Read chopi 2 Vafumeli 8 Bible Online

2 Vafumeli 8 - chopi bible

2 Vafumeli 8

¹Se Elixa a to womba ka wule wamsikati a nga m'wusela mwanana, a txi khene: Khukha u tsula, awe ni votshe va mwaya wako, u ya luvela mu u no kumana, nguko MKOMA a dhani nzala, yi nota heta mtxhanu wa malembe ni mambidi.

²Se wamsikati a to khukha e maha madingano ni dipswi da m'thu wa Txizimu; a to tsula ene ni va mwaya wakwe, eya luvela ka ditiko da Vafilista, mtxhanu wa malembe ni mambidi.

³Se ku to maheka taku kugumani ka mtxhanu wa malembe ni mambidi, awule wamsikati a to wuya ngu ditikoni ka Vafislista, na a txi kwangula ka mfumeli, ngu kulava nyumba yakwe, ni mafu akwe.

⁴Se mfumeli a to gela Gehazi, dijaha da m'thu wa Txizimu, a txi khene: Na ku kombela ti to u ni geletela mithumo ya hombe yi a tolovelako ku yi maha Elizewu.

⁵Se mbimo yile Gehazi a nga txi geletela mfumeli ati Elixa a nga wusisa tona m'thu wo fa, awule wamsikati a to dila ka mfumeli, ngu mhaka ya nyumba yakwe ni mafu akwe, Gehazi a to khene: Awe mfumeli nyamne wangu, wamsikati wa kona ndiyo, ni mwanana wakwe, wule a nga wuswa ngu Elizewu.

⁶Kambe mfumeli a to wotisa ka wamsikati, se ene e mxawutela; sekoko mfumeli a to mninga mthenwa, a txi khene: Mmahe e tshumetelwa sotshe si i ngadi sakwe, ni mabhindu a mafu, kukhukhela ditshiku dile a nga huma ditikoni kala kuwa.

⁷Msana keto, Elixa a to ya Dhamasku, na a txi lwala Bheni-Hadhadhe, mfumeli wa Siriya; se va to m'gela ku kha vona: A bwakile m'thu wa Txizimu.

⁸Sekoko mfumeli a to khene ka Hazayeli: Teka txiningo manzani kwako, u hingeta m'thu wa Txizimu, a na ku wotisele ka MKOMA, a txi khene: Ina ni na kalamuka ka wulwati wuwa kani?

⁹Sekoko Hazayeli a to tsula kuya wonana ni Elixa, a to teka txiningo manzani kwakwe, ka sotshe sile i nga ti sa sinene Dhamasku, mune wa magumi a makamelu na ma ti rwate, e ta bwaka masoni kwawe a txi khene: Mwanana wako Bheni-Hadhadhe a ni rumile ku ta wotisa tiya: Ina mwendo ni na kalamuka ka wulwati wuwa kani?

¹⁰Se Elizewu a to khene: Tsula u txi ya m'gela ku khawe: Kha ditshuri khu na mbi kalamuka, nguko MKOMA a ni kombile ti to kha ditshuri u na fa.

¹¹Se a to mronolela a txi muwonisisa, eza ewa tingana; se m'thu wa Txizimu, a to dila.

¹²Se Hazayeli a to wotisa ku khene: Awe nyamne wangu wo dilela txani kani? Se Elixa a to xamula ku khene: Ngu ti to na ziva dikhombo di u no di maha txitimwi ka vanana va ka Israyeli. U na hisa mikhokhola yawe ngu mndilo, u na daya majaha awe ni mahorana ngu ditxhari, ni vafana vawe u na va tshatulela, u bhandelela sirumbu ka vavasikati.

¹³Se Hazayeli a to wotisa a txi khene: Ina yova txani txithumi txako, txi pindako yimbwa, txo txi nga za txi maha timhaka ta hombe kani? Elixa a to xamula ku khene: MKOMA a ni kombile to awe u na va mfumeli wa Siriya.

