Read chopi 1 Makronika 18 Bible Online

1 Makronika 18 - chopi bible

1 Makronika 18

¹Msana keto, ku to maheka tito, Dhavhidha e xasela Vafilista, e va khozisa; e teka Gati ni makhalo o fumelwa ngu ngene, manzani ka Vafilista.

²Kambe a to xasela Vamowabhi, se Vamowabhi va to maha tikhumbi ta Dhavhidha, va txi ta mluva.

³Kambe Dhavhidha a to xasela Hadhadhezeri, mfumeli wa Zobha, hafuhi ni Hamati, nga kule a nga ti yite kuya tsanisa mfumo wakwe, mnamboni wa Ewufrate.

⁴Se Dhavhidha a to m'honyola 1.000 wa mahantxhi o ndinda sikotxikani, ni 7.000 wa vagadhi va mahantxhi, ni 20.000 wa vavamna vo tsimbila ngu mikondo; se Dhavhidha a to limata otshe mahantxhi o ndinda sikotxikani, e siya 100 wa mahantxhi.

⁵Se Vasiriya va to ta ngu Dhamasku, ku ta vhuna Hadhadhezeri, mfumeli wa Zobha; kambe Dhavhidha a to daya 22.000 wa vavamna va Vasiriya.

⁶Se Dhavhidha a to veka vawoneleli kona Siriya ka Dhamasku, se Vasiriya va to maha tikhumbi ta Dhavhidha, va txi mluva; kambe MKOMA a to xayisa Dhavhidha, kotshe amu a nga ti ti ya kona.

⁷Se Dhavhidha a to teka sivhikelo sa nzalama sile si nga ti ni tikhumbi ta Hadhadhezeri, e si tisa Jerusalama.

⁸ Kambe Dhavhidha a to teka koporo yayingi ngutu ya Tibhati ni ya Kumi, madhoropa a Hadhadhezeri, ayile Solomoni a nga maha ngu yona Linene la koporo, ni tiphande, ni siya sa koporo.

⁹Se mbimo yi Towu, mfumeli wa Hamati, a nga pfa taku Dhavhidha a hoxotile dotshe dibutho da yimbi da Hadhadhezeri, mfumeli wa Zobha,

¹⁰a to ruma mwanana wakwe Hadhoramu kuya ka Dhavhidha, kuya muwotisa taku o txani, ni kuya m'bonga, ngu kule a nga lwa ni Hadhadhezeri a txi mkhozisa (nguko Hadhadhezeri a ti lwisana ni Towu), a to mrumela ni yotshe mixowo ya tikhadi ta nzalama, ni ta silivhela, ni ta koporo,

¹¹atile Dhavhidha a nga ti ningela ka MKOMA kumweko ni nzalama, ni silivhela, yile a nga yi honyola ka mamwani matiko: ka va ka Edhomi, ni Vamowabhi, ni ka vanana va ka Amoni, ni ka Vafilista, ni ka va Amaleki.

¹² Kambe Abhixayi, mwana Zeruiya, a to daya 18.000 wa va ka Edhomi, mkovani ka Mnyu.

¹³Se a to veka vawoneleli, kona Edhomi, se votshe va ka Edhomi va to maha tikhumbi ta Dhavhidha; kambe MKOMA a to xayisa Dhavhidha, kotshe amu a nga ti ti ya kona.

¹⁴Se Dhavhidha a to fuma votshe va ka Israyeli; a txi lamula ngu kululama timhaka ta votshe vathu vakwe.

¹⁵Jowabhi mwana Zeruiya, i ti ti mthangeli wa dibutho da yimbi; se Josafati mwana Ayiludhi, i ti ti mxayisi wa timhaka.

¹⁶Zadhoki, mwana Ayitubhe, ni Abhimeleki, mwana Abhiyatari, i ti ti vaphaxeli; se Sawusa i ti ti mabhalani.

¹⁷Bhenaya, mwana Joyadha, i ti ti mthangeli wa Vakereti ni Vapeleti; kambe vanana va Dhavhidha vo khata, va ti ti ka dianza da mfumeli.