va to dhodela maso a Zedhekiya, ve msunga ngu titxhini timbidi ta msuku, se ve mtsulisa Bhabhilona.

⁸Se ka mtxima wa wutxhanu, ka ditshiku da mtxhanu ni mambidi ka mtxima (adiya i ti ti dilembe da digumi ni mtxhanu ni mune da Nebhukodhonosori, mfumeli wa Bhabhilona), a tile Nabhuzaradhani, mthangeli wa yimbi, txithumi txa mfumeli wa Bhabhilona, kona Jerusalema.

⁹A to hisa Nyumba ya MKOMA ni nyumba ya mfumeli, kumweko ni totshe tinyumba ta Jerusalema; a to hisa ni totshe tinyumba ta vahombe.

¹⁰Se otshe masotxhwa a Vakaldheya, ma nga ti ti ni mthangeli wa yimbi, ma to khundumusela maguma ale ma nga ti bhiyete Jerusalema.

¹¹Se ngu wungi wa vathu vale va nga lekwa ve sala didhoropani, ni vatereki vale va nga ti ningela ka mfumeli wa Bhabhilona, wungi wa dibutho, ni Nabhuzaradhani, mthangeli wa yimbi, a to va ñola e tsula navo.

¹²Sekoko avale va sisiwana ngutu ditikoni a to va leka, mthangeli wa yimbi, ve thuma amu ka mivhinya, ni kudima.

¹³Vakaldheya va to fayetela nitona tiphande ta koporo ti nga txi maneka Nyumbani ka MKOMA, ni sitshuwa ni Linene la msuku, si nga txi maneka Nyumbani ka MKOMA; se va to teka msuku wakwe ve tsula nawo Bhabhilona.

¹⁴Kambe va to teka tikhadi ni mafoxola, ni sipfhito, ni sibhumuliso, ni sotshe siya sa koporo, asile va nga txi thuma ngu sona.

¹⁵Mthangeli wa yimbi a to teka so ñola ngu sona makala a mndilo, ni mikamba, ni sotshe sile i nga ti ti sa nzalama yo surutetwa ni sa silivhela.

¹⁶Tiphande timbidi, linene ni mikamba yile Solomani a nga ti ti yi mahile Nyumbani ka MKOMA, kunemela ka koporo ya sotshe siya i ti ti ko pinda mpimo.

¹⁷Kudemba ka phande yimweyo i ti ti ka digumi da mikono ni mtxhanu ni yiraru, txitimwi ka yona ku ti ti ni txikazelo txa koporo, txa kudemba ka mikono yiraru; sefo ni maromani si ti ti ranganyetile txikazelo, sotshe i ti ti sa koporo; se yimwani phande ni yona yi ti ti fana ni yiya, ni sefo ya kona.

¹⁸Se Nabhuzaradhani, mthangeli wa vawoneleli, a to teka mphaxeli wo khata i ku Saraya, ni mphaxeli wa wumbidi i ku Zefaniaya, ni vawoneleli vararu va msasimo wa ditimba.

¹⁹Se didhoropani a to teka mthenwa mmweyo i nga ti ti mthangeli wa yimbi, ni mtxhanu wa vavamna masoni ka mfumeli, va nga maneka didhoropani, kumweko ni wule a nga ti ti mbhalela vathu va kuya yimbini, ni mtxhanu wa magumi a vavamna va ditiko, va nga manwa didhoropani.

²⁰Nabhuzaradhani i ku mthangeli wa vawoneleli, a to va tisa ka mfumeli wa Bhabhilona, kona Ribhila.

²¹Se mfumeli wa Bhabhilona a to va tsayisa e gwita e va daya kona Ribhila ditikoni ka Hamati; se Judha a to ñolwa e yiswa hahanze ka ditiko dakwe.

²²Aniko vathu vale va nga ti zumba ditikoni ka Judha, vale Nabhukodhonozori a nga va leka ve zumba, a to veka txitimwi kwawe Gedhaliya, mwana Ayikami, wa Safani, kuva mthangeli wawe.

²³Mbimo yile va nga tiengisa vathangeli va tiyimbi, vona ni vavamna vale mfumeli wa Bhabhilona a nga va vekela Gedhaliya kuva wa hombe wawe, va tile ka Gedhaliya kona Misipa, i ku vava: Ismayeli, mwana Netaniya, Jowanani, mwana Kareya, Seraya, mwana Tanumete wa Netofati, ni Jazaniya, mwana Mahakate, vona ni vavamna.

²⁴Gedhaliya a to xambanya kwawe, ni ka vavamna vale, a txi khene: Mi nga thaveni kumaha tikhumbi ta Vakaldheya, zumbani ditikoni mi thumela mfumeli wa Bhabhilona, se ti na mi tsimbilela kha kwati.

²⁵Ku to maheka koko ti taku, ka mtxima wa wutxhanu ni yimbidi, eta Ismayeli mwana Netaniya, wa mwana Elisama, wa liveleko la wukoma, kumweko ni vavamna va digumi, ve ta peka Gedhaliya, se efa, kumweko ni Vajudha ni Vakaldheya vale a nga ti ti navo Misipa.

²⁶ Sekoko votshe vathu va to khukha, wam'dotho ni wa hombe, kumweko ni vathangeli va tiyimbi, va tota Egipta, nguko va ti ti thava Vakaldheya.

²⁷Msana keto, ku to maheka tito, ka dilembe da magumi mararu ni mtxhanu wa malembe ni mambidi, a wukhumbi wa Jowakimu, mfumeli wa ka Judha, ka mtxima wa digumi ni yimbidi, ngu ditshiku da magumi mambidi ni mtxhanu wa masiku ni mambidi, Evhili-Merodhaki, mfumeli wa Bhabhilona, ka dilembe dile a nga fuma ngu dona, a to txhatxhisa Jowakimi, mfumeli wa ka Judha, nyumbani ka kukhotelwa.

²⁸A to womba-womba ngu wunene ka Jowakimu, e m'veka ka txitulu txitimwi ka txitulu txa vafumeli vale a nga ti ti navo Bhabhilona.

²⁹A to mthavisa syambalo sa mkorani, Jowakimu a to simama edya kumweko ni mfumeli ka otshe masiku a kuhanya kwakwe.

³⁰Se sa kuhanya ngu sona, a to ningwa ngu mfumeli, mpimo wa ditshiku, ka ditshiku da wona, ka otshe masiku a kuhanya kwakwe.