Read chopi 2 Vafumeli 5 Bible Online

2 Vafumeli 5 - chopi bible

2 Vafumeli 5

¹Se Nahanani, mthangeli wa dibutho da mfumeli wa Siriya, i ti ti m'thu wa hombe masoni ka nyamne wakwe, ni kuthaviseka ngutu; nguko MKOMA a mthumisile kutxhatxhisa Vasiriya; ene i ti ti wamwamna wa lisima, hambiko a nga ti ti ni xokonho.

²Se ku to huma masotxhwa a Siriya ni a ditiko da ka Israyeli, va to ñola dihorana dimwedo, di maha txithumi txa msikati wa Nahanani.

³Se ene a to khene ka nyamne wakwe: I txhuko ku nyamne wangu eya wonana ni mprofeti wu a kuho Samariya, ene a ndi na m'hanyisa ka xokonho.

⁴Sekoko Nahanani a to ya khene ka mfumeli: Dihorana dokari da ku ta ngu Israyeli, di wombile ti, ni tile.

⁵Se mfumeli wa Siriya a to khene: Kuluveta u tsula, u ya ningela dipasi diya ka mfumeli wa ka Israyeli. Se manzani kwakwe a ti ti ni digumi da titalenta ta silivhela, ni 6.000 wa maxekele a nzalama, ni digumi da syambalo so tshura.

⁶Dipasi a nga heleketa ka mfumeli di txi womba tiya: Kunukunuko di hokako dipapilo diya, ti zive to ni rumela Nahanani, txithumi txangu, kuva u txi m'hanyisa ka xokonho.

⁷Se mbimo yile a nga gonda dipapilo mfumeli wa ka Israyeli, a to vharula syambalo sakwe, a txi khene: Ina no va Txizimu ani, txo daya ni kuhanyisa, kuza e ni rumela wamwamna wuwa, kuva ni m'hanyisa ka xokonho kani? Sekoko ti woneni, na mi kombela, a lava wurindi wa ku ni lwisa.

⁸Se mbimo yile a nga tipfa Elixa, m'thu wa Txizimu, ati taku mfumeli wa ka Israyeli a vharute syambalo sakwe, a to rumela dipswi ka mfumeli do khene: U vharulete syambalo sako ngu kutxani kani? Mleke e ta wonana ni nani, a na ziva ti to ku ni mprofeti amuwa Israyeli.

⁹A to ta koko Nahanani, ni mahantxhi akwe ni txikotxikani txakwe, a txi ta ema ha txikeni ka nyumba ya Elizewu.

¹⁰Sekoko Elixa a to rumisa mtumi kuya gela Nahanani to khene: Tsula Jordhani u ya samba mtxhanu wa sikhati ni simbidi, se nyama yako yi na thunga, u na kalamuka.

¹¹Aniko Nahanani a to henya e khukha e tsula, na a txi khene: Ani ni ti ti khani ngu ditshuri a na huma a txi ta ema e khumbuka ditina da MKOMA, Txizimu txakwe, e gwesa ngu dianza dakwe ahale kupandako, e kalamukisa awule wa xokonho.

¹²Kuleka eto, ina minambo ya Abhana ni Faripari kona Dhamasku, kha yi pindi ngu wutxhuko otshe mati a Israyeli kani? Ina ni sa sikota kusamba ka ona ni kalamuka kani? A to tshumela e tsula na a di henyile ngutu.

¹³Sekoko ku to tshuketa sithumi sakwe si txi ta kha sona: Tata wangu, ngako mprofeti a ti kugete to kari ta hombe ina nga u sa ti maha kani? Ngutu-ngutu ku khene: Samba, u na kalamuka.

¹⁴Sekoko a to relela eya bhumwala kona Jordhani mtxhanu wa sikhati ni simbidi, madingano ni kuwomba ka m'thu wa Txizimu; se nyama yakwe yi to thunga, yi txi nga nyama ya mfana, se a to kalamuka.

