Read chopi 1 Makronika 15 Bible Online

1 Makronika 15 - chopi bible

1 Makronika 15

¹Dhavhidha a to ti akela kambe nyumba Didhoropani ka Dhavhidha; a to lulamisa wukhalo wo veka ka wona dibhokiso da Txizimu, ni ku di gwimbela ditenda.

² Sekoko Dhavhidha a to khene: Kha ku na m'thu a nga tekako dibhokiso da MKOMA, ngako i si nga Valevhi; nguko MKOMA a va sawute, kasi ku ve teka dibhokiso da MKOMA, ni ku mthumela kala kupinduka.

³Se Dhavhidha a to sengeleta votshe va ka Israyeli kona Jerusalema, kasi kuyisa dibhokiso da MKOMA ka wukhalo wa dona, awule a nga ti wu lulamisile.

⁴Se Dhavhidha a to sengeleta vanana va Aroni ni Valevhi:

⁵Ka vanana va Kowati, i Uriyeli, mthangeli wa kona, ni 120 wa vanawe;

⁶ka vanana va Merari, i Asaya, mthangeli wa kona, ni 220 wa vanawe;

⁷ka vanana va Gerisoni, mthangeli wa kona i Joweli, ni 130 wa vanawe;

⁸ka vanana va Elisafani, i Semaya mthangeli wa kona, ni 200 wa vanawe;

⁹ka vanana va Hebroni, i Eliyeli, mthangeli wa kona, ni mtxhanu wa magumi ni mararu a vanawe;

¹⁰ka vanana va Uziyeli, mthangeli wa kona i Aminadhabhe, ni 112 wa vanawe.

¹¹Se Dhavhidha a to dhana vaphaxeli, Zadhoki ni Abhiyatari, ni Valevhi, Uriyeli ni Asaya, ni Joweli, ni Semaya, ni Eliyeli, ni Aminadhabhe.

¹²A txi khene kwawe: Anu mi vathangeli va vatate hagari ka va ka Levhi; ti sawulekiseni, anu ni vananu, kasi ku mi rwala dibhokiso da MKOMA, Txizimu txa Israyeli, mi di yisa ka wukhalo wule ni nga wu lulamisa.

¹³Ngako koko, anu mi nga mbi ti maha kukhatani, MKOMA a hi tsayisile, nguko kha ha mlava madingano ni kuleleta kwakwe.

¹⁴Va to ti sawulekisa koko, Vaphaxeli ni Valevhi, kuva ve rwala dibhokiso da MKOMA, Txizimu txa Israyeli.

¹⁵ Se vanana va Valevhi, va to pakata dibhokiso da Txizimu, ngu tindonga tile ti nga ti txitimwi ka dona, madingano ni dipswi da MKOMA, ngu kuwomba ka Mosi.

¹⁶Se Dhavhidha a to womba ka vathangeli va Valevhi ta ku ve veka vanawe ka mthumo wa kuembelela, ngu sivetaveta, ni sitende, ni tiharipa, ni titshodi, kasi ku ve pfalisa, ve guleta mapswi ngu kutsaka.

¹⁷Valevhi koko, va to sawula Hemani, mwana Joweli; se ka vanawe va to sawula Asafe, mwana Bherekiya; ka vanana va Merari vanawe, i Etani, mwana Kusaya.

¹⁸Se vanawe va mtxawa wa wumbidi, ngu vava: Zakariya, ni Bhene, ni Jahaziyeli, ni Semiramoti, ni Jeyeli, ni Uni, ni Eliyabhe, ni Bhenaya, ni Mahaseya, ni Matitiya, ni Elifelewu, ni Mikineya, ni Obhedhi-Edhomi, ni Jeyeli, vawoneleli va txike.

¹⁹Se vaembeleli i Hemani, ni Asafe, ni Etani, va ti veta titshodi ta msuku;

²⁰se Zakariya, ni Aziyeli, ni Semiramoti, ni Jeyeli, ni Uni, ni Eliyabhe, ni Mahaseya, ni Bhenaya, va ti veta timbila, txitimwi ka Alamote;

²¹se Matitiya ni Elifelewu, ni Mikineya, ni Obhedhi-Edhomi, ni Jeyeli, ni Azaziya, va ti veta tiharipa, txitimwi ka Seminite, kasi kuvhunetela mpfumawulo.

²²Se Kenaniya, mthangeli wa Valevhi, a ti ni mthumo wo thulela tindando; a ti vagondisa kuthulela, nguko a ti ti tiziva kha kwati.

²³Se Bherekiya ni Elikana i ti ti vawoneleli va txike txa dibhokiso.

²⁴Se Sebhaniya, ni Josafa, ni Netaneli, ni Amasayi, ni Zakariya, ni Bhenaya, ni Eliyezeri, vaphaxeli, va ti veta mipundu masoni ka dibhokiso da Txizimu; se Obhedhi-Edhomi ni Jeya, i ti vawoneleli va txike txa dibhokiso.

²⁵Ku to maheka tito, Dhavhidha ni madhota a ka Israyeli, ni vathangeli va magumi a mazana, ve tsula kuya teka dibhokiso da txitumelelano txa MKOMA ngu kutsaka, nyumbani ka Obhedhi-Edhomi.

²⁶Se ku to maheka koko taku, mbimo yile Txizimu txi nga ti vhuna Valevhi vale va nga ti rwate dibhokiso da txitumelelano txa MKOMA, va to phaxa ngu mtxhanu wa marole ni mambidi, ni mtxhanu wa tihamba ni timbidi.

²⁷Se Dhavhidha a ti ambate syambalo sa linyu yo hehuka, kumweko ni votshe Valevhi, vale va nga ti rwate dibhokiso, ni vaembeleli, ni Kenaniya, mthangeli wa vale va nga ti rwate dibhokiso ni vaembeleli; Dhavhidha a ti ni efodhe ya linyu.

²⁸Se votshe va ka Israyeli va to teka dibhokiso da txitumelelano txa MKOMA, ngu kutsaka ka hombe, na va txi veta mpfumawulo wa timbila ni mipundu ni titshodi, va txi maha diguwa da sitende ni tiharipa.

²⁹Se ku to maheka taku, mbimo yile dibhokiso da txitumelelano txa MKOMA di nga hoka Didhoropani ka Dhavhidha, Mikali, mwana Sawule, a to solela ngu ha ka difasitela, se e wona Dhavhidha a txi sinya ni kuveta, e mueyisa ngu mbiluni kwakwe.