Read chopi 2 Vafumeli 9 Bible Online

2 Vafumeli 9 - chopi bible

2 Vafumeli 9

¹Sekoko mprofeti Elixa a to dhana mmweyo ka vanana va vaprofeti e ta m'gela tiya: Sunga txiwunu txako, u teka ngoto yiya ya mafura ngu dianza dako, u tsula Ramoti-Gileyadhi.

²U di hokile kheyo, wonisisa mu a ku kona Jehu mwana Josafati, mwana Ninisi; u ya wulela u mkhukhisa hagari ka vanawe, u m'heleketa ka nyumba ya hagari.

³Se u teka ngoto ya mafura, u ma thela ha msungo kwakwe u txi khawe: MKOMA a khene: Ni ku totile kuva mfumeli txitimwi ka Israyeli. Sekoko u tula ditimba u tutuma, u nga zumbe.

⁴Sekoko mfana wule wa mprofeti, a to tsula Ramoti-Gileyadhi.

⁵Mbimo yile a nga wulela, vathangeli va mabutho va ti ti khalahatshile kona hale; a so khene: Mthangeli, ni dipswi do kugela. Jehu a to wotisa ku khene: Ka wihi hagari ka hotshethu kani? Kwako mthangeli!

⁶Sekoko a to khukha e wulela nyumbani, a to thela mafura ha msungo ka Jehu, a nje khene: MKOMA, Txizimu txa Israyeli, a khene: Ni ku totile kuva mfumeli txitimwi ka vathu va MKOMA, txitimwi ka Israyeli.

⁷U na peka nyumba ya nyamne wako Akabe, kuva ni lwisa mnoha wa sithumi sangu, wa vaprofeti, ni mnoha wa sithumi sa MKOMA, ngu dianza da Jezabheli.

⁸Se yotshe nyumba ya Akabe yi na loviswa; ni na dayela votshe vafana vakwe, vahombe ni vavadotho va ku Jerusalema.

⁹Nguko ka nyumba ya Akabe ni na maha ku nga ti ni nga mahisa tona ka nyumba ya Jerobhowamu, mwana Nebhate, ni ku nga ka nyumba ya Bhahasa, mwana Ayiyasi.

¹⁰Se timbwa ti na dya Jezabheli thembweni ka hafuhi ni Jezireyeli; kha na mbi tshotshwa ngu m'thu. Msana keto, mprofeti wule wa dijaha a to tula ditimba, e huma ngu kututuma.

¹¹Jehu a to huma eya ka sithumi sa nyamne wakwe, si txi kha sona: I thenga kani? Dibhemba diya di tete txani kwako kani? Se Jehu a to khene kwawe: Anu ma m'ziva wamwamna wule, ni mawombawombelo akwe.

¹²Aniko vona va to kha vona: Makuhu, hi gele konkuwa. A txi khene: A ni gete ti, ni ti, taku khene: MKOMA a khene: Ni ku totile kuva mfumeli txitimwi ka Israyeli.

¹³Sekoko va to kuluveta m'thu ni m'thu a to teka txyambalo txakwe, e ateta hahatshi ka txikando txo guleka ngutu, va to veta mpundu va txi kha vona: Jehu wa fuma!

¹⁴Sekoko Jehu, mwana Josafati, mwana Ninisi, a to wukela Joramu. Nguko Joramu a ti ti randete Ramoti-Gileyadhi, ene ni votshe va ka Israyeli, ngu mhaka ya Hazayeli, mfumeli wa Siriya.

¹⁵Ngu kumaha keto, mfumeli Joramu a to wuya Jezireyeli ku ta thumwa silonda, sile a nga vangelwa ngu Vasiriya, mbimo yile a nga lwa ni Hazayeli, mfumeli wa Siriya. Se a nje khene kha Jehu: I di kuranda kwanu, ku nga hume ni wammweyo didhoropani, ku nga huluke ni wammweyo, kuya zivisa eto Jezireyeli.

¹⁶Sekoko Jehu a to kwela mu ka txikotxikani e tsula Jezireyeli, nguko Joramu a ti ti otete koneyo; nene Akaziya a to relela kuya xola Joramu.

¹⁷Se muwoneleli a ti ti txitezi ka Jezireyeli, a to wona masotxhwa a Jehu ma txita, a nje khene: Na wona masotxhwa. Sekoko Joramu a to khene: Rumela m'gadhi mmweyo wa dihantxhi e va hingeta, a txi ya wotisa taku khene: Ku ni kuthutha kani?

¹⁸Se m'gadhi wa dihantxhi a to hingeta Jehu a txi ya khene: Mfumeli a wotisa to khene ku ni kuthutha kani? Se Jehu a nje khene: U lava ku na maha txani ngu kuthutha kani? Pinda uya msana kwangu! Se muwoneleli a to m'gela ku khene: A bwakile wo rumwa, aniko kha tshumeli.

