Read chopi 1 Makronika 16 Bible Online

1 Makronika 16 - chopi bible

1 Makronika 16

¹Va di tisile koko dibhokiso da Txizimu, va to di veka hagari ka ditenda dile Dhavhidha a nga ti di gwimbile; se ve maha mningelo wa kuhiswa, ni miphaxo ya kudikha masoni ka Txizimu.

²Se mbimo yile Dhavhidha a nga gwita kuningela ka Txizimu mningelo wa kuhiswa ni wa kudikha, a to katekisa vathu ngu ditina da MKOMA.

³Se a to abanisela ka votshe va ka Israyeli, vavamna ni vavasikati, mmwani ni mmwani e mninga dipawu ni dikatha da hombe da nyama, ni txingotwana txa vhinya.

⁴Se a to veka Valevhi vokari masoni ka dibhokiso da MKOMA, kuva ve thangela mthumo wa wukhongeli; kasi ku alakanya, ni kudhumisa, ni kukhozela MKOMA, Txizimu txa Israyeli.

⁵Mthangeli wa kona i ti Asafe, kulondeta Zakariya, se ngu msana ku to gameta Jeyeli ni Semiramoti, ni Jeyeli, ni Matitiya, ni Eliyabhe, ni Bhenaya, ni Obhedhi-Edhomi, ni Jeyeli, va di ni sitende ni timbila; se Asafe a ti veka titshodi.

⁶Se vaphaxeli Bhenaya ni Jahaziyeli, va to simama ni mipundu, masoni ka dibhokiso da txitumelelano txa Txizimu.

⁷Sekoko ka ditshiku donedo, Dhavhidha a to khata kuleletela Asafe ni vanawe kudhumisa MKOMA, a txi khene:

⁸Dhumisani MKOMA, huwelelani ditina dakwe, nuwelani simaho sakwe hagari ka vathu.

⁹Embelelani tindando ta ku m'dhumisa, wombawombani ngu mithumo yakwe yo xamalisa.

¹⁰Ti guleteni ka ditina dakwe do sawuleka; Ti na tsake timbilu ta va va lavako MKOMA.

¹¹Lavani MKOMA ni mtamo wakwe; lavani khohe yakwe yotshe mbimo.

¹²Alakanyani mithumo yakwe yo xamalisa ayi a nga yi maha; sidiwukiso sakwe ni kululama ka txisofu txakwe.

¹³Anu liveleko la ka Israyeli, sithumi sakwe, ni nanu vanana va Jakobe, misawulwa yakwe.

¹⁴Ene MKOMA, Txizimu txathu; kululama kwakwe ku ka otshe mafu.

¹⁵Alakanyani txitumelelano txakwe yotshe mbimo, ni sileleto sakwe si a nga si veka ka digumi da mazana a tiveleko;

¹⁶ ka txitumelelano txi a nga txi maha ni Abrahamu, ni ka txixambanyo takwe ka Isaake;

¹⁷ txile a nga txi tsanisa e txi maha txileleto ka Jakobe, txi maha txitumelelano txa kwa mbi guma ka Israyeli;

¹⁸a txi khene: Ni na kuninga ditiko da Kanana, di maha thomba yanu.

¹⁹Aku va nga ti ngu mtengo wa wudotho, i nga ti valuveli ka dona;

²⁰va ti tsimbila-tsimbila ka ditiko ni ditiko, va txi penga ngu ka mfumo ni mfumo.

²¹ Txizimu kha txa tumela ti to ni wammweyo e va xupha, ngu mhaka yawe, Txizimu txi kawukile vafumeli, txi txi kha txona:

²² Mi nga gweseni ava ni nga va tota, mi nga xupheni vaprofeti vangu.

²³Embelelani MKOMA anu mafu otshe; nuwelani kuhanyiswa kwakwe ngu masiku otshe.