¹⁴Sekoko a to khukha ka Elixa e tshumelela ka nyamne wakwe, awu a nga khene: Kasi Elixa a ti khene txani kani? A ni gete ku khene kha ditshuri u na kalamuka!

¹⁵Ku to maheka taku, ka dimwani ditshiku, Hazayeli, e teka didhamba e di beta matini, e khubhunyeta khoheni ka mfumeli, a txi fa. Se Hazayeli a to fuma ka wukhalo wakwe.

¹⁶Se ka dilembe da wutxhanu da kufuma ka Joramu, mwana Akabe, mfumeli wa ka Israyeli, Josafati a txi ngadi e fumela Judha, a to khata kufuma Jehoramu, mwana Josafati, mfumeli wa ka Judha.

¹⁷A khatile kufuma a ti ni tanga ya magumi mararu a malembe ni malembe mambidi, a to fumela Jerusalema mtxhanu wa malembe ni mararu.

¹⁸Se a to tsimbila ngu tinzila ta vafumeli va ka Israyeli, nga tile va nga mahisa tona va nyumba ya ka Akabe, nguko msikati wakwe i ti ti mwanana wa Akabe wa dihorana, a to maha wubihi masoni ka MKOMA.

¹⁹Hambiketo MKOMA kha lava kukhundumusa Judha, ngu kuranda Dhavhidha, txithumi txakwe, nga ha a nga ti m'gete ku khene, a na mninga liwoningo ka vanana vakwe.

²⁰Ka masiku a kufuma ka Jehoramu, va ka Edhomi va to lwisa mfumo wa ka Judha, se ve ti vekela mfumeli txitimwi kwawe.

²¹Sekoko Jehoramu a to pinda eya Zayiri, ni sotshe sikotxikani sakwe; se ene a to wuka ni wusiku e lwisa va ka Edhomi ni vathangeli va sikotxikani va nga ti ti mrandete, vathu va to tshumelela matendani kwawe.

²²Ngu kumaha keto, va ka Edhomi va to venga mfumo wa ka Judha, kala ka ditshiku da nyamsi; sekoko Libhina nene a to vhutuka.

²³Kutala ka mithumo ya Jehoramu ni totshe ti a nga maha, ina ti ngava ti sa bhalwa amu ka dibhuku da Matimu a vafumeli va ka Judha kani?

²⁴Se Jehoramu a to fela ka vatate vakwe, e tshotshwa ka vatate vakwe, Didhoropani ka Dhavhidha; se mwanana wa kona Akaziya, a to fuma ka wukhalo wakwe.

²⁵Ka dilembe da digumi ni mambidi da kufuma ka Joramu, mwana Akabe, mfumeli wa ka Israyeli, a to khata kufuma Akaziya, mwana Jehoramu, mfumeli wa ka Judha.

²⁶Akaziya a ti ti ni tanga ya magumi mambidi a malembe ni mambidi, mbimo yile a nga khata kufuma, a to fuma dilembe dimwedo, kona Jerusalema.

²⁷Se a to tsimbila ngu nzila ya nyumba ya ka Akabe, e maha wubihi masoni ka MKOMA, kufana ni nyumba ya ka Akabe, nguko i ti ti mwane wa nyumba ya ka Akabe.

²⁸Se Akaziya a to tsula Ramoti-Gileyadhi, kumweko ni Joramu, mwana Akabe, ku yalwa ni Hazayeli, mfumeli wa Siriya; se Vasiriya va to dayisa Joramu.

²⁹Sekoko mfumeli Joramu a to tshumela eya Jezireyeli kuya thumwa silonda sile a nga vangelwa Rama, na a txi lwa ni Hazayeli, mfumeli wa Siriya; se Akaziya mwana Jehoramu, mfumeli wa ka Judha, a to relela Jezireyeli kuya xola Joramu, mwana Akabe, ngako a nga txi lwala.