¹⁹Sekoko ku to rumwa mmwani m'gadhi wa dihantxhi, a txi ya khene: Mfumeli a khene: Ku ni kuthutha kani? Se Jehu a nje khene: U lava ku na maha txani ngu kuthutha kani? Pinda uya msana kwangu!

²⁰Se muwoneleli a to m'zivisa ku khene: A bwakile mmwani kambe, aniko kha tshumeli; kambe tsimbilelo yakwe, yi fana ni ya Jehu, mwana Ninisi, nguko a tsimbila ngu txiviti.

²¹Sekoko Joramu a to khene: Longiselani txikotxikani txangu. Ku to longiselwa txikotxikani, kukhukha Joramu, mfumeli wa ka Israyeli, ni Akaziya, mfumeli wa ka Judha, mmweyo ni mmweyo amu ka txikotxikani txakwe, ve tsula kuya wonana ni Jehu, se va to ya mmana ka wukhalo wa wudotho wa thembwe ya Nabhote Mujezireyeli.

²²Se mbimo yile Joramu a nga wona Jehu, a to khene: Ina ku ni kuthutha kani Jehu kani? Se ene a nje khene: Ngu thutha muni na kuve wugelegele wa mwamwako Jezabheli ni maloyi akwe nzingi kani?

²³Sekoko Joramu a to fumbareta manza akwe, e tutuma, a txi khene ka Akaziya: Kuningelwa kuho, awe Akaziya!

²⁴Se Jehu a to gwimba wulaho wakwe ngu mtamo, e fula manza a Joramu, se lingove li txi ya manela mbilu; se a to wa amu ka txikotxikani txakwe.

²⁵Sekoko Jehu a to khene ka Bhidhikari, mthangeli wakwe wa yimbi: Mteke u txi mtshotsha ka wukhalo wa wudotho, wa thembwe ya Nabhote Mujezireyeli; nguko alakanya tito, ni txi tsula ani ni nawe hotshe ngu mahantxhi hi londisa tate wako Akabe, MKOMA a vekile mrwalo txitimwi kwakwe, a txi khene:

²⁶Ngu ditshuri, i tiku ni sa wona nyamnova ni mitshikari mnoha wa Nabhote ni mnoha wa vanana vakwe, kuwomba MKOMA, nga ni si ku dihi wukhalo wu wa wudotho wa thembwe, kuwomba MKOMA. Konkuwa mteke u txi mtshotsha ka wukhalo wu wa wudotho wa thembwe, madingano ni dipswi da MKOMA.

²⁷Mbimo yile Akaziya, mfumeli wa ka Judha, a nga wona tile ti nga maheka, a to tutuma ngu nzila ya thembweni, aniko Jehu a to mlondeta, a txi khene: Mpekeni nene Akaziya amu ka txikotxikani txakwe, wa kwelela kuya Guri, hafuhi ni Ibleyawu. Se a to tutuma a txi ya Megidhu, eya fela kona.

²⁸Se sithumi sakwe si to mteka ngu txikotxikani, eya Jerusalema, veya mtshotsha ka diyiva dakwe, hafuhi ni vatate vakwe, didhoropani ka Dhavhidha.

²⁹Se ka dilembe da wugumi ni dimwedo da kufuma ka Joramu, mwana Akabe, Akaziya a to khata kufumela ditiko da ka Judha.

³⁰Se Jehu a to ta Jezireyeli, eho mbimo yile a nga tipfa Jezabheli a to ti pendetela madhawani ka maso, e tshurisela msungo wakwe, se e solela ngu difasitela.

³¹Mbimo yile a nga txi wulela Jehu, Jezabheli a to khene: Ina u manile kuthutha awe Ziniri, aku u nga daya nyamne wako kani?

³²Jehu a to guleta khohe e wona difasitela, a nje khene: I mani eyo didhawa kwangu kani? I mani? Se mithenwa yimbidi mwendo yiraru, yi to muwona ngu ha ka difasitela.

³³Sekoko Jehu a to khene: Mrinzeni eyo wamsikati ngu koneho. Se va to mrinza hahatshi, diseta ni mahantxhi si to txabwaketelwa ngu mnoha wakwe, se Jehu a to m'ganyatela.

³⁴Mbimo yile koko a nga ti wulete, a ti dyite ni kusela, a to khene: Mtekeni m'bihiyo mi txi ya mtshotsha, nguko i mwana mfumeli.

³⁵Se va to tsula diyivani; aniko kha va mmana, hahanze ka txikwakwa, ni mikondo ni syanza.

³⁶Sekoko va to wuya ve ta zivisa Jehu, ene a nje khene: Adiya ngu dona dipswi da MKOMA, a ngadi womba ngu mthumo wa Elija, Mtibhita, txithumi txakwe a txi khene: Ka wukhalo wa wudotho wa thembwe ya Jezireyeli, timbwa ti na dya nyama ya Jezabheli,

³⁷Se txirumbi txa Jezabheli txi na nga sinoniso amu thembweni, ka wukhalo wa wudotho wa Jezireyeli, ti si koteki ku m'ziva taku awuwa i Jezabheli.