Read chopi 1 Makronika 17 Bible Online

1 Makronika 17 - chopi bible

1 Makronika 17

¹Se ku to maheka taku, ngako Dhavhidha a di zumbile nyumbani kwakwe, a to gela mprofeti Nathani, a txi khene: Wona taku, ni zumba mu ka nyumba yo akwa ngu mikedhari, kambe dibhokiso da txitumelelano txa MKOMA, di zumba ditendani.

²Sekoko Nathani a to khene ka Dhavhidha: Maha totshe ti u ku nato mbiluni kwako, nguko Txizimu txi ni nawe.

³Kambe ka wusiku wonewo ku to maheka ti to dipswi da MKOMA di ta ka Nathani, di txi ta kha dona:

⁴Tsula u ya gela Dhavhidha, txithumi txangu, u txi khawe: MKOMA a khene: Awe khu na mbi ni akela nyumba yaku ni zumba ka yona,

⁵nguko kha ni khali kuzumba ka nyumba ni ya yimweyo, kukhukhela ditshiku dile ni nga humisa va ka Israyeli kala ka ditshiku da nyamsi; kambe ni tsimbila ngu ka ditenda ni ditenda, ni ka makhalo o sawuleka.

⁶Ka otshe madhawa ale ni nga tsimbila-tsimbila ni votshe va ka Israyeli, ina ni wombile dipswi dokari, ka valamuli vokari va ka Israyeli, vale ni nga va leleta kudyisa vathu vangu, ni txi khani: Ngu kutxani mi si ni akeliko nyumba ngu mikedhari kani?

⁷Konkuwa koko, u na gela txithumi txangu Dhavhidha, u txi khawe: MKOMA wa Mabutho a Tiyimbi a khene: Ani ni ku humisile txibalani, msana ka tinvuta, kuva u maha mthangeli wa vathu vangu va ka Israyeli.

⁸Ni ti ti kumweko ni nawe kotshe amu u nga ti tsimbila-tsimbila kona, aniko ni fuvisile votshe valala masoni kwako, ni mahile ti to ditina dako di fana ni ditina da vathangeli va vakuho ha mafuni.

⁹Ni na ninga wukhalo ka vathu vangu va ka Israyeli, ni va phaya koneho, kasi kuve ti akela ka wukhalo wonewo, kona kha va na mbi thaviswa ngu m'thu; kambe kha va na mbi ngadi ve xaniswa ngu vale va nga ti va xanisa, kufana ni makhatoni,

¹⁰kukhukhela ka masiku ale ni nga veka valamuli txitimwi ka vathu vangu va ka Israyeli; ni khozisile votshe valala vako; kambe ni kuzivisile ti to MKOMA a na kuakela nyumba.

¹¹Se ku na maheka taku, mbimo yi masiku ako ma no tatiseka, o tsula ka vaveleki vako, ni na emisa ka liveleko lako, mmweyo ka vanana vako, ni tsanisa mfumo wakwe.

¹²Ngene wuwa a no ni akela nyumba, se ani ni na tsanisa wukoma wakwe ngu ha ku si gwitiko.

¹³ Ani ni na va tate wakwe, se ene a na va mwanana wangu; kha ni na mbi thavisa lirando langu txitimwi kwakwe, kufana ni lile ni nga li thavisa ka wule a nga maneka u sanzi ku va ho awe.

¹⁴Aniko ni na m'tsanisa nyumbani kwangu ni mu ka mfumo wangu kala kupinduka, ni txitulu txa wukoma wakwe txi na tsana ngu ha ku sigwitiko.

¹⁵Nathani a to womba ka Dhavhidha madingano ni otshe mapswi awa ni madingano ni txotshe txiwoniso txiya.

¹⁶Sekoko, mfumeli Dhavhidha a to wulela a txi ema masoni ka MKOMA, a txi khene: No va mani ani, MKOMA Txizimu kani? Niku ngu yihi nyumba yangu, aha koza u ni tisa hawa kani?

¹⁷Hambi keto, awe Txizimu, mhaka yiya yi vile yidotho masoni kwako; ngu kumaha keto, u wombawombile ngu nyumba ya txithumi txako ka timbimo ti titako; madingano ni sihena sa vathu u ni kulisile, awe MKOMA Txizimu.

¹⁸A na womba txani kambe Dhavhidha, madingano ngu wotshe wudhumo wu u nga ninga txithumi txako kani? Kambe awe wa txi ziva kha kwati txithumi txako.

¹⁹Awe MKOMA, ngu kuranda txithumi txako, madingano ni mbilu yako, u mahile wuhombe wotshe wuwa, kasi kuzivisa timhaka tiya ta hombe.

²⁰Awe MKOMA, kha ku na wo fana ni nawe, kha ku na tximwani Txizimu hahanze kwako, madingano ni totshe ti hi nga tipfa ngu tinzeve tathu.

²¹I mani a kuho wo fana ni vathu vako va ka Israyeli, ditiko dimwedo dwe ha mafuni, avale Txizimu txi nga va txhatxhisa ditikoni ka Egipta, kasi ku ti mahela ditina ngu mithumo yo thaviseka, ngu kututumisa matiko masoni ka vathu vako, kani?

²²Se u tekile vathu va ka Israyeli kuva veva vathu vako, kala kupinduka; se awe MKOMA, uve Txizimu txawe.

²³Konkuwa koko, awe MKOMA, dipswi dile u ngadi womba ngu txithumi txako ni nyumba ya txona, di na tsane, ngu ha ku si gwitiko; maha nga ti u nga wombisa tona.

²⁴Di na tsane ni ku kuliswa ditina dako, kala kupinduka, ku na wombwe taku: MKOMA wa Mabutho a Tiyimbi, Njizimu txa Israyeli, Njizimu txo lumba Israyeli; yi na tsane masoni kwako nyumba ya Dhavhidha, txithumi txako.

²⁵Nguko awe, Txizimu txangu, u gete txithumi txako ti to u na txi akela nyumba; ngu kumaha keto, txithumi txako txi mani themba ya ku ta kombela masoni kwako.

²⁶Konkuwa koko, MKOMA, awe ngawe Txizimu txonetxo txa tximwetxo, u wombile wunene wuwa ngu mhaka ya txithumi txako.

²⁷Konkuwa koko, katekisa nyumba ya txithumi txako, kasi ku yi simama masoni kwako kala kupinduka; nguko awe MKOMA, u yi katekisile, se yi na maneka yi di katekile ngu ha ku sigwitiko.