¹⁵Sekoko a to tshumelela ka m'thu wa Txizimu, ene ni votshe vale a nga ti ti navo, e ta bwaka masoni kwakwe a txi khene: Wona taku na tiziva taku ha mafuni kotshe kha ku na txizimu, hahanze ka Txizimu txa Israyeli. Konkuwa ni kombela u amukela txibongelo txa txithumi txako.

¹⁶Aniko Elixa a to khene: Ni xambanya ngu Txizimu txa kuhanya, atxi ni ku masoni ka txona, taku kha ni na mbi amukela. Nahanani a to mkurumeta kuamukela, aniko ene a to lamba.

¹⁷Se Nahanani a to khene: Ti na mahise toneto; hambi keto, tumela ti to ngu mpatwa wa mamula txithumi txako txi tsula ni mafu; nguko txithumi txako kha txi na mbi ngadi txi ningela miningelo ni miphaxo ka simwani sizimu, i si nga ka MKOMA.

¹⁸Keto, MKOMA a na divalele nyamne wako. Mbimo yile nyamne wangu a wulelako nyumbani ka Rimoni, kuya khongela, se a txi khigela ka dianza dangu, se nani ni maneka ni txi ti namisa ka Rimomi; eko ni txo nama nyumbani ka Rimoni, keto MKOMA a na divalele txithumi txako.

¹⁹Se Elixa a ti khene kwakwe: Tsula ngu kuthutha. Se a to tsimbila e hoka ka mnava wa kule nyana.

²⁰Sekoko Gehazi, dijaha da Elixa, m'thu wa Txizimu, a to khene: Hi nga wonani, nyamne wangu a tsimbile musiriya wule Nahanani, ku mninga ngu dianza dakwe, sa sidotho ka sile a ngadi naso. Ni xambanya ngu MKOMA wo hanya a tito, ni na tutuma ngu msana kwakwe ni ya teka txokari.

²¹Se Gehazi a to tsula e londisa Nahanani; mbimo yile Nahanani a nga ti wona to wata ngu kututuma msana kwakwe, a to ndaka ngu mule ka txikotxikani a txi m'yela, a txi khene: Ina i thengeko kani?

²²Se Gehazi a nje khene: I thenga; nyamne wangu a ni rumile ku ta kugela taku: Wona konakuwa va bwakile vafana vambidi, i ku vanana vavaprofeti, ngu mmangoni ka Efrayime; va ninge koko talenta yimweyo ya silivhela, ni syambalo simbidi.

²³Se Nahanani a to khene: Amukela titalenta timbidi. A to mkurumeta, e sungelela titalenta timbidi ka masaka mambidi, ni syambalo simbidi; se e rweka vambidi ka majaha akwe, ale ma nga teka me heleketa ka Gehazi.

²⁴Se mbimo yi a nga hoka m'tini, a to si teka ngu manza akwe e si veka nyumbani; se a to tshumeta vavamna vale ve tsula.

²⁵Sekoko a to wulela e si veka masoni ka nyamne wakwe Elizewu. Se Elixa a to khene: U wuya ngu hani awe Gehazi. Gehazi a nje khene kha naya ka wukhalo ni wawumwewo.

²⁶Aniko Elixa a to khene: Khu ti zivi taku mbilu yangu yi ti ti ni nawe, mbimo yile awule wa wamwamna a nga txhika ngu mu ka txikotxikani e kuhingeta kani? Ina i ti ti yona mbimo ya ku va u di tekile silivhela ni kuteka syambalo, ni miolivha, ni mivhinya, ni tinvuta, ni tihomu, ni sithumi sa txiwamna ni sa txisikati kani?

²⁷Ngu kumaha keto, xokonho ya Nahanani yi na tshapela kwako, ni ka liveleko lako kala kupinduka. Se Gehazi a to khukha masoni ka Elixa, na a di ni xokonho yo maha ngu ku xwee, nga hunguva.