Read chopi 2 Vafumeli 6 Bible Online

2 Vafumeli 6 - chopi bible

2 Vafumeli 6

¹Se vanana vavaprofeti va to kha vona ka Elizewu: Wona ti taku wukhalo wu hi zumbako ka wona kumweko ni nawe mbudotho ngutu.

²A hi tsuleni Jordhani, mmweyo ni mmweyo wathu eya teka phande yimweyo, hi na ti akela wukhalo wo zumba ka wona. Se Elixa a to khene: Tsulani.

³Se mmweyo wawe a to khene ka Elizewu: Ha kukombela to u tsula ni nathu. Se a nje khene kha Elizewu: Na tumela, ni na tsula ni nanu.

⁴Se Elixa a to tumela e tsula navo. Se mbimo yile va nga hoka Jordhani, va to ganga tiphande.

⁵Se mbimo yile mmweyo wawe a nga txi ganga phande, ditxhapu di to wa matini; se a nje khene: Ayiwe! Eko ni na txani, nyamne wangu! Nguko i ti ti ditxhapu do lomba.

⁶Se Elixa m'thu wa Txizimu a nje khene: Ngu hani di nga wela kona kani? Se a to mkomba wukhalo wa kona, Elixa a to wila ndonga e yi vinza kona hale, se ditxhapu di so deluka.

⁷Se a to khene. Di teke. Sekoko wamwamna wule a to tula dianza dakwe e teketa ditxhapu.

⁸Se mfumeli wa Siriya a ti ti lwisa Israyeli; a to pimisana ni sithumi sakwe a txi khene: Ka wukhalo wule ni wule, ku nave ni wugovelo wangu.

⁹Aniko Elixa m'thu wa Txizimu a to khene ka Israyeli: Ti wonele, u nga pinde ngu ka wukhalwewo; nguko Vasiriya va hale.

¹⁰Ngu kumaha keto, mfumeli wa ka Israyeli, a to rumela tito, ka wukhalo wule a nga ti ti getwe ni ku txharihiswa ngu m'thu wa Txizimu. Ku txi wonelelwa yotshe mbimo.

¹¹Sekoko mbilu ya mfumeli wa Siriya yi to karateka ngu mhaka yiya, se e dhana sithumi sakwe a txi si wotisa ku khene: Eko i ngave mani wa ka kwathu a emako ni mfumeli wa ka Israyeli kani?

¹²Se mmweyo wa sithumi sakwe a to khene: Ku walo ni wammweyo, awe mfumeli, nyamne wangu. Aniko mprofeti Elixa a manekako Israyeli, ngene a zivisako ka mfumeli wa ka Israyeli, totshe ti u bhulako na u di nyumbani mu u otelako kona.

¹³Se mfumeli a to khene: Tsula u ya tumbula aha a ku kona, ni na rumela va kuya mñola va txi mtisa hawa. Se va to m'gela ku kha vona: A maneka Dhotani.

¹⁴Sekoko a to rumela mahantxhi ni sikotxikani, ni dibutho da hombe da masotxhwa, va to ya hoka ni wusiku ve randela didhoropa.

¹⁵Se dijaha da Elixa m'thu wa Txizimu, di to wuka ni mixo ngutu di huma, na kuve dibutho di ti ti randete didhoropa ngu mahantxhi ni sikotxikani; sekoko dijaha dakwe di to m'gela tiya: Yowe! Awe nyamne wangu! Hi na maha txani kani?

¹⁶Se Elixa a to khene: U nga thave, nguko mbavangi va emako ni nathu, kupinda vale va ku navo vona.

¹⁷Se Elixa a to khongela a txi khene: MKOMA, na ku kombela ti to u mtula maso kasi ku e wona. Se MKOMA a to tula maso a dijaha, di so wona. Mmango wu ti ti tate ngu mahantxhi ni sikotxikani sa mndilo, si di ranganyetile Elizewu.