²⁴Embelelani wudhumo wakwe hagari ka matiko, ni sixamaliso sakwe hagari ka vathu votshe.

²⁵Nguko MKOMA mbwa hombe; a fanela kudhumiswa ngutu, wa thaviseka kupinda sotshe sizimu.

²⁶Nguko sotshe sizimu sa ha mafuni kha si vhuni txilo; kambe MKOMA a vangile nzuma.

²⁷Kudhumiswa ni wuhombe si masoni kwakwe, mtamo ni litsako si ha wukhaloni kwakwe.

²⁸Ningani MKOMA, anu vathu va matiko, ningani MKOMA wudhumo ni mtamo.

²⁹Ningani MKOMA wudhumo wu wu fanelako ditina dakwe, tisani siningo, mi ta masoni kwakwe; Khizamelani MKOMA ha kusawulekani kwakwe.

³⁰Dhudhumela masoni kwakwe; otshe mafu ma na dhudhumele masoni kwakwe; se mafu ma na tsana, kasi ku ma si zinginiswe.

³¹Yi na tsake nzuma; ni mafu ma na peke mikulungwane; se ti na wombwe hagari ka vathu taku: MKOMA wa fuma.

³²Li na bhonge linene ni sotshe sile si ku ka lona, ma na tsake mafu ni sotshe sile si ku ka ona.

³³Sekoko yotshe mindonga ya txitinga yi na embelela ngu kutsaka masoni ka MKOMA; nguko wata ku ta lamula mafu.

³⁴Dhumisani MKOMA, nguko mbwa mnene: Ni lirando lakwe li zumba ngu ha ku si gwitiko.

³⁵Se mi na khanu: Hi hanyise, awe Txizimu txa kuhanyiswa kwathu, hi sengelete u hi txhatxhisa ka matiko; kasi ku hi na bonga ditina dako do sawuleka, hi tsaka ngu wudhumo wako.

³⁶Ku na dhumiswe MKOMA Txizimu txa Israyeli, ngu malembe ni malembe. Se votshe vathu va to kha vona: Amen! Se ve dhumisa MKOMA.

³⁷Sekoko Dhavhidha a to siya Asafe ni vanawe koneho, masoni ka dibhokiso da txitumelelano txa MKOMA, kasi kuve khozela masoni ka dibhokiso otshe masiku, madingano ni txileleto txa ditshiku ni ditshiku.

³⁸Se kambe a to veka Obhedhi-Edhomi ni vanawe va mtxhanu wa magumi ni dimwedo. Obhedhi-Edhomi, mwana Jedhutumi ni Hosa, a to va veka kuva vaemeli va sike.

³⁹Se mphaxeli Zadhoki, ni vanawe, vaphaxeli, a to va veka masoni ka Nyumba ya MKOMA, ka wukhalo wo guleka wule wu nga ti Gibheyoni,

⁴⁰kasi kuve ningela miphaxo ya kuhiswa, ka MKOMA, txitimwi ka txiluvelo txa miphaxo ya kuhiswa, ya yotshe mbimo, wusiku ni mitshikari; se ni to madingano ni tile ti nga bhalwa amu ka Mlayo wa MKOMA, wu wu nga leletelwa va ka Israyeli.

⁴¹Se hagari kwawe a to yisa Hemani, ni Jedhutumi, ni votshe vale va nga sawulwa, vale va nga dhanwa ngu matina awe, kuve dhumisa MKOMA, nguko lirando lakwe li zumba ngu ha ku si gwitiko.

⁴²Sekoko Hemani ni Jedhutumi, i ti vaveti va mipundu ni titshodi ta vaembeleli, ni sivetaveta sa m'zeno wa Txizimu; aniko vanana va Jedhutumi, i ti vawoneleli va txike.

⁴³ Sekoko votshe vathu va to tsula, mmwani ni mmwani e ti yela m'tini kwakwe; se Dhavhidha a to tshumela eya katekisa va mwaya wakwe.