¹⁸Se mbimo yile va nga relela va txi yela Elixa, a to khongela ka MKOMA a txi khene: Na ku kombela, va mahe mabhofu vathu vava! Se a to va maha mabhofu, madingano ni txikombelo txa Elizewu.

¹⁹Sekoko Elixa a to khene kwawe: Hi nga yona nzila ya kona, didhoropa kambe hi nga dona; ni londeteni ni na mi heleketa ka wamwamna wule mi mlavako. Se a to va heleketa Samariya.

²⁰Se mbimo yile va nga hoka Samariya, Elixa a to khene: MKOMA, va tule maso kasi va na wona. Sekoko MKOMA a to va tula maso kasi ve wona, se va to ti wona va di hagari ka Samariya.

²¹Se mbimo yile a nga va wona mfumeli wa ka Israyeli, a to khene ka Elizewu: Ni va dayela, ni va dayela, kani tata?

²²Se ene a to khene: Ahimhim! U nga va dayele! U ndi na dayela masotxhwa ale u ma mahako sibotxhwa, ngu ditxhari dako ni wulaho wako kani? Va ninge dipawu ni mati, va na dya ve sela, va na tsula ka nyamne wawe.

²³Se a to va mahela m'buso wa hombe, va to dya ve sela, va txi va txhatxha ve tsula ka nyamne wawe; kha ka wulela kambe masotxhwa a Vasiriya ditikoni ka Israyeli.

²⁴Msana keto, ku to maheka ti to Bheni-Hadhadhe, mfumeli wa Siriya, e tshanganisa otshe masotxhwa akwe; a to kwelela eya randela Samariya.

²⁵Se ku to maneka nzala ya hombe Samariya, nguko ku nga ti randetwe, kuhoka hale ko xaviswa mbongola yimweyo ngu mtxhanu wa magumi ni mararu a siya sa silivhela, ni txipande txa wumune txa mihambuko ya situvani, ngu mtxhanu wa siya sa silivhela.

²⁶Se mbimo yile a nga pinda mfumeli ngu ha digumani, wamsikati wokari a to peka huwa a txi khene: Ni lamulele awe mfumeli, nyamne wangu.

²⁷Se ene a to khene: Ngako MKOMA asi ku lamuleli, ni na si mana hayi sakudya ni vhinya so kulamulela ngu sona kani?

²⁸Mfumeli a to mu wotisa ku khene, kasi nji txani kani? Se wamsikati a nje khene: Awu wa wamsikati dimwani ditshiku a to khene: Naheta mwanana wako nyamsi hidya, mangwana hi nata dya wangu.

²⁹Ekoko hi to bhika mwanana wangu hidya; se mangwanani ka kona ni to khani: Naha mwanana wako hidya, ene a so sisa mwanana wakwe.

³⁰Se mbimo yile mfumeli a nga pfa mapswi awu wamsikati, a to vharula syambalo sakwe, e londisela diguma, se vathu va ti woni ku a ti ti ni syambalo so dhimba ngu mndani, ha nyamani kwakwe.

³¹Se mfumeli a to peka huwa na a txi khene: Txizimu txi na ni daye, ngako di txiza diswa ni si se wila msungo wa Elixa, mwana Sefate!

³²Sekoko Elixa a ti ti khalahatshile kumweko ni madhota nyumbani kwakwe. Mfumeli a to rumela wamwamna masoni kwakwe; aniko asi se hoka m'thu wule, Elixa a to khene ka madhota ale: Mi ti woni ati mwanana wa txidayi a nga rumelisa tona ku ta wila msungo wangu kani? Wonisisani, a txi bwaka wu wo rumwa, msekeleni ditimba; ina kha ku na ku maheto i ti sigingo sa nyamne wakwe si pfalako ngu msana kwakwe kani?

³³Se a txi nge womba-womba navo, awule wo rumwa a nje bwa; mfumeli a nje khene: Kuwoneka taku dikhombo diya dita ngu ka MKOMA; kona ni ndi na verela txani kambe ka MKOMA kani?